పల్నాడు జిల్లాలో క్షుద్రపూజల పేరుతో ఇద్దరిని హత్య చేసినట్లు ఆరోపణలు ఎదుర్కొంటున్న నిందితుడిని పోలీసులు అరెస్ట్ చేశారు. నరసరావుపేటకు చెందిన నిఖిల్‌.. నిద్రిస్తున్న వారిని బండరాయితో హత్య చేసి, మృతదేహం నుంచి కొన్ని శరీర భాగాలను తీసుకెళ్లినట్లు పోలీసులు గుర్తించారు. ఈ కేసు దర్యాప్తులో 2018లో జరిగిన మరో హత్యలోనూ నిఖిల్‌ ప్రమేయం ఉన్నట్లు వెలుగులోకి వచ్చింది. సీసీటీవీ, సాంకేతిక ఆధారాలతో నిందితుడిని గుర్తించిన పోలీసులు రిమాండ్‌కు తరలించారు.
కృష్ణా జిల్లాలో ఆసక్తికర ఘటన చోటుచేసుకుంది. ఉద్యోగం పేరుతో మూడేళ్లుగా కుటుంబానికి దూరంగా ఉంటూ కనిపించకుండా తిరుగుతున్న భర్త.. చివరకు తన కాలనీలోని ఓ ఇంట్లో మరో మహిళతో ఉండగా భార్యకు కనిపించాడు. దీంతో ఆగ్రహానికి గురైన భార్య, కుమారుడితో కలిసి అతడిపై దాడి చేసి పోలీసులకు అప్పగించింది.
తిరుపతి జిల్లా సత్యవేడు మండలం శ్రీసిటీ పారిశ్రామికవాడలోని టిల్‌ హెల్త్‌కేర్‌ పరిశ్రమలో శనివారం ఉదయం భారీ పేలుడు సంభవించింది. బాయిలర్‌ పేలిన ఘటనలో ఐదుగురు కార్మికులు మృతి చెందినట్లు తాజా సమాచారం. మరో పది మందికి పైగా తీవ్రంగా గాయపడినట్లు అధికారులు వెల్లడించారు. రెస్క్యూ, పోలీసు, అగ్నిమాపక బృందాలు సహాయక చర్యలు కొనసాగిస్తున్నాయి.
డ్రైవర్ సుబ్రహ్మణ్యం హత్య కేసులో వైసీపీ ఎమ్మెల్సీ అనంతబాబుకు మరోసారి ఎదురుదెబ్బ తగిలింది. రాజమహేంద్రవరం ఎస్సీ, ఎస్టీ ప్రత్యేక కోర్టు ఆయన దాఖలు చేసిన బెయిల్ పిటిషన్‌ను తిరస్కరించింది. గతంలో బెయిల్‌పై బయటకు వచ్చిన అనంతబాబు సాక్షులను ప్రభావితం చేసేందుకు ప్రయత్నించారన్న ఆరోపణల నేపథ్యంలో ఆయనను పోలీసులు మళ్లీ అరెస్ట్ చేశారు. ప్రస్తుతం జ్యుడీషియల్ కస్టడీలో ఉన్న ఆయనకు తాజాగా కూడా బెయిల్ లభించకపోవడంతో కేసు విచారణ పూర్తయ్యే వరకు జైలులోనే ఉండాల్సిన పరిస్థితి ఏర్పడింది.
కూటమి ప్రభుత్వం ఏర్పడిన తర్వాత 28వసారి సామాజిక భద్రతా పెన్షన్లను పంపిణీ చేస్తున్నామని ఆంధ్రప్రదేశ్ ముఖ్యమంత్రి చంద్రబాబు నాయుడు తెలిపారు. గురువారం నిర్వహించిన ‘పేదల సేవలో’ కార్యక్రమంలో పాల్గొన్న ఆయన ప్రభుత్వం అంటే ప్రజల మధ్య ఉండే వ్యవస్థ అని, పేదలకు సేవ చేయడమే తన బాధ్యత అని పేర్కొన్నారు. ఇప్పటివరకు పెన్షన్ల రూపంలో రూ.76 వేల కోట్లు అందించినట్లు వెల్లడించారు.
బాపట్ల జిల్లా మార్టూరు మండలం కోనంకి గ్రామ శివారులో విషాద ఘటన చోటుచేసుకుంది. పాఠశాల వద్ద ఏర్పడిన పరిచయం తర్వాత సన్నిహితంగా మారిన 22 ఏళ్ల యువకుడు, పదో తరగతి చదువుతున్న 15 ఏళ్ల బాలిక ఇళ్ల నుంచి అదృశ్యమయ్యారు. అనంతరం కోనంకి గ్రామ శివారులోని చెరువులో మృతదేహాలుగా కనిపించడంతో కుటుంబాల్లో విషాదం నెలకొంది.
గుంటూరులో విషాద ఘటన చోటుచేసుకుంది. డయాలసిస్ కోసం కొడుకుతో కలిసి కారులో ఆసుపత్రికి వెళ్లి తిరిగి వస్తున్న సమయంలో అకస్మాత్తుగా కారులో మంటలు చెలరేగాయి. ఈ ఘటనలో వెనుక సీటులో ఉన్న హరికృష్ణ మంటల్లో చిక్కుకుని మృతి చెందారు. కారు నడుపుతున్న ఆయన కుమారుడు అఖిలేష్ స్థానికుల సాయంతో బయటపడి స్వల్ప గాయాలతో తప్పించుకున్నారు.
తిరుమలలో భక్తులను మోసం చేస్తున్న తమిళనాడుకు చెందిన 52 ఏళ్ల మురుగన్ నాగరాజ్ అలియాస్ శంకర్రావును పోలీసులు అరెస్ట్ చేశారు. టీటీడీ ఉద్యోగి, చెన్నై ఎయిర్‌పోర్ట్ ఉద్యోగి పేరుతో నకిలీ గుర్తింపు కార్డులు తయారు చేసుకుని భక్తులను నమ్మించినట్లు పోలీసులు గుర్తించారు. మాంగళ్య పూజ పేరుతో మోసాలకు పాల్పడినట్లు కూడా దర్యాప్తులో వెల్లడైంది.
శ్రీకాకుళం జిల్లా టెక్కలి సమీపంలో ఘోర రైలు ప్రమాదం జరిగింది. రావివలస-బర్మా కాలనీ సమీపంలో రైల్వే ట్రాక్‌పై నడుచుకుంటూ వెళ్తున్న ఐదుగురు ఇంటర్మీడియట్ విద్యార్థులను రాజధానిఎక్స్‌ప్రెస్ ఢీకొట్టింది. ఈ ఘటనలో నలుగురు విద్యార్థులు అక్కడికక్కడే మృతి చెందగా.. మరో విద్యార్థి తీవ్రంగా గాయపడ్డాడు.
యూకేలో ఉద్యోగాలు, వర్క్ వీసాలు ఇప్పిస్తామని నమ్మించి నిరుద్యోగులు, వీసా గడువు ముగియనున్న వారి నుంచి భారీగా నగదు వసూలు చేశారంటూ యూట్యూబర్ నందన, ఆమె భర్త జాగర్లమూడి మధుకర్‌పై పలువురు బాధితులు తెలంగాణ ప్రజావాణిలో ఫిర్యాదు చేశారు. ఒక్కొక్కరి నుంచి రూ.25 లక్షల నుంచి రూ.95 లక్షల వరకు వసూలు చేసినట్లు బాధితులు ఆరోపించారు. తమకు న్యాయం చేయాలని అధికారులను కోరారు.
తిరుమల శ్రీవారి లడ్డూ ప్రసాదంలో కొబ్బరి పీచు ఉన్నట్లు సోషల్ మీడియాలో వైరల్ అవుతున్న ఫొటోపై టీటీడీ స్పందించింది. ఆ ఫొటోలో ఉన్నది శ్రీవారి లడ్డూ ప్రసాదం కాదని స్పష్టం చేసింది. భక్తుల మనోభావాలను దెబ్బతీసేలా తప్పుడు ప్రచారం చేస్తే చట్టపరమైన చర్యలు తీసుకుంటామని హెచ్చరించింది. టీటీడీ ఫిర్యాదుతో పోలీసులు కూడా కేసు నమోదు చేసి దర్యాప్తు ప్రారంభించారు.
అనంతపురం జిల్లాలో ఘోర రోడ్డు ప్రమాదం చోటుచేసుకుంది. బుక్కరాయసముద్రం మండలం రోటరీపురం సమీపంలో అదుపుతప్పిన కారు రోడ్డు పక్కనున్న హోటల్‌లోకి దూసుకెళ్లి బోల్తా పడింది. ఈ ఘటనలో ఇద్దరు యువతులు మృతి చెందగా.. మరో ఇద్దరు యువకులు తీవ్రంగా గాయపడ్డారు. అయితే తమ కుమార్తెలది ప్రమాదంలో జరిగిన మృతి కాదని, యువకులు హత్య చేసి ప్రమాదంగా చిత్రీకరించారని మృతుల కుటుంబ సభ్యులు ఆరోపించడం కలకలం రేపుతోంది.
ఆంధ్రప్రదేశ్ మాజీ డిప్యూటీ సీఎం, టీడీపీ నేత ఆళ్ల కాళీ కృష్ణ శ్రీనివాస్‌ (ఆళ్ల నాని) కన్నుమూశారు. మంగళవారం విశాఖపట్నంలో గుండెపోటుకు గురై తుదిశ్వాస విడిచారు.
మాజీ మంత్రి, వైసీపీ నేత జోగి రమేష్ కుటుంబంపై ఆయన కోడలు మేఘన సంచలన ఆరోపణలు చేశారు. తనకు, తన కుటుంబ సభ్యులకు ప్రాణహాని ఉందంటూ ఏపీ గవర్నర్ అబ్దుల్ నజీర్‌ను కలిసి వినతిపత్రం సమర్పించారు. అదనపు కట్నం కోసం వేధించడంతో పాటు తనను హత్య చేసేందుకు ప్రయత్నించారని ఆరోపించిన మేఘన.. తనకు భద్రత కల్పించాలని, కేసు దర్యాప్తు నిష్పక్షపాతంగా జరిగేలా చర్యలు తీసుకోవాలని కోరారు.
దేశవ్యాప్తంగా రైల్వే మౌలిక వసతుల సామర్థ్యాన్ని పెంచే దిశగా కేంద్ర ప్రభుత్వం కీలక నిర్ణయం తీసుకుంది. తెలంగాణలోని ఘట్‌కేసర్–కాజీపేట సెక్షన్‌లో 110 కిలోమీటర్ల నాలుగో రైల్వే లైన్ నిర్మాణానికి కేంద్ర కేబినెట్ ఆమోదం తెలిపింది. ఈ ప్రాజెక్టు అంచనా వ్యయం రూ.2,419 కోట్లు. అలాగే ఆంధ్రప్రదేశ్ మీదుగా సాగే అరక్కోణం–రేణిగుంట మార్గంలో 3వ, 4వ లైన్ల నిర్మాణానికి కూడా గ్రీన్ సిగ్నల్ లభించింది.
వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ కీలక ప్రకటన చేశారు. వచ్చే ఏడాది సెప్టెంబర్ లేదా అక్టోబర్ నుంచి పాదయాత్ర చేపట్టనున్నట్లు వెల్లడించారు. 2017లో చేపట్టిన ప్రజా సంకల్ప పాదయాత్రకు వచ్చిన స్పందనను మరోసారి అందుకోవాలనే ధీమాను వ్యక్తం చేశారు. చంద్రబాబు పాలన, తమ పాలన మధ్య తేడాను ప్రజలు గమనిస్తున్నారని జగన్ వ్యాఖ్యానించారు.
ఆంధ్రప్రదేశ్ రాజకీయాల్లో కీలక పరిణామం చోటుచేసుకుంది. మాజీ మంత్రి, ఎమ్మెల్సీ ప్రతిపక్ష నేత బొత్స సత్యనారాయణ మేనల్లుడు, విజయనగరం జిల్లా వైసీపీ అధ్యక్షుడు మజ్జి శ్రీనివాసరావు (చిన్న శ్రీను) వైసీపీకి రాజీనామా చేసి టీడీపీలో చేరారు. ముఖ్యమంత్రి, టీడీపీ అధినేత చంద్రబాబు నాయుడు సమక్షంలో ఆయన పసుపు కండువా కప్పుకున్నారు.
లండన్‌లో ఉద్యోగాలు ఇప్పిస్తామని, స్పాన్సర్‌షిప్‌లు ఇప్పిస్తామని పలువురి నుంచి భారీగా డబ్బులు వసూలు చేసినట్లు ఆరోపణలు ఎదుర్కొంటున్న ప్రముఖ యూట్యూబర్ నందనను పోలీసులు అరెస్ట్ చేశారు. శంషాబాద్ రాజీవ్ గాంధీ అంతర్జాతీయ విమానాశ్రయంలో ఆమెను అదుపులోకి తీసుకున్న పోలీసులు.. అనంతరం కృష్ణా జిల్లా ఇబ్రహీంపట్నం పోలీసులకు అప్పగించారు.
విజయవాడలో నిర్వహించిన ఉపాధ్యాయ దినోత్సవ వేడుకల్లో ఏపీ సీఎం చంద్రబాబు నాయుడు కీలక వ్యాఖ్యలు చేశారు. తన చిన్ననాటి రోజుల్లో ఉపాధ్యాయుడి చేతిలో దెబ్బలు తిన్న విషయాన్ని గుర్తుచేసుకున్న ఆయన.. మారుతున్న కాలానికి అనుగుణంగా టీచర్లు కూడా తమ బోధనా విధానాలను మార్చుకోవాలని సూచించారు.
పశ్చిమగోదావరి జిల్లాలో తీవ్ర విషాదం చోటుచేసుకుంది. తణుకుకు చెందిన ఓ కుటుంబం చించినాడ వంతెనపై నుంచి గోదావరిలో దూకి ఆత్మహత్యకు ప్రయత్నించింది. ఈ ఘటనలో మహిళను స్థానిక మత్స్యకారులు రక్షించగా.. ఆమె భర్త, కుమారుడు, కుమార్తె గల్లంతయ్యారు. గజ ఈతగాళ్లు, బోట్ల సాయంతో ముగ్గురి కోసం గాలింపు కొనసాగుతోంది.
ముంబై నటి కాదంబరి జత్వానీ కేసులో కీలక పరిణామం చోటుచేసుకుంది. ఈ వ్యవహారంలో గతంలో సస్పెండ్ అయిన సీనియర్ ఐపీఎస్ అధికారులు కాంతి రాణా టాటా, విశాల్ గున్నీలపై సస్పెన్షన్‌ను ఏపీ ప్రభుత్వం ఎత్తివేసింది. వారిని తక్షణమే తిరిగి సర్వీసులోకి తీసుకుంటూ సాధారణ పరిపాలన శాఖ ఉత్తర్వులు జారీ చేసింది. అయితే సస్పెన్షన్ ఎత్తివేతతో వారిపై కొనసాగుతున్న శాఖాపరమైన చర్యలు, క్రిమినల్ కేసులు ముగిసినట్లు కాదని ప్రభుత్వం స్పష్టం చేసింది.
తిరుమల తిరుపతి దేవస్థానం (TTD) డిప్యూటీ ఎగ్జిక్యూటివ్ ఆఫీసర్ లోకనాథంను అవినీతి నిరోధక శాఖ (ACB) అరెస్ట్ చేసింది. అక్రమ ఆస్తుల కేసులో రెండు రోజుల పాటు నిర్వహించిన సోదాల్లో భారీగా ఆస్తులు, బంగారం, వెండి, నగదు గుర్తించిన అధికారులు.. విచారణ కోసం ఆయనను ఏసీబీ కార్యాలయానికి తరలించారు.
ఆంధ్రప్రదేశ్ మహిళలకు కూటమి ప్రభుత్వం మరో గుడ్ న్యూస్ చెప్పింది. ఇప్పటికే ఆర్టీసీ బస్సుల్లో ఉచిత ప్రయాణ సదుపాయం పొందుతున్న మహిళలకు త్వరలో ఏసీ బస్సుల్లోనూ ఫ్రీ జర్నీ అవకాశం కల్పించనున్నట్లు సీఎం చంద్రబాబు నాయుడు ప్రకటించారు. రాష్ట్రవ్యాప్తంగా ఏసీ బస్సుల సంఖ్యను పెంచి, మహిళలకు ఉచిత ప్రయాణ సౌకర్యాన్ని అందుబాటులోకి తీసుకురానున్నట్లు తెలిపారు.
వైసీపీ మాజీ ఎంపీ విజయసాయిరెడ్డి, ఆ పార్టీ నేత సజ్జల రామకృష్ణారెడ్డిపై టీడీపీ నెల్లూరు రూరల్ ఎమ్మెల్యే కోటంరెడ్డి శ్రీధర్‌రెడ్డి సంచలన వ్యాఖ్యలు చేశారు. మంగళగిరి ప్లీనరీ సమయంలో సజ్జల, విజయసాయిరెడ్డి మధ్య వివాదం జరిగి కొట్టుకున్నది వాస్తవమేనని ఆయన పేర్కొన్నారు. వైసీపీలో విజయసాయికి అనేక అవమానాలు జరిగాయని ఆరోపించారు.
ఆంధ్రప్రదేశ్‌లోని విశాఖపట్నం జిల్లాలో రాఖీ పర్వదినాన తీవ్ర విషాదం చోటుచేసుకుంది. పెందుర్తి మండలం చింతలగ్రహారం కాలనీలో ఓ ఆటో డ్రైవర్ కుటుంబానికి చెందిన నలుగురు మృతి చెందారు. పోలీసులు ప్రాథమికంగా చేసిన దర్యాప్తులో.. వినోద్ కుమార్ తన భార్య, ఇద్దరు పిల్లలకు విషమిచ్చి అనంతరం తానూ ఆత్మహత్య చేసుకున్నట్లు అనుమానిస్తున్నారు. ఈ ఘటనకు అసలు కారణమేంటన్న దానిపై పోలీసులు దర్యాప్తు చేస్తున్నారు.
మాజీ మంత్రి జోగి రమేశ్ కుటుంబంపై ఆయన కోడలు మేఘన సంచలన ఆరోపణలు చేశారు. తన భర్త రాజీవ్ సమస్యలు తెలిసి కూడా తనకు వివాహం జరిపించారని, పెళ్లి తర్వాత అదనపు కట్నం కోసం వేధించారని ఆరోపించారు. ఎఫ్‌ఐఆర్‌లో చేసిన ప్రతి ఆరోపణకు తన వద్ద ఆధారాలు ఉన్నాయని, సమయం వచ్చినప్పుడు వాటిని బయటపెడతానని మేఘన తెలిపారు.
శ్రీశైలంలోని వడ్డెర అన్నదాన సత్రంలో ఒకే కుటుంబానికి చెందిన ఐదుగురు మృతిచెందిన ఘటన తీవ్ర కలకలం రేపింది. మూడు రోజులుగా గది నుంచి ఎవరూ బయటకు రాకపోవడంతో పాటు దుర్వాసన రావడంతో నిర్వాహకులు పోలీసులకు సమాచారం ఇచ్చారు. పోలీసులు తలుపులు తెరిచి చూడగా ముగ్గురు మహిళలు, ఇద్దరు పురుషులు మృతిచెందినట్లు గుర్తించారు. ఆర్థిక ఇబ్బందులే కారణమై ఉండొచ్చని పోలీసులు ప్రాథమికంగా భావిస్తున్నారు.
ఏపీ మద్యం రవాణా కేసులో అరెస్టైన మాజీ మంత్రి, వైసీపీ నేత కారుమూరి నాగేశ్వరరావుకు హైదరాబాద్‌లోని ఈడీ కోర్టు 14 రోజుల జ్యుడీషియల్ రిమాండ్ విధించింది. వైద్య పరీక్షల అనంతరం ఆయనను కోర్టులో హాజరుపరిచారు. విచారణ అనంతరం రిమాండ్ విధించడంతో కారుమూరిని చంచల్‌గూడ జైలుకు తరలించారు.
హైదరాబాద్‌లో చికెన్‌ వ్యర్థాల అక్రమ రవాణా ముఠా గుట్టురట్టయింది. కోళ్ల దుకాణాలు, మాంసం ప్రాసెసింగ్‌ యూనిట్ల నుంచి సేకరించిన వ్యర్థాలను రాత్రివేళల్లో లారీల ద్వారా ఆంధ్రప్రదేశ్‌కు తరలించి చేపల చెరువులకు మేతగా విక్రయిస్తున్నట్లు అధికారులు గుర్తించారు. సైబరాబాద్‌ పోలీసులు, పశువైద్య శాఖ అధికారులు సంయుక్తంగా నిర్వహించిన తనిఖీల్లో దాదాపు 100 టన్నుల చికెన్‌ వ్యర్థాలను సీజ్‌ చేశారు.
కరువు సీమగా పేరొందిన అనంతపురం జిల్లాకు భారీ పెట్టుబడులు తరలివస్తున్నాయి. పవన విద్యుత్ రంగంలో ప్రముఖ సంస్థ సుజ్లాన్ ఆంధ్రప్రదేశ్‌లో తన కార్యకలాపాలను మరింత విస్తరించేందుకు రూ.10 వేల కోట్ల పెట్టుబడులు పెట్టనుంది. రాయదుర్గం నియోజకవర్గంలో చేపట్టనున్న 1,325 మెగావాట్ల విండ్ ప్రాజెక్టులతో ప్రత్యక్షంగా, పరోక్షంగా సుమారు 4 వేల మందికి ఉపాధి.
