తాడేపల్లి, ఆగస్టు 20 (జనవాణి): ఏపీ డీఎస్సీ నియామకాల్లో అవకతవకలు, లీకేజీపై సీబీఐతో దర్యాప్తు చేయించాలని వైఎస్సార్‌సీపీ అధ్యక్షుడు, మాజీ ముఖ్యమంత్రి వైఎస్ జగన్‌మోహన్ రెడ్డి డిమాండ్ చేశారు. డీఎస్సీ వ్యవహారంలో తాము ప్రజల ముందుకు తీసుకొచ్చిన అంశాలు ఒక్కొక్కటిగా వాస్తవమేనని ప్రభుత్వం అంగీకరించే పరిస్థితి వచ్చిందని ఆయన అన్నారు. తాడేపల్లిలోని వైఎస్సార్‌సీపీ కేంద్ర కార్యాలయంలో నిర్వహించిన మీడియా సమావేశంలో జగన్ మాట్లాడారు. ప్రతిపక్షానికి అసెంబ్లీలో ప్రధాన ప్రతిపక్ష హోదా ఇవ్వలేదని, శాసన మండలిలోనూ తమకు మాట్లాడే అవకాశం కల్పించడం లేదని ప్రభుత్వంపై విమర్శలు చేశారు. బౌలింగ్, ఫీల్డింగ్ లేకుండా తండ్రీకొడుకులు బ్యాటింగ్ చేస్తున్నారు అంటూ సీఎం చంద్రబాబు, మంత్రి లోకేశ్‌ను ఉద్దేశించి వ్యాఖ్యానించారు.
ప్రశ్నపత్రాల తయారీ, పరీక్ష నిర్వహణ ఒకే అధికారి చేతిలో ఎందుకు?
డీఎస్సీ ప్రశ్నపత్రాల తయారీ, పరీక్ష నిర్వహణ బాధ్యతలను ఒకే అధికారి చేతిలో పెట్టడం తీవ్ర అనుమానాలకు తావిస్తోందని జగన్ అన్నారు. ప్రశ్నపత్రాల తయారీ బాధ్యత ఎస్‌సీఈఆర్టీ డైరెక్టర్‌కు, పరీక్ష నిర్వహణ బాధ్యత డీఎస్సీ కన్వీనర్‌కు ఉండాల్సి ఉందని పేర్కొన్నారు. ఈ రెండు కీలక బాధ్యతలను ఒకే వ్యక్తికి అప్పగించడం వల్ల చెక్‌ అండ్‌ బ్యాలెన్స్ వ్యవస్థ దెబ్బతిన్నదని, లీకేజీకి మార్గం ఏర్పడిందని ఆరోపించారు. ఒకే అధికారికి రెండు బాధ్యతలు ఎందుకు అప్పగించారో తేల్చేందుకు సీబీఐ దర్యాప్తు అవసరమని అన్నారు.
నవీన్‌కు ఫస్ట్ ర్యాంక్ వచ్చినా ఉద్యోగం ఎందుకు ఇవ్వలేదు?
డీఎస్సీ ప్రశ్నపత్రాల తయారీ విభాగంలో పనిచేసిన అవుట్‌సోర్సింగ్ ఉద్యోగి నవీన్‌కు ఫస్ట్ ర్యాంక్ వచ్చిన విషయాన్ని ప్రభుత్వం అంగీకరించిందని జగన్ పేర్కొన్నారు. అయితే ఫస్ట్ మెరిట్ లిస్టులో పేరు ఉన్న నవీన్‌ను ఆ తర్వాతి జాబితా నుంచి ఎందుకు తొలగించారని ప్రశ్నించారు. సర్టిఫికెట్ల వెరిఫికేషన్‌కు నవీన్ హాజరు కాలేదని ప్రభుత్వం చెబుతోందని, అయితే అతని అభ్యర్థి ఐడీని బ్లాక్ చేసి, కాల్ లెటర్ పంపకపోతే వెరిఫికేషన్‌కు అతను ఎలా హాజరవుతాడని జగన్ ప్రశ్నించారు. ఈ అంశంపై నవీన్ హైకోర్టులో ఆధారాలతో అఫిడవిట్ దాఖలు చేశారని తెలిపారు.
లోకేశ్ రాజీనామా చేయాలి
డీఎస్సీ వ్యవహారానికి బాధ్యత వహిస్తూ మంత్రి నారా లోకేశ్ రాజీనామా చేయాలని జగన్ డిమాండ్ చేశారు. డీఎస్సీ అవకతవకలపై శాసన మండలిలో నాలుగు రోజుల పాటు వైఎస్సార్‌సీపీ ఎమ్మెల్సీలు ఆందోళన చేసినప్పటికీ ప్రభుత్వం చర్చకు ముందుకు రాలేదని ఆరోపించారు. డీఎస్సీ వ్యవహారంలో ప్రభుత్వం సమగ్ర విచారణకు సిద్ధమై, వాస్తవాలను ప్రజల ముందుంచాలని జగన్ డిమాండ్ చేశారు.
