సామాన్య ప్రజలపై పెరుగుతున్న నిత్యావసర వస్తువుల ధరల భారం తగ్గించేందుకు రాష్ట్ర ప్రభుత్వం చేపట్టిన తక్కువ ధర బియ్యం విక్రయాల కార్యక్రమాన్ని ఏపీ ఉప ముఖ్యమంత్రి పవన్ కళ్యాణ్ అభినందించారు. కూటమి ప్రభుత్వం ఎల్లప్పుడూ సామాన్యుడికి అండగా ఉంటుందనే విషయాన్ని ఈ నిర్ణయం మరోసారి నిరూపించిందని ఆయన తెలిపారు.
రూ.50, రూ.52కే బియ్యం
రాష్ట్ర ఆహార, పౌర సరఫరాల శాఖ ఆధ్వర్యంలో బీపీటీ సూపర్ ఫైన్ బియ్యాన్ని కిలో రూ.52కు, గ్రేడ్-1 పచ్చి బియ్యాన్ని (రా రైస్) కిలో రూ.50కు అందుబాటులోకి తీసుకురావడం హర్షణీయమని పవన్ కళ్యాణ్ పేర్కొన్నారు.
ఆగస్టు 1 నుంచి రాష్ట్రవ్యాప్తంగా 130 రైతు బజార్లు, 500 రైస్ మిల్లర్ల ప్రత్యేక కౌంటర్ల ద్వారా ఈ బియ్యం ప్రజలకు అందుబాటులో ఉంటుందని తెలిపారు. ఈ అవకాశాన్ని ప్రజలు వినియోగించుకోవాలని సూచించారు.
నాదెండ్ల మనోహర్ చొరవను ప్రశంసించిన పవన్
ఆహార, పౌర సరఫరాల శాఖ మంత్రి నాదెండ్ల మనోహర్ ప్రత్యేక చొరవతో ఈ నిర్ణయం అమలులోకి వస్తోందని ఉప ముఖ్యమంత్రి తెలిపారు. బహిరంగ మార్కెట్ ధరలను సమీక్షించి, రైస్ మిల్లర్లతో అత్యవసర సమావేశాలు నిర్వహించి ప్రజలకు అందుబాటు ధరలు నిర్ణయించడం అభినందనీయమన్నారు.
సామాన్యుడికి ఆర్థిక భారం తగ్గుతుంది
పెరుగుతున్న బియ్యం ధరల ప్రభావం సామాన్య కుటుంబాలపై పడకుండా ప్రభుత్వం తీసుకున్న ఈ చర్య ప్రజలకు గణనీయమైన ఉపశమనం కలిగిస్తుందని పవన్ కళ్యాణ్ విశ్వాసం వ్యక్తం చేశారు. ప్రజల సంక్షేమమే కూటమి ప్రభుత్వ ప్రధాన లక్ష్యమని, అందుకు అనుగుణంగానే నిర్ణయాలు తీసుకుంటున్నామని పేర్కొన్నారు.
