రాజమహేంద్రవరం,అక్టోబర్ 2 (జనవాణి): డ్రైవర్ సుబ్రహ్మణ్యం హత్య కేసులో వైసీపీ ఎమ్మెల్సీ అనంతబాబుకు రాజమహేంద్రవరం ఎస్సీ, ఎస్టీ ప్రత్యేక కోర్టులో మరోసారి చుక్కెదురైంది. బెయిల్ కోరుతూ ఆయన దాఖలు చేసిన పిటిషన్‌ను కోర్టు తిరస్కరించింది. దీంతో కేసు విచారణ పూర్తయ్యే వరకు అనంతబాబు జ్యుడీషియల్ కస్టడీలోనే కొనసాగాల్సిన పరిస్థితి ఏర్పడింది.
బెయిల్‌పై బయటకు వచ్చి.. మళ్లీ అరెస్ట్
సుబ్రహ్మణ్యం హత్య కేసులో అనంతబాబుకు గతంలో సుప్రీంకోర్టు బెయిల్ మంజూరు చేసింది. దీంతో ఆయన జైలు నుంచి విడుదలయ్యారు. అయితే అనంతరం కేసులోని కీలక సాక్షులను ప్రభావితం చేసేందుకు ప్రయత్నించారనే ఆరోపణలు తెరపైకి వచ్చాయి. సాక్షులను బెదిరించడం, ప్రలోభాలకు గురిచేయడం వంటి ఆరోపణలపై పోలీసులు మరో కేసు నమోదు చేసి అనంతబాబును అరెస్ట్ చేశారు. అనంతబాబు బెయిల్ నిబంధనలను ఉల్లంఘించారనే అంశాన్ని పరిగణనలోకి తీసుకున్న ప్రత్యేక కోర్టు గతంలో ఆయన బెయిల్‌ను రద్దు చేసింది. అప్పటి నుంచి ఆయన రాజమహేంద్రవరం సెంట్రల్ జైలులో జ్యుడీషియల్ కస్టడీలో ఉన్నారు.
సాక్షులను బెదిరించారన్న ఆరోపణలు
కేసులోని నలుగురు కీలక సాక్షులు అనంతబాబుపై పోలీసులకు ఫిర్యాదు చేసినట్లు తెలుస్తోంది. తమ వాంగ్మూలాలను మార్చుకునేందుకు భారీ మొత్తంలో డబ్బు ఆఫర్ చేశారని, అంగీకరించకపోవడంతో బెదిరింపులకు పాల్పడ్డారని వారు ఆరోపించారు. తమను ఒక అపార్ట్‌మెంట్‌లో ఉంచి పాత వాంగ్మూలాలను ఉపసంహరించుకోవాలని, విచారణ సమయంలో తప్పుడు సాక్ష్యం చెప్పాలని ఒత్తిడి తెచ్చారని ఫిర్యాదులో పేర్కొన్నట్లు సమాచారం. ఈ ఆరోపణల నేపథ్యంలో పోలీసులు సాక్షులను ప్రభావితం చేయడం, నేరపూరిత బెదిరింపులకు పాల్పడటం వంటి అంశాలపై కేసు నమోదు చేసి దర్యాప్తు చేపట్టారు.
ఏప్రిల్ 25 నుంచి జ్యుడీషియల్ కస్టడీలో
ఈ కేసు దర్యాప్తులో భాగంగా పోలీసులు అనంతబాబు కోసం గాలింపు చేపట్టారు. ఆయన నివాసంతో పాటు పలు ప్రాంతాల్లో తనిఖీలు నిర్వహించారు. అనంతరం రాజమహేంద్రవరం ప్రత్యేక కోర్టు వద్ద విచారణకు హాజరైన అనంతబాబును పోలీసులు అదుపులోకి తీసుకున్నారు. సర్పవరం పోలీస్ స్టేషన్‌కు తరలించి విచారించిన తర్వాత వైద్య పరీక్షలు నిర్వహించి కోర్టులో హాజరుపరిచారు. కోర్టు రిమాండ్ విధించడంతో ఏప్రిల్ 25 నుంచి అనంతబాబు రాజమహేంద్రవరం సెంట్రల్ జైలులో ఉన్నారు. తాజాగా దాఖలు చేసిన బెయిల్ పిటిషన్ కూడా తిరస్కరణకు గురవడంతో ఆయనకు మరోసారి నిరాశ ఎదురైంది.
దర్యాప్తులో కీలక ఎలక్ట్రానిక్ ఆధారాలు
సుబ్రహ్మణ్యం హత్య కేసు దర్యాప్తులో సీసీటీవీ ఫుటేజ్ సహా పలు ఎలక్ట్రానిక్ ఆధారాలు కీలకంగా మారాయి. ఈ ఆధారాలను విచారణలో స్వీకరించేందుకు ప్రాసిక్యూషన్‌కు ప్రత్యేక కోర్టు అనుమతి ఇచ్చినట్లు తెలుస్తోంది.
అనంతబాబు భార్య లక్ష్మీదుర్గ విచారణ
ఇదే కేసులో అనంతబాబు భార్య లక్ష్మీదుర్గను కూడా సిట్ అధికారులు విచారించారు. కోర్టు ఆదేశాల మేరకు ఆమె సిట్ ఎదుట హాజరై విచారణకు సహకరించాల్సి వచ్చింది. గతంలో హత్య జరిగిన సమయంలో తాను ఘటనాస్థలిలో లేనని, బంధువులను పరామర్శించేందుకు ఆసుపత్రికి వెళ్లినట్లు ఆమె వాంగ్మూలం ఇచ్చినట్లు సమాచారం. అయితే సీసీటీవీ ఫుటేజ్ సహా సాంకేతిక ఆధారాలను పరిశీలించిన దర్యాప్తు అధికారులు ఆమె వాంగ్మూలంపై అభ్యంతరాలు వ్యక్తం చేసినట్లు తెలుస్తోంది. హత్య జరిగిన సమయంలో అనంతబాబుతో ఆమె ఉన్నట్లు, మృతదేహాన్ని తరలించే సమయంలోనూ ఆమె పాత్ర ఉన్నట్లు పోలీసులు ఆరోపిస్తున్నారు. ఈ నేపథ్యంలో ఆమెను కూడా నిందితురాలిగా పేర్కొంటూ అనుబంధ ఛార్జిషీట్ దాఖలు చేసినట్లు సమాచారం. తాజాగా అనంతబాబు బెయిల్ పిటిషన్‌ను ప్రత్యేక కోర్టు తిరస్కరించడంతో, డ్రైవర్ సుబ్రహ్మణ్యం హత్య కేసు విచారణలో మరో కీలక పరిణామం చోటుచేసుకుంది.
