మయన్మార్‌లో అంతర్యుద్ధం మరోసారి విషాదాన్ని మిగిల్చింది. సగాయింగ్ ప్రాంతంలోని మ్యాంగ్ టౌన్‌షిప్‌లో ఉన్న 'స్వెల్ లే ఓ' గ్రామంలోని బౌద్ధ మఠంపై వైమానిక దాడి జరిగింది. ఈ ఘటనలో ధ్యాన శిబిరంలో పాల్గొంటున్న 14 మంది ప్రాణాలు కోల్పోగా.. మరో 20 మంది గాయపడ్డారు. మృతుల్లో ముగ్గురు మహిళలు ఉన్నారు. మాండలేకు పశ్చిమాన సుమారు 75 కిలోమీటర్ల దూరంలో ఈ గ్రామం ఉంది. మ్యాంగ్ టౌన్‌షిప్ సివిల్ డిఫెన్స్ అండ్ సెక్యూరిటీ ఆర్గనైజేషన్ ప్రతినిధి న్వే ఊ తెలిపిన వివరాల ప్రకారం.. ఓ యుద్ధ విమానం బౌద్ధ మఠం ఆవరణలో బాంబు వేసింది.
ఓ స్థానికుడు ప్రెస్‌తో మాట్లాడుతూ.. సుమారు 15 నిమిషాల వ్యవధిలో యుద్ధ విమానం రెండు బాంబులు వేసిందని తెలిపారు. రెండో బాంబు మఠానికి సమీపంలోని ఓ ఇంటిని ధ్వంసం చేసినట్లు చెప్పారు. బౌద్ధ దీక్షా కాలంలో భాగంగా నిర్వహిస్తున్న వారం రోజుల ధ్యాన శిబిరంలో 100 మందికి పైగా పాల్గొంటున్నారని వెల్లడించారు. ఈ దాడిలో తన అత్త మరణించినట్లు పేర్కొన్నారు.
దాడి అనంతరం మృతదేహాలకు అంత్యక్రియలు నిర్వహించిన తర్వాత గ్రామస్థులు సురక్షిత ప్రాంతాలకు తరలివెళ్లినట్లు సమాచారం. ఈ ఘటనపై మయన్మార్ సైన్యం తక్షణం స్పందించలేదు. గతంలో తాము యుద్ధంలో చట్టబద్ధమైన లక్ష్యాలపైనే దాడులు చేస్తున్నామని సైన్యం పేర్కొంది.
కొనసాగుతున్న అంతర్యుద్ధం
2021 ఫిబ్రవరిలో ఆంగ్ సాన్ సూకీ నేతృత్వంలోని ఎన్నికైన ప్రభుత్వాన్ని తొలగించి మయన్మార్ సైన్యం అధికారాన్ని చేపట్టింది. ఆ తర్వాత దేశవ్యాప్తంగా సైనిక పాలనకు వ్యతిరేకంగా నిరసనలు, సాయుధ పోరాటాలు తీవ్రతరమయ్యాయి. ప్రస్తుతం సగాయింగ్ సహా దేశంలోని అనేక ప్రాంతాల్లో సైన్యం, ప్రజాస్వామ్య అనుకూల సాయుధ దళాలు, జాతి సాయుధ సమూహాల మధ్య ఘర్షణలు కొనసాగుతున్నాయి. ప్రతిఘటన దళాలకు సమర్థవంతమైన వైమానిక రక్షణ వ్యవస్థలు లేకపోవడంతో సైనిక వైమానిక దాడులు తీవ్ర నష్టాన్ని కలిగిస్తున్నాయి. ఎన్నికలకు ముందు నెలల్లో మయన్మార్ సైన్యం వైమానిక దాడులు గణనీయంగా పెరిగాయని, అనంతరం కూడా అవి కొనసాగుతున్నాయని ఐక్యరాజ్యసమితికి చెందిన మయన్మార్ స్వతంత్ర దర్యాప్తు యంత్రాంగం (IIMM) ఇటీవల వెల్లడించింది.
