హైదరాబాద్, ఆగస్టు 30 (జనవాణి): హైదరాబాద్ నగరానికి మరో ప్రతిష్ఠాత్మక క్రీడా వేదిక అందుబాటులోకి రానున్నట్లు తెలుస్తోంది. తెలంగాణ ప్రభుత్వం అభివృద్ధి చేస్తున్న భారత్ ఫ్యూచర్ సిటీలో అంతర్జాతీయ ప్రమాణాలతో భారీ క్రికెట్ స్టేడియం నిర్మించేందుకు ప్రతిపాదనలు సిద్ధమవుతున్నట్లు సమాచారం. ఈ ఏడాది డిసెంబరులో స్టేడియానికి శంకుస్థాపన చేసే అవకాశం ఉన్నట్లు తెలుస్తోంది.
అహ్మదాబాద్‌ను మించేలా..
గుజరాత్‌లోని అహ్మదాబాద్‌లో ఉన్న నరేంద్ర మోదీ స్టేడియం ప్రస్తుతం సుమారు 1.32 లక్షల ప్రేక్షకుల సీటింగ్‌ సామర్థ్యంతో ప్రపంచంలోనే అతిపెద్ద క్రికెట్ స్టేడియంగా గుర్తింపు పొందుతోంది. దీనిని మించే సీటింగ్‌ సామర్థ్యంతో హైదరాబాద్ స్టేడియాన్ని నిర్మించే ప్రతిపాదన ఉన్నట్లు సమాచారం. ప్రపంచ స్థాయి డిజైన్‌, అత్యాధునిక సౌకర్యాలు, ప్రేక్షకులకు మెరుగైన వసతులు, అంతర్జాతీయ ప్రమాణాల మౌలిక వసతులతో ఈ స్టేడియాన్ని అభివృద్ధి చేయాలని భావిస్తున్నట్లు తెలుస్తోంది. లార్డ్స్‌, ఆస్ట్రేలియాలోని ప్రముఖ క్రికెట్ వేదికల తరహాలో ప్రత్యేక డిజైన్‌తో నిర్మించే ఆలోచన ఉన్నట్లు సమాచారం.
క్రికెట్‌కే పరిమితం కాదు..
ప్రతిపాదిత స్టేడియాన్ని కేవలం క్రికెట్ మ్యాచ్‌లకే పరిమితం చేయకుండా.. అంతర్జాతీయ క్రీడా ఈవెంట్లు, వినోద కార్యక్రమాలు నిర్వహించుకునేలా తీర్చిదిద్దాలని యోచిస్తున్నట్లు తెలుస్తోంది. ఫ్యూచర్ సిటీలో ప్రతిపాదిస్తున్న స్పోర్ట్స్‌ సిటీకి ఈ స్టేడియం ప్రధాన ఆకర్షణగా మారే అవకాశం ఉంది. స్టేడియం నిర్మాణం, నిర్వహణకు బీసీసీఐ నిధులు సమకూర్చడం, అవసరమైన భూమిని తెలంగాణ ప్రభుత్వం కేటాయించడం వంటి ప్రతిపాదనలు ఉన్నట్లు సమాచారం. ప్రాజెక్టు అభివృద్ధి, నిర్వహణలో రాష్ట్ర ప్రభుత్వం–బీసీసీఐ సంయుక్త భాగస్వామ్యంపై చర్చలు జరుగుతున్నట్లు తెలుస్తోంది.
ఫ్యూచర్ సిటీలోనే ఎందుకు?
భారీ స్టేడియానికి ఫ్యూచర్ సిటీని ఎంచుకోవడానికి ప్రధాన కారణం కనెక్టివిటీ. ఓఆర్‌ఆర్‌, ప్రతిపాదిత ఆర్‌ఆర్‌ఆర్‌, రాజీవ్‌ గాంధీ అంతర్జాతీయ విమానాశ్రయం, భవిష్యత్‌ మెట్రో విస్తరణతో ఈ ప్రాంతానికి రవాణా సదుపాయాలు మరింత మెరుగుపడనున్నాయి. దీంతో దేశ, విదేశాల నుంచి వచ్చే క్రికెట్ అభిమానులకు ప్రయాణం సులభతరం కానుంది. స్పోర్ట్స్‌ సిటీ, పర్యాటక అభివృద్ధి, నెట్‌-జీరో సిటీ లక్ష్యాల్లో భాగంగా ఈ స్టేడియం కీలక ప్రాజెక్టుగా మారే అవకాశం ఉంది. ప్రస్తుతం హైదరాబాద్‌లోని ఉప్పల్‌ స్టేడియం అంతర్జాతీయ క్రికెట్ మ్యాచ్‌లకు ప్రధాన వేదికగా ఉంది. ఫ్యూచర్ సిటీలో ప్రతిపాదిత స్టేడియం కార్యరూపం దాల్చితే హైదరాబాద్ అంతర్జాతీయ క్రికెట్ మ్యాప్‌లో మరింత కీలక స్థానాన్ని సంపాదించే అవకాశం ఉంది. అయితే, స్టేడియం నిర్మాణం, సీటింగ్‌ సామర్థ్యం, శంకుస్థాపన తేదీ వంటి అంశాలపై అధికారిక ప్రకటన వెలువడాల్సి ఉంది.
