ఏడు నెలల గర్భిణికి వాగు దాటే అవస్థ.. కొమురం భీం జిల్లాలో కలచివేసే ఘటన

కొమురంభీం ఆదిలాబాద్ జిల్లా,ఆగస్టు 14 (జనవాణి): కొమురం భీం జిల్లా కెరమెరి మండలంలో చోటుచేసుకున్న ఓ ఘటన ఆదివాసీ ప్రాంతాల్లో నెలకొన్న మౌలిక వసతుల దుస్థితిని కళ్లకు కట్టింది. ఏడు నెలల గర్భిణి కొడప రామేశ్వరికి కడుపునొప్పి రావడంతో కుటుంబ సభ్యులు ఆమెను ఆస్పత్రికి తరలించేందుకు తీవ్రంగా ఇబ్బందులు పడ్డారు.

అత్యవసర పరిస్థితుల్లో ఆస్పత్రికి వెళ్లేందుకు సరైన రహదారి లేకపోవడంతో.. ఉధృతంగా ప్రవహిస్తున్న పెద్దవాగును స్ట్రెచర్‌పై దాటించాల్సి వచ్చింది. ఇద్దరు వ్యక్తులు గర్భిణిని స్ట్రెచర్‌పై మోసుకుంటూ వాగును దాటించి ఆస్పత్రికి తరలించారు. వర్షాకాలంలో వాగులు, వంకలు పొంగిపొర్లుతున్న సమయంలో ఏజెన్సీ ప్రాంతాల ప్రజలకు వైద్య సేవలు అందుకోవడం సవాలుగా మారుతోంది. విద్య, వైద్యం, తాగునీరు, రహదారులు వంటి కనీస సౌకర్యాలు అందుబాటులో లేకపోవడంతో అత్యవసర పరిస్థితుల్లో ప్రజలు ప్రాణాలను పణంగా పెట్టాల్సిన పరిస్థితి ఏర్పడుతోంది. సాంకేతికంగా, ఆర్థికంగా అభివృద్ధి చెందుతున్న కాలంలోనూ ఆదివాసీ ప్రాంతాల్లో గర్భిణిని స్ట్రెచర్‌పై వాగు దాటించాల్సి రావడం ఆందోళన కలిగిస్తోంది. అత్యవసర వైద్య సేవలు అందేలా రహదారులు, వంతెనలు, రవాణా సౌకర్యాలను మెరుగుపరచాల్సిన అవసరాన్ని ఈ ఘటన మరోసారి స్పష్టం చేసింది.

Loading Tweet...