హైదరాబాద్, అక్టోబర్ 3 (జనవాణి): కేంద్ర ఎన్నికల సంఘం చేపట్టిన స్పెషల్ ఇంటెన్సివ్ రివిజన్ (SIR) ప్రక్రియపై తీవ్ర అనుమానాలు ఉన్నాయని టీపీసీసీ అధ్యక్షుడు మహేశ్ కుమార్ గౌడ్ అన్నారు. అర్హత కలిగిన ఓటర్ల పేర్లను తొలగిస్తున్నారని ఆరోపిస్తూ ప్రధాన ఎన్నికల కమిషనర్ జ్ఞానేశ్ కుమార్‌పై చర్యలు తీసుకోవాలని డిమాండ్ చేశారు. SIRకు సంబంధించిన నిర్ణయాలపై ఎన్నికల సంఘం పారదర్శకత పాటించాలని కాంగ్రెస్ ఇప్పటికే డిమాండ్ చేస్తోంది.
గాంధీ భవన్‌లో ఇండియా కూటమి పార్టీల నేతలతో సమావేశమైన మహేశ్ కుమార్ గౌడ్.. తదుపరి కార్యాచరణను ప్రకటించారు. కూటమి పార్టీలన్నీ కలిసి అక్టోబర్ 6న జిల్లా కేంద్రాల్లో ర్యాలీలు నిర్వహించి, కలెక్టర్లను నిర్బంధించే కార్యక్రమం చేపడతామని తెలిపారు. అలాగే అక్టోబర్ 8న లోక్‌భవన్ ముట్టడి, నవంబర్ 1న ఛలో ఢిల్లీ కార్యక్రమాన్ని నిర్వహిస్తామని వెల్లడించారు.
SIR పేరుతో నిజమైన ఓట్లను తొలగిస్తున్నారని మహేశ్ కుమార్ గౌడ్ ఆరోపించారు. కేంద్ర ప్రభుత్వం రాజ్యాంగానికి వ్యతిరేకంగా వ్యవహరిస్తోందని, ఎన్నికల సంఘాన్ని కేంద్రంలోని బీజేపీ ప్రభుత్వం ప్రభావితం చేస్తోందని విమర్శించారు. బీజేపీ దర్యాప్తు సంస్థలను కూడా రాజకీయ ప్రయోజనాల కోసం ఉపయోగిస్తోందని ఆరోపించారు.
బెంగాల్‌లో మమతా బెనర్జీ ఓటమికి SIR ప్రక్రియే కారణమని కూడా ఆయన వ్యాఖ్యానించారు. ఎన్నికల సంఘం వ్యవహారశైలిపై ఇండియా కూటమి తీవ్రంగా ఖండిస్తోందని చెప్పారు. జ్ఞానేశ్ కుమార్‌ను పదవి నుంచి తొలగించడం మాత్రమే కాకుండా, ఆయనపై కేసులు నమోదు చేసి అరెస్టు చేయాలని డిమాండ్ చేశారు. ఇదిలా ఉండగా, తెలంగాణ కాంగ్రెస్ ఇటీవల హైదరాబాద్‌లో SIRపై నిరసన ర్యాలీ నిర్వహించి, జ్ఞానేశ్ కుమార్ రాజీనామా చేయాలని డిమాండ్ చేసింది. ఎన్నికల జాబితాల సవరణలో పారదర్శకత, ఓట్ల తొలగింపుపై స్పష్టమైన వివరాలు వెల్లడించాలని కోరింది.
