నిజామాబాద్ పోలీస్ కమిషనరేట్ పరిధిలో శాంతిభద్రతలు, ప్రజా భద్రత దృష్ట్యా పలు కీలక ఆంక్షలు అమల్లోకి వచ్చాయి. విగ్రహాల ఏర్పాటు నుంచి డీజేల వినియోగం వరకు, సభలు, ఊరేగింపుల నుంచి డ్రోన్ల వాడకం వరకు మొత్తం ఎనిమిది అంశాల్లో ప్రజలు తప్పనిసరిగా నిబంధనలు పాటించాలని పోలీస్ కమిషనర్ పి.సాయి చైతన్య స్పష్టం చేశారు. ఈ ఉత్తర్వులు ఆగస్టు 1 నుంచి 15 వరకు అమల్లో ఉంటాయని వెల్లడించారు. నిబంధనలు ఉల్లంఘించిన వారిపై సంబంధిత చట్టాల ప్రకారం చర్యలు తీసుకుంటామని హెచ్చరించారు.
అనుమతి లేకుండా విగ్రహాలు ఏర్పాటు చేయొద్దు
ప్రజలకు ఇబ్బంది కలిగించే ప్రాంతాల్లో విగ్రహాలను ప్రతిష్ఠించరాదని పోలీసులు స్పష్టం చేశారు. ముఖ్యంగా జనసంచారం ఎక్కువగా ఉండే ప్రాంతాలు, పార్కులు, ఐలాండ్లు, ప్రభుత్వ భవనాల వద్ద విగ్రహాల ఏర్పాటుకు అనుమతి లేదని తెలిపారు.
విగ్రహాలను ఏర్పాటు చేయాలనుకునే వారు జిల్లా కలెక్టర్ ఆధ్వర్యంలోని కమిటీ నుంచి తప్పనిసరిగా అనుమతి పొందాలని సూచించారు.
రాత్రి 10 దాటితే డీజేలకు నో
శబ్ద కాలుష్య నియంత్రణపై పోలీసులు ప్రత్యేక దృష్టి పెట్టారు. అధిక శబ్దంతో డీజేలు ఏర్పాటు చేయడం వల్ల వృద్ధులు, చిన్నపిల్లలు, మహిళలు, దీర్ఘకాలిక అనారోగ్య సమస్యలతో బాధపడుతున్న వారికి ఇబ్బందులు ఎదురయ్యే అవకాశం ఉందని పేర్కొన్నారు.
రాత్రి 10 గంటల నుంచి ఉదయం 6 గంటల వరకు డీజే సౌండ్ సిస్టమ్‌ల వినియోగాన్ని పూర్తిగా నిషేధించినట్లు తెలిపారు. సౌండ్ సిస్టమ్‌ల వినియోగానికి పోలీసుల అనుమతి తప్పనిసరి అని పేర్కొన్నారు.
సభలు, ఊరేగింపులకు ఈ రూల్స్ తప్పనిసరి
ఊరేగింపులు, బహిరంగ సభల్లో పరిమితికి మించి శబ్దం వచ్చే డీజేలు, సౌండ్ సిస్టమ్‌ల వినియోగాన్ని నిజామాబాద్ కమిషనరేట్ పరిధిలో నిషేధించారు.
జనసంచారం ఉండే ప్రాంతాల్లో సభలు, సమావేశాలు నిర్వహించడంతో పాటు లౌడ్‌స్పీకర్లు ఏర్పాటు చేయాలంటే సంబంధిత అధికారుల నుంచి ముందస్తు అనుమతి తీసుకోవాలి.
500 మంది వరకు పాల్గొనే సభలు, సమావేశాలకు సంబంధిత అసిస్టెంట్ పోలీస్ కమిషనర్ అనుమతి తప్పనిసరి. 500 మందికి మించి పాల్గొనే కార్యక్రమాలకు కనీసం 72 గంటల ముందుగానే పోలీస్ కమిషనర్ అనుమతి తీసుకోవాలని సూచించారు.
మాల్స్, థియేటర్లు, హోటళ్లలో క్యూ తప్పనిసరి
మాల్స్, సినిమా థియేటర్లు, హోటళ్లు, ఎగ్జిబిషన్లు, వ్యాపార ప్రదేశాల్లో ప్రజల భద్రతకు సంబంధించిన నిబంధనలను తప్పనిసరిగా పాటించాలని పోలీసులు ఆదేశించారు. రద్దీని నియంత్రించేందుకు క్యూ పద్ధతిని అమలు చేయాలని స్పష్టం చేశారు.
డ్రోన్లు ఎగరేయాలంటే క్లియరెన్స్ ఉండాల్సిందే
డ్రోన్ల వినియోగంపైనా ఆంక్షలు విధించారు. అనుమతి లేకుండా డ్రోన్లను వినియోగించడం వల్ల ప్రజా జీవనానికి, శాంతిభద్రతలకు విఘాతం కలిగే అవకాశం ఉందని పోలీసులు పేర్కొన్నారు.
ప్రజా ప్రయోజనాల కోసం డ్రోన్లను వినియోగించాల్సి వస్తే సంబంధిత ప్రభుత్వ సంస్థలతో పాటు పోలీసు, ఏవియేషన్ అధికారుల నుంచి ముందస్తు క్లియరెన్స్ తీసుకోవాలని సూచించారు.
నకిలీ గల్ఫ్ ఏజెంట్లతో జాగ్రత్త
ఉపాధి అవకాశాలు కల్పిస్తామంటూ పాస్‌పోర్టు, వీసా, రవాణా, టూరిస్ట్ సేవల పేరుతో కొందరు అనధికారిక గల్ఫ్ ఏజెంట్లు ప్రజలను మోసం చేస్తున్నట్లు పోలీసులు హెచ్చరించారు.
ఇలాంటి వ్యక్తులకు ఇళ్లు అద్దెకు ఇచ్చే ముందు వారి వివరాలను పూర్తిగా తెలుసుకోవాలని సూచించారు. అనుమానాస్పద వ్యక్తులు అద్దెకు వస్తే సమీప పోలీస్ స్టేషన్‌కు సమాచారం అందించాలని కోరారు.
‘A’ సర్టిఫికెట్ సినిమాలకు మైనర్లను అనుమతించొద్దు
‘A’ సర్టిఫికెట్ పొందిన సినిమాలను మైనర్లు వీక్షించకుండా థియేటర్ యాజమాన్యాలు చర్యలు తీసుకోవాలని పోలీసులు ఆదేశించారు. నిబంధనలకు విరుద్ధంగా మైనర్లను అనుమతించరాదని స్పష్టం చేశారు.
బహిరంగంగా మద్యం తాగితే చర్యలు
రోడ్లు, ఇతర బహిరంగ ప్రదేశాల్లో మద్యం సేవించడాన్ని నిషేధిస్తూ ఆదేశాలు జారీ చేశారు. బహిరంగ మద్యపానం కారణంగా సాధారణ ప్రజలకు, ముఖ్యంగా మహిళలు, చిన్నారులకు ఇబ్బందులు ఎదురవుతున్నట్లు తమ దృష్టికి వచ్చిందని పోలీసులు పేర్కొన్నారు. ప్రజా ప్రశాంతతకు భంగం కలగకుండా ఈ నిర్ణయం తీసుకున్నట్లు తెలిపారు.
ఆగస్టు 15 వరకు అమల్లో..
ఈ నిబంధనలు ఆగస్టు 1 నుంచి ఆగస్టు 15 వరకు నిజామాబాద్ పోలీస్ కమిషనరేట్ పరిధిలో అమల్లో ఉంటాయి. నిజామాబాద్, ఆర్మూర్, బోధన్ డివిజన్ల పరిధిలో నిబంధనలను ఉల్లంఘించే వారిపై సంబంధిత చట్టాల ప్రకారం చర్యలు తీసుకోవాలని పోలీస్ స్టేషన్ల ఎస్‌హెచ్‌వోలు, ఎస్‌ఐలకు పోలీస్ కమిషనర్ పి.సాయి చైతన్య ఉత్తర్వులు జారీ చేశారు.
ప్రజలు నిబంధనలను పాటిస్తూ పోలీసు అధికారులకు సహకరించాలని కమిషనరేట్ విజ్ఞప్తి చేసింది.
