హైదరాబాద్, సెప్టెంబర్ 7 (జనవాణి): ప్రముఖ యూట్యూబర్ నందనను పోలీసులు అరెస్ట్ చేశారు. సోమవారం శంషాబాద్‌లోని రాజీవ్ గాంధీ అంతర్జాతీయ విమానాశ్రయానికి వచ్చిన ఆమెను పోలీసులు అదుపులోకి తీసుకున్నారు. నందనపై ఇప్పటికే లుకౌట్ నోటీసులు జారీ కావడంతో.. ఇమ్మిగ్రేషన్ అధికారులు ఆమెను గుర్తించి ఎయిర్‌పోర్టు పోలీసులకు సమాచారం అందించారు. నందనపై లండన్‌లో ఉద్యోగాలు ఇప్పిస్తామని, స్పాన్సర్‌షిప్‌లు ఇప్పిస్తామని పలువురి నుంచి లక్షల రూపాయలు వసూలు చేసినట్లు ఆరోపణలు ఉన్నాయి. ఈ వ్యవహారంపై బాధితుల ఫిర్యాదుతో ఏపీలోని కృష్ణా జిల్లా ఇబ్రహీంపట్నం పోలీసులు కేసు నమోదు చేసి దర్యాప్తు చేస్తున్నారు.
ఇబ్రహీంపట్నం పోలీసులకు అప్పగింత
ఈ కేసు దర్యాప్తులో భాగంగా నందనపై లుకౌట్ నోటీసులు జారీ చేసినట్లు తెలుస్తోంది. ఈ క్రమంలో ఆమె శంషాబాద్ విమానాశ్రయానికి చేరుకోగా.. పెండింగ్‌లో ఉన్న లుకౌట్ నోటీసుల ఆధారంగా అధికారులు ఆమెను గుర్తించారు. అనంతరం ఎయిర్‌పోర్టు పోలీసులు ఆమెను అదుపులోకి తీసుకుని ఇబ్రహీంపట్నం పోలీసులకు సమాచారం అందించారు.
ఇబ్రహీంపట్నం పోలీసులు విమానాశ్రయానికి చేరుకుని నందనను తమ అదుపులోకి తీసుకున్నారు. నందనతో పాటు ఆమె భర్త కూడా పలువురి నుంచి పెద్ద మొత్తంలో డబ్బులు వసూలు చేసినట్లు ఆరోపణలు ఉన్నాయని పోలీసులు దర్యాప్తు చేస్తున్నారు.
ఈ కేసులో నందనపై వచ్చిన ఆరోపణలు, డబ్బుల వసూళ్లకు సంబంధించిన వివరాలపై పోలీసులు విచారణ కొనసాగిస్తున్నారు. ఈ ఘటనకు సంబంధించి మరిన్ని వివరాలు తెలియాల్సి ఉంది.
