శ్రీశైలం,సెప్టెంబర్ 21 (జనవాణి): శ్రీశైలం ఘాట్‌రోడ్డుపై ఘోర రోడ్డు ప్రమాదం చోటుచేసుకుంది. శ్రీశైలం భ్రమరాంబ మల్లికార్జున స్వామివారి దర్శనం అనంతరం హైదరాబాద్‌ వైపు తిరిగి వెళ్తున్న ప్రయాణికుల వాహనం ప్రమాదానికి గురైంది. ఈ ఘటన నాగర్‌కర్నూలు జిల్లా అమ్రాబాద్‌ మండలం బ్రహ్మగిరి గ్రామం ఆక్టోపస్‌ సమీపంలో చోటుచేసుకుంది.
ప్రయాణికులతో వెళ్తున్న క్లూజర్‌ వాహనం ఘాట్‌రోడ్డులో ఒక్కసారిగా అదుపుతప్పి రోడ్డు పక్కనే ఉన్న చెట్టును బలంగా ఢీకొట్టినట్లు సమాచారం. ప్రమాద తీవ్రతకు వాహనం తీవ్రంగా దెబ్బతింది. ఈ ఘటనలో ఇద్దరు ప్రయాణికులు సంఘటనా స్థలంలోనే మృతి చెందినట్లు తెలుస్తోంది. మరికొందరికి తీవ్ర గాయాలు కాగా.. వారి పరిస్థితి విషమంగా ఉన్నట్లు సమాచారం.
ప్రమాదాన్ని గమనించిన అటవీశాఖ సిబ్బంది, ఇతర యాత్రికులు వెంటనే స్పందించారు. గాయపడిన వారిని వాహనాల నుంచి బయటకు తీసి చికిత్స కోసం ఆస్పత్రికి తరలించారు. మృతులు, క్షతగాత్రులు మధ్యప్రదేశ్‌కు చెందిన వారిగా ప్రాథమికంగా తెలుస్తోంది. శ్రీశైలంలో దైవదర్శనం పూర్తి చేసుకుని తిరిగి హైదరాబాద్‌ వెళ్తున్న సమయంలో ఈ ప్రమాదం జరిగినట్లు సమాచారం.
ఘాట్‌రోడ్డులో వాహనం అదుపుతప్పడానికి అసలు కారణం ఏమిటన్నది ఇంకా స్పష్టంగా తెలియరాలేదు. ఘటనపై పోలీసులు, అటవీశాఖ అధికారులు వివరాలు సేకరిస్తున్నారు. పూర్తి వివరాలు అధికారిక దర్యాప్తు అనంతరం వెల్లడయ్యే అవకాశం ఉంది.
