హైదరాబాద్, సెప్టెంబర్ 10 (జనవాణి): కనీస వేతనాల చెల్లింపులో తెలంగాణ రాష్ట్రం దేశానికే ఆదర్శంగా నిలిచిందని కార్మిక శాఖ మంత్రి వివేక్ వెంకటస్వామి తెలిపారు. సింగరేణి సంస్థలో పనిచేస్తున్న కాంట్రాక్ట్ కార్మికుల వేతనాలను పెంచే అంశాన్ని ప్రభుత్వం పరిశీలిస్తోందని చెప్పారు.
గురువారం తెలంగాణ అసెంబ్లీలో సభ్యులు అడిగిన ప్రశ్నలకు మంత్రి సమాధానం ఇచ్చారు. కాంట్రాక్ట్ కార్మికుల వేతనాల పెంపుపై ప్రభుత్వం సానుకూలంగా ఆలోచిస్తోందని స్పష్టం చేశారు. ఇదే సమయంలో ఔట్‌సోర్సింగ్ ఉద్యోగుల సమస్యలపై ఇప్పటికే ప్రభుత్వం కమిటీని ఏర్పాటు చేసిందని మంత్రి గుర్తు చేశారు. నదీమ్ కమిటీ నివేదిక అందిన తర్వాత ఔట్‌సోర్సింగ్ ఉద్యోగుల సమస్యలను పరిష్కరించేందుకు చర్యలు తీసుకుంటామని తెలిపారు.
అలాగే ఔట్‌సోర్సింగ్ ఉద్యోగుల కోసం ప్రత్యేకంగా ఔట్‌సోర్సింగ్ ఎంప్లాయిస్ కార్పొరేషన్ ఏర్పాటు చేసే అంశాన్ని కూడా ప్రభుత్వం పరిశీలిస్తోందని వెల్లడించారు. దీనిపై త్వరలో సమావేశం నిర్వహించనున్నట్లు మంత్రి వివేక్ వెంకటస్వామి ప్రకటించారు.
