హైదరాబాద్, సెప్టెంబర్ 02 (జనవాణి): తెలంగాణలో రేషన్ కార్డుదారులకు ప్రభుత్వం కీలక వెసులుబాటు కల్పించింది. రాష్ట్రవ్యాప్తంగా రేషన్ దుకాణాల ద్వారా ఉచితంగా పంపిణీ చేస్తున్న మూడు నెలల రేషన్ బియ్యం కోటా పంపిణీ గడువును మరో ఐదు రోజులు పొడిగించింది. సెప్టెంబర్ 5వ తేదీ సాయంత్రం వరకు బియ్యం తీసుకునే అవకాశం ఉంటుందని పౌరసరఫరాల శాఖ వెల్లడించింది.
వాస్తవానికి ఆగస్టు 1న ప్రారంభమైన మూడు నెలల కోటా పంపిణీ ఆగస్టు 31తో ముగియాల్సి ఉంది. అయితే ఒకేసారి మూడు నెలల బియ్యం పంపిణీ చేయడంతో రేషన్ దుకాణాల వద్ద భారీ రద్దీ ఏర్పడింది. అదేవిధంగా రాఖీ పౌర్ణమి సందర్భంగా పలువురు తమ స్వగ్రామాలకు వెళ్లడంతో గడువులోగా బియ్యం తీసుకోలేకపోయారు. దీంతో అర్హులైన ప్రతి లబ్ధిదారుడికి ఉచిత సన్నబియ్యం అందేలా ప్రభుత్వం గడువును మరో ఐదు రోజులు పొడిగించింది. వాతావరణ పరిస్థితులు, వర్షాభావ పరిస్థితులను దృష్టిలో ఉంచుకుని పేద కుటుంబాలకు ఇబ్బందులు కలగకుండా ఈ నిర్ణయం తీసుకున్నట్లు అధికారులు తెలిపారు.
లబ్ధిదారులకు ముఖ్య సూచన
ఇప్పటివరకు ఆగస్టు, సెప్టెంబర్, అక్టోబర్ నెలలకు సంబంధించిన మూడు నెలల రేషన్ బియ్యం కోటా తీసుకోని కార్డుదారులు సెప్టెంబర్ 5లోగా తప్పనిసరిగా బియ్యం తీసుకోవాలి. సమీపంలోని పోర్టబిలిటీ రేషన్ షాప్‌ లేదా కేటాయించిన రేషన్ దుకాణానికి వెళ్లి కోటాను పొందవచ్చు. సెప్టెంబర్ 5వ తేదీ సాయంత్రం తర్వాత గడువు ముగుస్తుందని, ఆ తర్వాత ఈ కోటా పొందే అవకాశం ఉండదని పౌరసరఫరాల శాఖ అధికారులు స్పష్టం చేశారు.
