నారాయణపేట జిల్లా ముడుమాల్ గ్రామంలో ఉన్న చారిత్రక నిలువురాళ్ల పార్కు అభివృద్ధి పనులకు మంత్రి వాకిటి శ్రీహరి మంగళవారం శంకుస్థాపన చేశారు. ఈ సందర్భంగా ఆయన మాట్లాడుతూ, తెలంగాణలోని చారిత్రక, సాంస్కృతిక వారసత్వ సంపదను భావితరాలకు అందించేందుకు ప్రభుత్వం ప్రత్యేక చర్యలు చేపడుతోందన్నారు.
నిలువురాళ్ల పార్కును మరింత ఆకర్షణీయంగా తీర్చిదిద్దేందుకు సందర్శకులకు అవసరమైన మౌలిక సదుపాయాలను కల్పిస్తున్నామని తెలిపారు. అభివృద్ధి పనులు పూర్తయిన తర్వాత పర్యాటకుల సంఖ్య పెరగడంతో పాటు స్థానిక యువతకు ఉపాధి అవకాశాలు కూడా మెరుగుపడతాయని మంత్రి పేర్కొన్నారు.
యునెస్కో గుర్తింపే లక్ష్యం
దక్కన్ హెరిటేజ్ అకాడమీ ట్రస్ట్ చైర్మన్ వేదకుమార్ మాట్లాడుతూ, ముడుమాల్ నిలువురాళ్లకు ఇప్పటికే యునెస్కో ప్రపంచ వారసత్వ తాత్కాలిక జాబితాలో చోటు దక్కడం తెలంగాణకు గర్వకారణమన్నారు. శాశ్వత గుర్తింపు సాధించేందుకు ప్రభుత్వం చర్యలు తీసుకుంటోందని తెలిపారు.
నిలువురాళ్ల ప్రాంత పరిరక్షణకు గతంలో పనిచేసిన జిల్లా కలెక్టర్లు చేపట్టిన చర్యలను ఆయన గుర్తు చేశారు. యునెస్కో సూచనలను అమలు చేస్తే శాశ్వత గుర్తింపు సాధించే అవకాశాలు మెరుగుపడతాయని అభిప్రాయపడ్డారు.
విద్యార్థుల్లో అవగాహన
జిల్లాలోని సుమారు 400 పాఠశాలల ప్రధానోపాధ్యాయులకు శిక్షణ ఇచ్చి దాదాపు 60 వేల మంది విద్యార్థులను ముడుమాల్ నిలువురాళ్లను సందర్శించేలా ప్రణాళిక రూపొందించాలని వేదకుమార్ సూచించారు. అలాగే 20 మంది టూరిస్ట్ గైడ్లను నియమించి చుట్టుపక్కల గ్రామాల ప్రజలకు అవగాహన కల్పించాలని ప్రతిపాదించారు.
మూడు వేల ఏళ్ల చరిత్ర
శాస్త్రీయ పరిజ్ఞానం విస్తరించకముందే సుమారు మూడు వేల సంవత్సరాల క్రితం నక్షత్ర మండల ఆకృతిని నిలువురాళ్ల రూపంలో రూపొందించడం ఈ ప్రాంత విశిష్టత అని ఆయన వివరించారు. ఈ చారిత్రక వారసత్వాన్ని ప్రపంచానికి చాటిచెప్పేందుకు ప్రభుత్వ శాఖలు, స్థానిక ప్రజలు భాగస్వాములై పనిచేయాలని పిలుపునిచ్చారు.
