జనవాణి: స్పోర్ట్స్ డెస్క్ August 19: కాలి గాయం నుంచి పూర్తిగా కోలుకోకముందే కోర్టులోకి దిగిన ప్రపంచ నంబర్‌వన్ బ్యాడ్మింటన్ క్రీడాకారిణి అన్సెయంగ్.. BWF వరల్డ్ ఛాంపియన్‌షిప్‌లో తన దూకుడు కొనసాగిస్తోంది. గాయం కారణంగా కొంత నొప్పి, ఆందోళన ఉన్నప్పటికీ వాటిని పక్కనపెట్టి మ్యాచ్‌పై దృష్టి పెట్టానని ఆమె పేర్కొన్నారు. ప్రపంచ చాంపియన్‌షిప్‌లో తొలి మ్యాచ్‌లో బల్గేరియాకు చెందిన కలోయానా నల్బాంటోవాపై వరుస గేముల్లో విజయం సాధించిన అన్సెయంగ్.. తదుపరి రౌండ్‌కు చేరుకుంది.
నొప్పి ఉన్నా.. ఆటపై ఫోకస్
“నాకు కొంత నొప్పి, మనసులో ఆందోళన ఉన్నాయి. కానీ వాటిని మర్చిపోయి మ్యాచ్‌పై దృష్టి పెట్టడానికి ప్రయత్నించాను” అని అన్సెయంగ్ మ్యాచ్ అనంతరం చెప్పినట్లు మీడియా కు వెల్లడించింది. జపాన్ ఓపెన్‌లో జులైలో కాలి గాయం కారణంగా వైదొలిగిన ఆమె.. దాదాపు నెల రోజుల విరామం తర్వాత ఢిల్లీలో జరుగుతున్న ప్రపంచ ఛాంపియన్‌షిప్‌లో బరిలోకి దిగింది.
తొలి మ్యాచ్‌లో సునాయాస విజయం
తొలి రౌండ్‌లో ప్రపంచ 40వ ర్యాంకర్ కలోయానా నల్బాంటోవాపై అన్సెయంగ్ 21-14, 21-13తో విజయం సాధించింది. 45 నిమిషాల్లోనే మ్యాచ్‌ను ముగించి తన ఫామ్‌ను చాటింది. కాలి నొప్పి ఉన్నప్పటికీ కోర్టులో ఆమె కదలికలు పెద్దగా ఇబ్బంది పడినట్లు కనిపించలేదు. మ్యాచ్ సాగుతున్న కొద్దీ తన రిథమ్ తిరిగి వస్తోందని అన్సెయంగ్ పేర్కొన్నారు.
గాయం నుంచి తిరిగి.. వరల్డ్ టైటిల్‌పై కన్ను
2023లో ప్రపంచ ఛాంపియన్‌గా నిలిచిన అన్సెయంగ్.. 2024 పారిస్ ఒలింపిక్స్‌లో స్వర్ణ పతకం సాధించింది. 2025 ప్రపంచ ఛాంపియన్‌షిప్‌లో సెమీఫైనల్‌లో ఓడిపోయి కాంస్య పతకంతో సరిపెట్టుకుంది. ఇప్పుడు ఢిల్లీలో మరోసారి ప్రపంచ టైటిల్‌ను సాధించాలనే లక్ష్యంతో బరిలోకి దిగింది. అయితే గాయం నుంచి పూర్తిగా కోలుకోకపోవడంతో ప్రతి మ్యాచ్‌లోనూ శారీరక పరిస్థితిని జాగ్రత్తగా నిర్వహించాల్సిన అవసరం ఉంది.
“రిథమ్ తిరిగి తెచ్చుకోవాలి”
వరల్డ్ ఛాంపియన్‌షిప్‌కు ముందు కూడా అన్సెయంగ్ తన కాలి నొప్పి పూర్తిగా తగ్గలేదని, అయితే అది భరించగలిగే స్థాయిలో ఉందని వెల్లడించింది. మ్యాచ్‌లు ఆడుతున్న కొద్దీ శరీరం పరిస్థితికి అనుగుణంగా మారుతుందని ఆమె ఆశాభావం వ్యక్తం చేసింది
Loading Tweet...
