జనవాణి: ఇంఫాల్ August 16: మణిపూర్‌లో నెలకొన్న ఉద్రిక్త పరిస్థితులు.. తరచూ బంద్‌లు, కర్ఫ్యూలు.. శిక్షణకు ఎన్నో ఆటంకాలు. అయినా లక్ష్యాన్ని వదల్లేదు ఆ యువ జిమ్నాస్ట్. తెల్లవారుజామున జిమ్‌ తెరిచిన వెంటనే సాధనకు వెళ్లిన అరియా పాంగంబమ్‌ ఇప్పుడు ఆసియా ఛాంపియన్‌గా నిలిచింది. సీనియర్ వ్యక్తిగత మహిళల ఆసియా ఏరోబిక్‌ జిమ్నాస్టిక్స్‌ ఛాంపియన్‌షిప్‌లో స్వర్ణ పతకం సాధించి మణిపూర్‌ పేరు మరోసారి అంతర్జాతీయ క్రీడా వేదికపై మార్మోగించింది.
టీవీలో చూస్తూ ఉత్కంఠగా..
అరియా పోటీని ఆమె తల్లిదండ్రులు టెలివిజన్‌లో వీక్షించారు. కూతురు పాల్గొంటున్నందుకు ఒకవైపు ఆనందం, మరోవైపు ఫలితం ఎలా ఉంటుందోనన్న ఆందోళనతో ఉత్కంఠగా గడిపామని అరియా తండ్రి పాంగంబమ్‌ అఖేలో తెలిపారు. ఆమె ప్రదర్శనను బట్టి పతకం వస్తుందని నమ్మకం ఉన్నప్పటికీ.. స్వర్ణం సాధిస్తుందని మాత్రం ఊహించలేదన్నారు.
“గెలిచినప్పుడు ఆనందంతో మా హృదయాలు నిండిపోయాయి” - తండ్రి పాంగంబమ్‌ అఖేలో
అరియా విజేతగా నిలిచిన క్షణం కుటుంబానికి మరిచిపోలేని అనుభూతిని ఇచ్చిందని అఖేలో చెప్పారు. పతకం వస్తుందని ఆశించినా విజేతగా నిలవడం తమకు ఊహించని ఆనందాన్ని ఇచ్చిందన్నారు.
బంద్‌లు, కర్ఫ్యూల మధ్య సాధన
మణిపూర్‌లో తరచూ బంద్‌లు, నెలకొనే అశాంతి పరిస్థితులు అరియా శిక్షణపై తీవ్ర ప్రభావం చూపాయని ఆమె తండ్రి తెలిపారు. కర్ఫ్యూ సమయాల్లోనూ వీలైనంతవరకు సాధన కొనసాగించేందుకు కుటుంబం ప్రయత్నించిందన్నారు. జిమ్నాసియం తెల్లవారుజామున తెరిచి ఉన్న సమయంలో అక్కడికి వెళ్లి శిక్షణ తీసుకునేలా చూశామని చెప్పారు.
కోచ్‌ రంజన్‌ శిక్షణే కీలకం
అరియా విజయానికి ఆమె కోచ్‌ యుమ్నమ్‌ రంజన్‌ కీలకంగా నిలిచారని అఖేలో పేర్కొన్నారు. రిటైర్డ్‌ మాజీ సైనికుడైన రంజన్‌ ఖుమన్‌ లంపక్‌లో సేవలందిస్తూ అరియాకు శిక్షణ ఇచ్చారని తెలిపారు. ఆయన గిమ్నాస్టిక్స్‌ ఫెడరేషన్‌ ఆఫ్‌ ఇండియా, అంతర్జాతీయ జిమ్నాస్టిక్స్‌ ఫెడరేషన్‌ ఆమోదిత అంతర్జాతీయ న్యాయనిర్ణేతగా కూడా ఉన్నారని చెప్పారు.
అంతర్జాతీయ స్థాయిలో మెరిపించాలన్న లక్ష్యం
రంజన్‌ అందించిన శిక్షణ అంతర్జాతీయ కోచ్‌ల స్థాయికి ఏమాత్రం తీసిపోదని అరియా తండ్రి అభిప్రాయపడ్డారు. ప్రస్తుతం ఆసియా స్థాయిలో స్వర్ణం సాధించిన తమ కుమార్తె భవిష్యత్‌లో మరింత ఉన్నత శిఖరాలను అధిరోహించాలని కుటుంబం కోరుకుంటోంది.
వరల్డ్ ఛాంపియన్‌షిప్, ఒలింపిక్స్‌, వరల్డ్ గేమ్స్‌లో అరియా ఛాంపియన్‌గా నిలవాలని తన ఆకాంక్ష అని అఖేలో తెలిపారు. మణిపూర్‌లోని ప్రతికూల పరిస్థితులను దాటి ఆసియా వేదికపై స్వర్ణం సాధించిన అరియా.. ఇక అంతర్జాతీయ క్రీడా రంగంలో మరిన్ని విజయాలే లక్ష్యంగా ముందుకు సాగనుంది.
