అరకులోయలోని పెడలబుడు గిరి గ్రామ దర్శినిలో ఆదివారం నిర్వహించిన సమావేశంలో అల్లూరి సీతారామరాజు జిల్లాకు చెందిన ఆదివాసీ సోషల్ మీడియా ఇన్‌ఫ్లూయెన్సర్లు, డిజిటల్ కంటెంట్ క్రియేటర్లు సమావేశమయ్యారు. జిల్లాలోని ఆదివాసీ యువతను సోషల్ మీడియా ద్వారా ఒకే వేదికపైకి తీసుకువచ్చి గిరిజన సమాజ అభ్యున్నతికి సమిష్టిగా కృషి చేయాలనే లక్ష్యంతో నూతన జిల్లా కార్యవర్గాన్ని ఏకగ్రీవంగా ఎన్నుకున్నారు.
సమావేశంలో గిరిజన హక్కుల పరిరక్షణ, 1/70 చట్టం, జీవో నెం.3పై అవగాహన పెంచడం, గిరిజనుల సమస్యలను ప్రభుత్వ దృష్టికి తీసుకెళ్లడం వంటి అంశాలపై చర్చించారు. అలాగే గిరిజన సంస్కృతి, సంప్రదాయాలు, కళలు, జీవన విధానం, యువత ప్రతిభను సోషల్ మీడియా ద్వారా ప్రపంచానికి పరిచయం చేయాలని నిర్ణయించారు.
విద్య, వైద్యం, ఉపాధి, ప్రభుత్వ సంక్షేమ పథకాలు, అభివృద్ధి కార్యక్రమాలపై ప్రజల్లో అవగాహన పెంచేందుకు డిజిటల్ వేదికలను సమర్థవంతంగా వినియోగించాలని సభ్యులు అభిప్రాయపడ్డారు.
సభ్యుల ఏకగ్రీవ నిర్ణయంతో అరకు ట్రైబల్ వరల్డ్‌కు చెందిన పెట్టెలి ప్రసాదరావును జిల్లా అధ్యక్షుడిగా ఎన్నుకున్నారు. ఉపాధ్యక్షుడిగా సందడి రాజేష్, ప్రధాన కార్యదర్శిగా కొర్రా మోహన్ కుమార్, కోశాధికారిగా OSM ధ్రువ, సలహాదారుగా వంతాల రామూర్తి, మహిళా అధ్యక్షురాలిగా సీతబీని ఎన్నుకున్నారు.
నూతనంగా ఎన్నికైన కార్యవర్గ సభ్యులు మాట్లాడుతూ, ఆదివాసీ ప్రాంతాల్లో జరుగుతున్న అభివృద్ధి కార్యక్రమాలు, ప్రభుత్వ సంక్షేమ పథకాలు, గిరిజనుల హక్కులు, చట్టాల అమలుపై బాధ్యతాయుతమైన సమాచారాన్ని ప్రజలకు చేరవేస్తామని తెలిపారు. అలాగే గిరిజన సమాజ సమస్యలను నిర్మాణాత్మకంగా వెలుగులోకి తీసుకురావడంతో పాటు విద్య, వైద్యం, ఉపాధి రంగాల్లో ఆదివాసీ యువత సాధిస్తున్న విజయాలను సోషల్ మీడియా ద్వారా విస్తృతంగా ప్రచారం చేస్తామని పేర్కొన్నారు.
జిల్లాలోని అన్ని మండలాల ఆదివాసీ సోషల్ మీడియా ఇన్‌ఫ్లూయెన్సర్లు, డిజిటల్ కంటెంట్ క్రియేటర్లు, యువజన ప్రతినిధులను ఒకే వేదికపైకి తీసుకువచ్చి సమన్వయంతో పనిచేస్తామని, సమాజానికి ఉపయోగపడే నాణ్యమైన సమాచారాన్ని ప్రజలకు అందించడం తమ ప్రధాన బాధ్యతగా ఉంటుందని స్పష్టం చేశారు.
ఈ సందర్భంగా నూతన కార్యవర్గ సభ్యులకు ఆదివాసీ నాయకులు, యువజన ప్రతినిధులు, సామాజిక కార్యకర్తలు, సోషల్ మీడియా ఇన్‌ఫ్లూయెన్సర్లు, కంటెంట్ క్రియేటర్లు శుభాకాంక్షలు తెలియజేశారు.
