అమరావతి, ఆగస్టు 12 (జనవాణి): ఆంధ్రప్రదేశ్ అసెంబ్లీ వర్షాకాల సమావేశాలకు ప్రభుత్వం సిద్ధమవుతోంది. ఆగస్టు 17 నుంచి ప్రారంభమయ్యే ఈ సమావేశాల నేపథ్యంలో ఎమ్మెల్యేల హాజరు వ్యవస్థలో కీలక మార్పులకు స్పీకర్ చింతకాయల అయ్యన్నపాత్రుడు శ్రీకారం చుట్టారు. ఇకపై ప్రతి ఎమ్మెల్యే సీటు వద్ద ప్రత్యేక కెమెరాలు ఏర్పాటు చేయనున్నట్లు స్పీకర్ వెల్లడించారు. సభ్యుడు తనకు కేటాయించిన స్థానంలో కూర్చున్నప్పుడే సభకు హాజరైనట్లుగా పరిగణిస్తామని స్పష్టం చేశారు. కేవలం హాజరు రిజిస్టర్‌లో సంతకం చేసి సభకు హాజరుకాకపోవడాన్ని నియంత్రించేందుకు ఈ కొత్త విధానాన్ని తీసుకొస్తున్నట్లు తెలిపారు. ప్రజలు తమ సమస్యలను శాసనసభలో ప్రస్తావించి పరిష్కారం చూపాలనే ఆశతో ఎమ్మెల్యేలను ఎన్నుకుంటారని, సభకు రాకుండానే జీతభత్యాలు తీసుకోవడం ప్రజాస్వామ్య స్ఫూర్తికి విరుద్ధమని స్పీకర్ అభిప్రాయపడ్డారు. సభ్యుల హాజరులో పారదర్శకత, బాధ్యత పెంచడమే ఈ నిర్ణయం ఉద్దేశమని పేర్కొన్నారు.
ఇదిలా ఉండగా, వర్షాకాల అసెంబ్లీ సమావేశాలను నాలుగు రోజులపాటు నిర్వహించే అవకాశాలు కనిపిస్తున్నాయి. ప్రభుత్వ పనితీరు, ఎల్‌నినో ప్రభావం, అభివృద్ధి కార్యక్రమాలు వంటి కీలక అంశాలపై ప్రత్యేక చర్చలు జరగనున్నట్లు సమాచారం. అసెంబ్లీలో ప్రతిపక్షాల ప్రశ్నలకు సమగ్ర సమాధానాలు ఇచ్చేలా మంత్రులు సిద్ధంగా ఉండాలని ముఖ్యమంత్రి చంద్రబాబు నాయుడు ఆదేశించినట్లు తెలుస్తోంది. ముఖ్యంగా మెగా డీఎస్సీ, శాంతిభద్రతలు, ప్రభుత్వ విధానాలు వంటి అంశాలపై స్పష్టమైన వివరాలతో సమాధానాలు ఇవ్వాలని సూచించినట్లు సమాచారం. అసెంబ్లీ సమావేశాల వ్యవధి, అజెండాపై స్పీకర్ అయ్యన్నపాత్రుడు అధ్యక్షతన జరిగే బిజినెస్ అడ్వైజరీ కమిటీ (బీఏసీ) సమావేశంలో తుది నిర్ణయం తీసుకునే అవకాశం ఉంది.
