పొగాకు ధరల స్థిరీకరణ, రైతులకు గిట్టుబాటు ధర కల్పించే అంశంపై ఏపీ ముఖ్యమంత్రి నారా చంద్రబాబు నాయుడు సోమవారం టెలీకాన్ఫరెన్స్ నిర్వహించారు. ఈ సమావేశంలో పొగాకు రైతులను ఆదుకునేందుకు కేంద్ర, రాష్ట్ర ప్రభుత్వాలు కలిసి పలు కీలక నిర్ణయాలు తీసుకున్నట్లు వెల్లడించారు.
ధరల లోటు భర్తీ కోసం కేంద్ర, రాష్ట్ర ప్రభుత్వాలు కలిసి రూ.188 కోట్లు భరించేందుకు అంగీకరించినట్లు తెలిపారు. ఈ మేరకు ధరల లోటు భర్తీ కింద రైతులకు కిలో పొగాకుకు రూ.20 చెల్లించాలని నిర్ణయించినట్లు వెల్లడించారు.
94 మిలియన్ కేజీల కొనుగోళ్లకు మద్దతు
రాష్ట్రంలో 94 మిలియన్ కేజీల పొగాకు కొనుగోళ్లకు అవసరమైన మద్దతు అందించేలా చర్యలు చేపట్టాలని ముఖ్యమంత్రి ఆదేశించారు. రైతులు తమ పంటకు గిట్టుబాటు ధర పొందేలా కొనుగోలు ప్రక్రియను సమర్థవంతంగా నిర్వహించాలని అధికారులకు సూచించారు.
కనీస ధరలు కొనసాగించాలి
పొగాకు ధరలు పడిపోకుండా బ్రైట్ రకం పొగాకు కిలోకు రూ.240, మీడియం రకం కిలోకు రూ.190, లో గ్రేడ్ పొగాకు కిలోకు రూ.110 కంటే తక్కువకు వెళ్లకుండా అవసరమైన చర్యలు తీసుకోవాలని సీఎం చంద్రబాబు అధికారులను ఆదేశించారు.
కేంద్రంతో నిరంతర సంప్రదింపులు
పొగాకు రైతుల సమస్యల పరిష్కారం కోసం రాష్ట్ర ప్రభుత్వం కేంద్ర ప్రభుత్వంతో నిరంతరం చర్చలు జరిపినట్లు సమావేశంలో వెల్లడించారు. రెండు రోజుల క్రితం కేంద్ర వాణిజ్య మంత్రిత్వ శాఖ అదనపు కార్యదర్శి, డైరెక్టర్ ముఖ్యమంత్రిని కలిసి పరిస్థితిని సమీక్షించినట్లు తెలిపారు.
అలాగే సీఎం సూచనల మేరకు కేంద్ర ప్రతినిధులు రాష్ట్రంలోని పొగాకు కొనుగోలు సంస్థల ప్రతినిధులతో సమావేశమై రైతులకు మేలు చేసే ప్రతిపాదనలపై చర్చించినట్లు పేర్కొన్నారు. అనంతరం వివిధ అంశాలను పరిశీలించి తుది నిర్ణయానికి వచ్చినట్లు వివరించారు.
ఈ టెలీకాన్ఫరెన్స్‌లో మంత్రి అచ్చెన్నాయుడు, వ్యవసాయ, మార్కెటింగ్ శాఖ అధికారులు, టొబాకో బోర్డు ప్రతినిధులు పాల్గొన్నారు.
