తిరుపతి, ఆగస్టు 19 (జనవాణి): తిరుమల శ్రీవారిని మాజీ ఎంపీ విజయసాయి రెడ్డి దర్శించుకున్నారు. స్వామివారి ఆశీస్సులు పొందిన అనంతరం ఆయన తన రాజకీయ భవిష్యత్‌పై కీలక వ్యాఖ్యలు చేశారు. ప్రజల సమస్యలు, ప్రజావాణిని చట్టసభల్లో బలంగా వినిపించేందుకు ఓ రాజకీయ పార్టీని ప్రారంభించాలని సంకల్పించినట్లు విజయసాయి రెడ్డి తెలిపారు. ఈ నేపథ్యంలోనే శ్రీవారిని దర్శించుకుని ఆశీస్సులు తీసుకున్నానని చెప్పారు.
కొత్త రాజకీయ పార్టీ ఏర్పాటుపై త్వరలోనే కీలక ప్రకటన చేయనున్నట్లు వెల్లడించారు. ఈ నెలలోనే విజయవాడ వేదికగా తన రాజకీయ ప్రణాళికను ప్రకటిస్తానని తెలిపారు. ప్రజల ఆకాంక్షలకు అనుగుణంగా పార్టీ విధివిధానాలు, రాజకీయ కార్యాచరణను రూపొందించనున్నట్లు పేర్కొన్నారు. విజయవాడలో జరిగే ప్రకటనలో పార్టీ పేరు, లక్ష్యాలు, విధివిధానాలు, భవిష్యత్ కార్యాచరణపై స్పష్టత వచ్చే అవకాశం ఉందని తెలిపారు. అలాగే రాష్ట్రంలో, దేశంలో కరువు పరిస్థితులు లేకుండా సమృద్ధిగా వర్షాలు కురవాలని శ్రీవారిని ప్రార్థించినట్లు విజయసాయి రెడ్డి చెప్పారు. ప్రజలందరూ సుఖసంతోషాలతో, సుభిక్షంగా ఉండాలని స్వామివారిని వేడుకున్నట్లు తెలిపారు.
విజయసాయి రెడ్డి తాజా వ్యాఖ్యలు ఆంధ్రప్రదేశ్ రాజకీయాల్లో ఆసక్తిని రేకెత్తిస్తున్నాయి. ఆయన ఏర్పాటు చేయబోయే రాజకీయ పార్టీపై, దాని విధివిధానాలపై రాజకీయ వర్గాల్లో చర్చ మొదలైంది.
