విక్టరీ వెంకటేశ్, త్రివిక్రమ్ శ్రీనివాస్ కాంబినేషన్‌లో తెరకెక్కుతున్న ‘ఆదర్శ కుటుంబం’ సినిమాపై ప్రేక్షకుల్లో భారీ అంచనాలు ఉన్నాయి. ఈ సినిమా అక్టోబర్ 9న థియేటర్లలో విడుదల కానుందని గతంలో చిత్రబృందం ప్రకటించింది. అయితే తాజాగా ఈ రిలీజ్ వాయిదా పడింది. దీంతో వెంకటేశ్ అభిమానులకు నిరాశ తప్పలేదు.
సినిమా విడుదల వాయిదాపై నిర్మాత నాగవంశీ స్పందిస్తూ.. చిత్రానికి సంబంధించిన తుది దశ పనులు ఇంకా పూర్తికాలేదని తెలిపారు. మరో రెండు, మూడు పాటల చిత్రీకరణతో పాటు కొన్ని కీలక సన్నివేశాల షూటింగ్ కూడా చేయాల్సి ఉందని చెప్పారు. వీటితో పాటు ప్రమోషన్ కార్యక్రమాలను కూడా నిర్వహించాల్సి ఉందని, ఈ పనులన్నీ పూర్తి చేయడానికి మరో రెండు నుంచి మూడు వారాల సమయం అవసరమవుతుందని వెల్లడించారు.
నాణ్యత విషయంలో రాజీ వద్దు
అనుకున్న తేదీకి సినిమా విడుదల చేయాలనే తొందరలో నాణ్యత విషయంలో రాజీపడటం తమకు ఇష్టం లేదని నాగవంశీ స్పష్టం చేశారు. ప్రేక్షకులతో పాటు తాము కూడా థియేటర్‌లో ఫైనల్ కాపీని చూడాలని కోరుకుంటున్నామని, అన్ని హంగులు పూర్తి చేసిన తర్వాతే సినిమాను ప్రేక్షకుల ముందుకు తీసుకువస్తామని తెలిపారు. సినిమా నాణ్యతకే తమ తొలి ప్రాధాన్యత అని పేర్కొన్న నిర్మాత అన్ని పనులు పూర్తయిన తర్వాత కొత్త విడుదల తేదీని అధికారికంగా ప్రకటిస్తామని చెప్పారు.
ఇక ప్రస్తుతం చిత్రబృందం పెండింగ్‌లో ఉన్న షూటింగ్, ఇతర నిర్మాణ పనులను వేగంగా పూర్తి చేసే పనిలో ఉంది. కాగా, పరిశ్రమ వర్గాల సమాచారం ప్రకారం ‘ఆదర్శ కుటుంబం’ సినిమాను అక్టోబర్ 30న విడుదల చేసే అవకాశాలు ఉన్నట్లు ప్రచారం జరుగుతోంది. అయితే దీనిపై అధికారిక ప్రకటన రావాల్సి ఉంది. భారీ అంచనాల మధ్య విడుదలకు సిద్ధమవుతున్న ఈ సినిమా కోసం వెంకటేశ్ అభిమానులు మరికొంత కాలం వేచి చూడాల్సిందే.
