తెలుగు బుల్లితెరపై అత్యంత ప్రజాదరణ పొందిన రియాలిటీ షోలలో బిగ్ బాస్ ఒకటి. తొమ్మిది సీజన్లుగా ప్రేక్షకులను అలరిస్తున్న ఈ షో ఇప్పుడు పదో సీజన్‌తో మరోసారి సందడి చేసేందుకు సిద్ధమవుతోంది. ఇప్పటికే విడుదలైన 'దశావతారం' ప్రోమో అభిమానుల్లో భారీ ఆసక్తిని రేకెత్తించగా, తాజాగా మరో అప్‌డేట్ సోషల్ మీడియాలో వైరల్‌గా మారింది.
సోషల్ మీడియాలో చక్కర్లు కొడుతున్న సమాచారం ప్రకారం, బిగ్ బాస్ తెలుగు సీజన్ 10 సెప్టెంబర్ 6న ప్రారంభమయ్యే అవకాశం ఉన్నట్లు తెలుస్తోంది. అయితే దీనిపై నిర్వాహకుల నుంచి ఇప్పటివరకు అధికారిక ప్రకటన వెలువడలేదు.
2017లో ప్రారంభమైన బిగ్ బాస్ తెలుగు ప్రయాణం విజయవంతంగా తొమ్మిది సీజన్లు పూర్తి చేసుకుంది. తొలి సీజన్‌కు ఎన్టీఆర్, రెండో సీజన్‌కు *నాని* హోస్ట్‌గా వ్యవహరించగా, మూడో సీజన్ నుంచి వరుసగా నాగార్జున హోస్ట్‌గా కొనసాగుతున్నారు. ఇప్పుడు పదో సీజన్‌కూ నాగార్జునే వ్యాఖ్యాతగా వ్యవహరించనున్నట్లు ఇప్పటికే స్పష్టమైంది.
ప్రస్తుతం అన్నపూర్ణ స్టూడియోలో బిగ్ బాస్ సెట్ పనులు చివరి దశకు చేరుకున్నాయని సమాచారం. ఆగస్టు తొలి వారం నుంచి వరుసగా కొత్త ప్రోమోలు, కంటెస్టెంట్ హింట్స్, ఇతర ప్రచార కార్యక్రమాలు ప్రారంభమయ్యే అవకాశముందని సినీ వర్గాల్లో చర్చ జరుగుతోంది.
ఈసారి టాస్కులు గత సీజన్లతో పోలిస్తే మరింత విభిన్నంగా ఉండనున్నట్లు ప్రచారం జరుగుతోంది. అలాగే ప్రేక్షకులు ఊహించని కంటెస్టెంట్లను రంగంలోకి దింపేందుకు నిర్వాహకులు ప్రయత్నిస్తున్నట్లు సమాచారం. దీంతో సీజన్ 10పై అంచనాలు రోజురోజుకూ పెరుగుతున్నాయి.
అయితే ప్రస్తుతం సోషల్ మీడియాలో వినిపిస్తున్న ఈ వివరాలపై అధికారిక ధృవీకరణ రావాల్సి ఉంది. షో ప్రారంభ తేదీ, కంటెస్టెంట్ల జాబితా వంటి వివరాలను స్టార్ మా, డిస్నీ+ హాట్‌స్టార్ లేదా షో నిర్వాహకులు త్వరలో ప్రకటించే అవకాశం ఉంది.
