Film News, ఆగస్టు 21 (జనవాణి): మాస్ మహారాజ్ రవితేజ నుంచి సినిమా వచ్చి చాలా కాలమే అయ్యింది. 2026 సంక్రాంతికి వచ్చిన ‘భర్త మహాశయులకు విజ్ఞప్తి’ ఫ్యాన్స్‌ను కొంతవరకు సంతృప్తిపరిచినప్పటికీ.. ఇప్పుడు ‘ఇరుముడి’తో ఆయన మరోసారి తనదైన మార్క్ చూపించారు. శివ నిర్వాణ దర్శకత్వంలో తెరకెక్కిన ఈ సినిమా ఆగస్టు 21న ప్రేక్షకుల ముందుకు వచ్చింది. మరి ‘ఇరుముడి’ ఎలా ఉంది? రవితేజకు ఇది నిజంగానే కమ్‌బ్యాక్ మూవీనా?
కథేంటి?
ప్రభుత్వ బాలికల పాఠశాలలో విద్యార్థులతో కఠినంగా వ్యవహరించే ఓ టీచర్ కారణంగా ఓ బాలిక ప్రాణాలు కోల్పోతుంది. దీంతో ఆ టీచర్ ఏడాది పాటు సస్పెండ్ అవుతుంది. మరోవైపు పొల్లూరు గ్రామంలో త్రినాథ్ రామ (రవితేజ) తన భార్య కావేరి (ప్రియ భవానీ శంకర్), కూతురు మణికంఠ (బేబీ నక్షత్ర)తో కలిసి జీవిస్తుంటాడు. కూతురంటే ప్రాణంగా భావించే త్రినాథ్.. స్కూల్‌లో, బయట ఏం జరిగినా తనతో చెప్పాలని ఆమెను పెంచుతాడు. మద్యానికి బానిసైన త్రినాథ్.. కార్తీక మాసంలో మాత్రం అయ్యప్ప మాల ధరించి 41 రోజుల పాటు కఠిన నియమాలు పాటిస్తాడు. అదే గ్రామానికి చెందిన గురుస్వామి గంగరాజు (సాయికుమార్) కుటుంబంతోనూ అతనికి పరిచయం ఉంటుంది. ప్రతి ఆడబిడ్డలోనూ తన కూతురిని చూసే త్రినాథ్.. అమ్మాయిలకు అన్యాయం జరిగితే ఎదిరించేందుకు వెనుకాడడు. అయితే అతని జీవితంలో ఊహించని సమస్య ఎదురవుతుంది. త్రినాథ్ అయ్యప్ప మాల ధరించడం వెనుక కారణమేంటి? అతని కుటుంబానికి ఎదురైన కష్టం ఏంటి? సస్పెండ్ అయిన టీచర్ తిరిగి వచ్చాక విద్యార్థుల పరిస్థితి ఎలా మారింది? ఈ ప్రశ్నలకు సమాధానం తెలియాలంటే సినిమా చూడాల్సిందే.
రవితేజ నటన హైలైట్
‘ఇరుముడి’కి ప్రధాన బలం రవితేజ నటనే. గతంలో ఆయన కొన్ని పాత్రల్లో పాత ఇమేజ్ నుంచి బయటకు రాలేకపోతున్నారనే విమర్శలు వచ్చాయి. అయితే త్రినాథ్ పాత్రలో రవితేజ ఆ విమర్శలకు చెక్ పెట్టారు. కూతురిని ప్రాణంగా చూసుకునే తండ్రిగా, కుటుంబం కోసం పోరాడే వ్యక్తిగా రవితేజ తన నటనతో ఆకట్టుకున్నారు. ముఖ్యంగా ఎమోషనల్ సన్నివేశాల్లో ఆయన పర్ఫామెన్స్ బాగా వర్కవుట్ అయ్యింది. ఇటీవలి కాలంలో రవితేజ నుంచి వచ్చిన బెస్ట్ పర్ఫామెన్స్‌లలో ఇది ఒకటిగా చెప్పొచ్చు.
ప్రియ భవానీ శంకర్ కూడా కావేరి పాత్రలో ఆకట్టుకున్నారు. ముఖ్యంగా భావోద్వేగ సన్నివేశాల్లో ఆమె నటన ప్రేక్షకులకు బాగా కనెక్ట్ అవుతుంది. ఇక రవితేజ కూతురిగా నటించిన బేబీ నక్షత్ర సినిమాకు మరో ప్రధాన ఆకర్షణ. చాలా సన్నివేశాల్లో ఆమె తన నటనతో ఆకట్టుకుంది. సాయికుమార్ పాత్రకు కూడా కథలో మంచి ప్రాధాన్యం ఉంది. అజయ్ ఘోష్, స్వాసిక, లక్ష్మణ్ మీసాల, రమేష్ ఇందిర నెగిటివ్ షేడ్స్ ఉన్న పాత్రల్లో మెప్పించారు. రాజ్‌కుమార్ కసిరెడ్డికి పెద్దగా సన్నివేశాలు లేకపోయినా.. జబర్దస్త్ కొమరం తన పాత్రకు న్యాయం చేశాడు.
దర్శకుడి పనితీరు
దర్శకుడు శివ నిర్వాణ ఎంచుకున్న కథాంశం ఆసక్తికరంగా ఉంది. పెద్దగా ఆలస్యం చేయకుండా ప్రేక్షకులను కథలోకి తీసుకెళ్లారు. ఫస్టాఫ్ ప్రధానంగా అయ్యప్ప మాల ధరించిన త్రినాథ్ ఎదుర్కొనే సమస్యల చుట్టూ సాగుతుంది. ఇంటర్వెల్‌కు పెద్ద ట్విస్ట్ లేకపోయినా.. మంచి ఎమోషనల్ సీన్‌తో సినిమాపై ఆసక్తిని పెంచారు. సెకండాఫ్‌లో కథ మరింత కీలకమైన మలుపులు తిరుగుతుంది. దర్శకుడు ప్రధాన ట్విస్టులను ఇక్కడే దాచారు. అయితే సెకండాఫ్‌లో ఎమోషనల్ సన్నివేశాలు ఎక్కువగా ఉండటంతో అక్కడక్కడా సినిమా కాస్త నెమ్మదించినట్లు అనిపిస్తుంది. ప్రీ-క్లైమాక్స్ ట్విస్ట్ మాత్రం బాగా వర్కవుట్ అయ్యింది. క్లైమాక్స్ సాంగ్‌ను మరింత ఎమోషనల్‌గా తెరకెక్కించి ఉంటే ప్రభావం ఇంకాస్త పెరిగేది.
టెక్నికల్‌గా..
జీవీ ప్రకాశ్ కుమార్ సంగీతం సినిమాకు ప్లస్ పాయింట్. ముఖ్యంగా అయ్యప్ప స్వామి పాటల ద్వారా సినిమాకు కావాల్సిన ఎమోషన్‌ను బాగా క్యారీ చేశారు. బ్యాక్‌గ్రౌండ్ స్కోర్ కూడా సన్నివేశాలకు తగ్గట్టుగా ఉంది. అల్లూరి సీతారామరాజు జిల్లా అటవీ ప్రాంతాల్లో తెరకెక్కిన సన్నివేశాలు సినిమాకు ప్రత్యేకమైన విజువల్ ఫీల్ తీసుకొచ్చాయి. విష్ణు శర్మ సినిమాటోగ్రఫీ ఆకట్టుకుంటుంది.
ఫైనల్‌గా..
అమ్మాయిలు ఎదుర్కొంటున్న సమస్యలను ప్రధానంగా తీసుకుని తెరకెక్కించిన ‘ఇరుముడి’.. రవితేజ ఇటీవలి సినిమాల్లో మంచి చిత్రంగా నిలుస్తుంది. నటీనటుల పర్ఫామెన్స్, ఎమోషనల్ సన్నివేశాలు, జీవీ ప్రకాశ్ కుమార్ సంగీతం, అయ్యప్ప పాటలు సినిమాకు ప్రధాన బలాలు. వెకిలి కామెడీ, బూతు జోకులు, ఐటెం సాంగ్స్, గ్లామర్, ఎక్స్‌పోజింగ్, రొమాంటిక్ సన్నివేశాలు కోరుకునే ప్రేక్షకులకు ఈ సినిమా పెద్దగా కనెక్ట్ కాకపోవచ్చు. అయితే మంచి కథ, భావోద్వేగాలు, ఫ్యామిలీ ఎలిమెంట్స్ ఉన్న సినిమాలను ఇష్టపడే వారికి ‘ఇరుముడి’ తప్పకుండా నచ్చుతుంది. ఓవరాల్‌గా ‘ఇరుముడి’ మాస్ మహారాజ్ రవితేజకు మంచి కమ్‌బ్యాక్. ముఖ్యంగా ఫ్యామిలీ ఆడియెన్స్‌ను ఈ సినిమా బాగా ఆకట్టుకునే అవకాశముంది.
