నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్‌లో తెరకెక్కిన మోస్ట్ అవైటెడ్ పాన్ ఇండియా చిత్రం ‘ది ప్యారడైజ్’ విడుదలకు సిద్ధమవుతోంది. సెప్టెంబర్ 24న ప్రపంచవ్యాప్తంగా ప్రేక్షకుల ముందుకు రానున్న ఈ సినిమాపై ఇప్పటికే భారీ అంచనాలు నెలకొన్నాయి. తాజాగా కలెక్షన్ కింగ్ మోహన్‌బాబు చేసిన వ్యాఖ్యలు ఆ అంచనాలను మరింత పెంచాయి.
సోమవారం ఉదయం తన కుమారుడు మంచు విష్ణుతో కలిసి మోహన్‌బాబు తిరుమల శ్రీవారిని దర్శించుకున్నారు. దర్శనం అనంతరం మీడియాతో మాట్లాడిన ఆయన ‘ది ప్యారడైజ్’ గురించి ప్రస్తావించారు. సినిమా అద్భుతంగా వచ్చిందని, తెలుగు సినీ చరిత్రలో సరికొత్త రికార్డులు సృష్టించే స్థాయిలో విజయం సాధిస్తుందని ఆశాభావం వ్యక్తం చేశారు.
‘శికంజ మాలిక్’గా మోహన్‌బాబు
‘ది ప్యారడైజ్’లో తాను ‘శికంజ మాలిక్’ అనే శక్తిమంతమైన ప్రతినాయకుడి పాత్రలో నటించినట్లు మోహన్‌బాబు తెలిపారు. తన కెరీర్‌లోని విలక్షణమైన పాత్రల్లో ఇది ఒకటిగా నిలవనున్నట్లు తెలుస్తోంది. సినిమా ఘనవిజయం సాధించాలని తిరుమల శ్రీవారిని ప్రార్థించినట్లు ఆయన వెల్లడించారు. ఇప్పటివరకు సినిమా ప్రమోషన్ కార్యక్రమాల్లో మోహన్‌బాబు పెద్దగా కనిపించలేదు. అయితే విడుదలకు కొద్ది రోజుల ముందు స్వయంగా సినిమా గురించి మాట్లాడటం, విజయంపై నమ్మకం వ్యక్తం చేయడం నాని అభిమానుల్లో ఆసక్తిని పెంచింది.
రా అండ్ రస్టిక్ అవతారంలో నాని
‘దసరా’తో ప్రేక్షకులను ఆకట్టుకున్న శ్రీకాంత్ ఓదెల.. ఈసారి 1984-85 కాలం నేపథ్యంలో మరింత రా అండ్ రస్టిక్ యాక్షన్ డ్రామాను తెరకెక్కించారు. ఇందులో నాని మునుపెన్నడూ చూడని మాస్, రఫ్ లుక్‌లో కనిపించనున్నారు. భారీ యాక్షన్ సన్నివేశాలు, రక్తపాతంతో కూడిన కథనం కారణంగా సినిమాకు ‘A’ సర్టిఫికెట్ లభించింది.
సినిమా నిడివి 2 గంటల 49 నిమిషాలు (169 నిమిషాలు)గా ఉంది. ఎస్ఎల్‌వి సినిమాస్ బ్యానర్‌పై సుధాకర్ చెరుకూరి భారీ బడ్జెట్‌తో నిర్మించిన ఈ చిత్రంలో కయాదు లోహర్ హీరోయిన్‌గా నటించారు. సోనాలి కులకర్ణి, రాఘవ్ జుయల్, సంపూర్ణేష్ బాబు తదితరులు కీలక పాత్రలు పోషించారు. రాక్‌స్టార్ అనిరుధ్ రవిచందర్ సంగీతం, ముఖ్యంగా బ్యాక్‌గ్రౌండ్ స్కోర్ సినిమాకు ప్రత్యేక ఆకర్షణగా నిలవనుంది. నాని–శ్రీకాంత్ ఓదెల కాంబినేషన్‌పై ఉన్న అంచనాలకు తోడు మోహన్‌బాబు చేసిన తాజా వ్యాఖ్యలు ‘ది ప్యారడైజ్’పై హైప్‌ను మరింత పెంచాయి.
