విజయవాడ,సెప్టెంబర్ 30 (జనవాణి): సినిమా విజయంతో జోష్‌లో ఉన్న నేచురల్ స్టార్ నాని, ‘ది ప్యారడైజ్’ చిత్ర బృందం విజయవాడ ఇంద్రకీలాద్రిపై కొలువైన శ్రీ కనకదుర్గ అమ్మవారిని దర్శించుకుంది. ప్రేక్షకుల నుంచి వస్తున్న అద్భుతమైన స్పందనకు కృతజ్ఞతగా నాని, దర్శకుడు శ్రీకాంత్ ఓదెలతో పాటు చిత్ర బృందం అమ్మవారి సన్నిధికి చేరుకుంది.
విజయవాడకు చేరుకున్న నానికి ఆలయ అధికారులు, వేద పండితులు ఘన స్వాగతం పలికారు. అనంతరం గర్భాలయంలో అమ్మవారిని దర్శించుకున్న నాని, శ్రీకాంత్ ఓదెల, చిత్ర బృందం ప్రత్యేక పూజలు నిర్వహించారు. వేద పండితులు నానికి వేదాశీర్వచనం అందించి, అమ్మవారి శేషవస్త్రాలు, తీర్థప్రసాదాలను అందజేశారు.
శ్రీకాంత్ ఓదెల దర్శకత్వంలో తెరకెక్కిన ‘ది ప్యారడైజ్’ భారీ అంచనాల మధ్య ప్రేక్షకుల ముందుకు వచ్చింది. విడుదలైన తొలిరోజు నుంచే బాక్సాఫీస్ వద్ద మంచి వసూళ్లను సాధిస్తూ దూసుకెళ్తోంది. తొలి రోజే రూ.80 కోట్లకు పైగా వసూలు చేసిన ఈ చిత్రం నాని కెరీర్‌లోనే బిగ్గెస్ట్ ఓపెనింగ్స్ సాధించిన సినిమాగా నిలిచింది. ప్రస్తుతం రూ.200 కోట్ల క్లబ్ దిశగా దూసుకెళ్తున్నట్లు చిత్ర బృందం తెలిపింది.
ఈ సినిమాలో నానికి జోడీగా కయాదు లోహర్ నటించింది. మోహన్ బాబు, సోనాలి కులకర్ణి, రాఘవ్ జుయల్, సంపూర్ణేశ్ బాబు తదితరులు కీలక పాత్రల్లో కనిపించారు. సినిమా సక్సెస్ నేపథ్యంలో నాని, ‘ది ప్యారడైజ్’ టీమ్ అమ్మవారిని దర్శించుకున్న దృశ్యాలు ప్రస్తుతం సోషల్ మీడియాలో వైరల్ అవుతున్నాయి.
Loading Tweet...
