సినిమా డెస్క్: పవన్ కళ్యాణ్ హీరోగా, దర్శకుడు సుజీత్ తెరకెక్కించిన యాక్షన్ ఎంటర్‌టైనర్ 'ఓజీ' బాక్సాఫీస్ వద్ద భారీ విజయాన్ని నమోదు చేసిన సంగతి తెలిసిందే. థియేటర్లలో ప్రేక్షకులను అలరించిన ఈ చిత్రం, తర్వాత ఓటీటీలోనూ మంచి ఆదరణ పొందింది. ఇప్పుడు ఈ సినిమా బుల్లితెర ప్రేక్షకులను అలరించేందుకు సిద్ధమవుతోంది.
ఈ చిత్రం శాటిలైట్ హక్కులను ఈటీవీ సొంతం చేసుకుంది. త్వరలోనే 'ఓజీ' టెలివిజన్ ప్రీమియర్‌ను ప్రసారం చేయనున్నట్లు ఛానెల్ ప్రకటించింది. అయితే ప్రసార తేదీని మాత్రం ఇంకా వెల్లడించలేదు. త్వరలోనే అధికారికంగా ప్రకటించే అవకాశం ఉంది.
గత ఏడాది సెప్టెంబర్ 25న విడుదలైన ఈ సినిమా తొలి షో నుంచే పాజిటివ్ టాక్ సొంతం చేసుకుంది. ముఖ్యంగా పవన్ కళ్యాణ్ స్క్రీన్ ప్రెజెన్స్, సుజీత్ స్టైలిష్ మేకింగ్, యాక్షన్ ఎపిసోడ్స్ అభిమానులను ఆకట్టుకున్నాయి. ట్రేడ్ వర్గాల సమాచారం ప్రకారం, తొలి రోజు ప్రపంచవ్యాప్తంగా రూ.150 కోట్లకు పైగా గ్రాస్ వసూలు చేసిన ఈ చిత్రం, ఫుల్ రన్‌లో రూ.300 కోట్లకు పైగా గ్రాస్ కలెక్షన్లు సాధించి కమర్షియల్ హిట్‌గా నిలిచింది.
సినిమాలో ప్రియాంక అరుళ్ మోహన్ కథానాయికగా నటించగా, ఇమ్రాన్ హష్మీ ప్రతినాయకుడి పాత్రలో కనిపించారు. కీలక పాత్రల్లో ప్రకాశ్ రాజ్, అర్జున్ దాస్, శ్రియా రెడ్డి నటించారు.
కథ విషయానికి వస్తే.. ఓజాస్ గంభీర (ఓజీ) అనే పాత్ర చుట్టూ సినిమా సాగుతుంది. అనుకోని పరిస్థితుల్లో ముంబై అండర్‌వర్ల్డ్‌లోకి అడుగుపెట్టిన ఓజీ, అక్కడి డాన్ సత్యదాదాకు అత్యంత నమ్మకమైన వ్యక్తిగా మారుతాడు. అయితే కొన్ని సంఘటనల కారణంగా అజ్ఞాతంలోకి వెళ్లిపోయిన అతడు, మళ్లీ ముంబైకి ఎందుకు తిరిగి వస్తాడు? అండర్‌వర్ల్డ్‌పై కన్నేసిన కొత్త శత్రువులను ఎలా ఎదుర్కొంటాడు? గతంలో జరిగిన సంఘటనలకు అసలు కారణమేంటి? అనే అంశాల చుట్టూ సినిమా కథ సాగుతుంది.
థియేటర్లు, ఓటీటీ తర్వాత ఇప్పుడు టెలివిజన్‌లోనూ 'ఓజీ'కి ఎలాంటి స్పందన వస్తుందో చూడాలని పవన్ కళ్యాణ్ అభిమానులు ఆసక్తిగా ఎదురుచూస్తున్నారు.
