సినిమా డెస్క్: పాన్ ఇండియా స్టార్ ప్రభాస్ నటిస్తున్న సినిమాల్లో ప్రస్తుతం అత్యధిక అంచనాలు నెలకొన్న చిత్రం 'స్పిరిట్'. దర్శకుడు *సందీప్ రెడ్డి వంగా* తెరకెక్కిస్తున్న ఈ యాక్షన్ ఎంటర్‌టైనర్‌కు సంబంధించిన ప్రతి అప్‌డేట్ సోషల్ మీడియాలో వైరల్ అవుతోంది. తాజాగా మేకర్స్ ప్రకటించిన ఓ ట్రేడ్ అప్‌డేట్ ఇప్పుడు సినీ పరిశ్రమలో చర్చనీయాంశంగా మారింది.
'స్పిరిట్' కర్ణాటక థియేట్రికల్ డిస్ట్రిబ్యూషన్ హక్కులను ఏషియన్ సురేష్ ఎంటర్‌టైన్మెంట్స్ భాగస్వామ్యంతో పీపుల్ మీడియా ఫ్యాక్టరీ విడుదల చేయనున్నట్లు అధికారికంగా ప్రకటించారు. దీంతో ఈ సినిమాపై ట్రేడ్ వర్గాల దృష్టి మరింత పెరిగింది.
దీనికి కారణం.. ఈ ఏడాది సంక్రాంతికి విడుదలైన 'ది రాజాసాబ్' బాక్సాఫీస్ వద్ద ఆశించిన ఫలితాన్ని అందుకోలేకపోవడం. ఆ సినిమాతో పీపుల్ మీడియా ఫ్యాక్టరీకి భారీ నష్టాలు వచ్చినట్లు ట్రేడ్ వర్గాల్లో చర్చ జరిగింది. అంతకుముందు 'ఆదిపురుష్' తెలుగు విడుదల కూడా ఆశించిన స్థాయిలో సక్సెస్ కాలేదు. దీంతో ఇప్పుడు 'స్పిరిట్' ఆ సంస్థకు బలమైన కంబ్యాక్ మూవీ అవుతుందా? అనే ఆసక్తి నెలకొంది.
సినిమా విషయానికి వస్తే.. ప్రభాస్ కెరీర్‌లో తొలిసారిగా పోలీస్ అధికారి పాత్రలో కనిపించనున్నారు. సందీప్ రెడ్డి వంగా స్టైల్‌లో ఈ పాత్రను అత్యంత పవర్‌ఫుల్‌గా తీర్చిదిద్దుతున్నట్లు ఇప్పటికే విడుదలైన పోస్టర్లు, ఆడియో గ్లింప్స్ స్పష్టం చేశాయి. ముఖ్యంగా "India's Biggest Superstar Prabhas" అంటూ విడుదలైన ఆడియో గ్లింప్స్ అభిమానుల్లో భారీ హైప్‌ను తీసుకొచ్చింది.
దాదాపు రూ.300 కోట్ల బడ్జెట్‌తో రూపొందుతున్న ఈ చిత్రాన్ని టీ-సిరీస్తో కలిసి *భద్రకాళి పిక్చర్స్* బ్యానర్‌పై ప్రణయ్ రెడ్డి వంగా నిర్మిస్తున్నారు. హీరోయిన్‌గా త్రిప్తి దిమ్రీ నటిస్తుండగా, విలన్‌గా వివేక్ ఒబెరాయ్ కనిపించనున్నారు. హర్షవర్ధన్ రామేశ్వరణ్ సంగీతం అందిస్తున్నారు.
ప్రస్తుతం సుమారు 40 శాతం చిత్రీకరణ పూర్తయిన ఈ సినిమా వచ్చే ఏడాది మార్చి 5న తెలుగు, హిందీ, తమిళం, కన్నడ, మలయాళంతో పాటు చైనీస్, జపనీస్, కొరియన్ భాషల్లో ప్రపంచవ్యాప్తంగా విడుదల కానుంది. విడుదలకు ఇంకా నెలల సమయం ఉన్నప్పటికీ, ఇప్పటికే వివిధ ప్రాంతాల డిస్ట్రిబ్యూషన్ హక్కుల కోసం పోటీ నెలకొనడం ఈ సినిమాపై ఉన్న భారీ అంచనాలకు నిదర్శనంగా సినీ వర్గాలు చెబుతున్నాయి.
