సినిమా డెస్క్, సెప్టెంబర్ 16 (జనవాణి): శివ నిర్వాణ దర్శకత్వంలో రవితేజ నటించిన లేటెస్ట్ మూవీ ‘ఇరుముడి’ బాక్సాఫీస్ వద్ద ఊహించని స్థాయిలో ప్రభంజనం సృష్టిస్తోంది. ఆగస్టు 21న ఎలాంటి టికెట్ ధరల పెంపు లేకుండా ప్రేక్షకుల ముందుకు వచ్చిన ఈ సినిమా విడుదలైన 26వ రోజుకీ రూ.1 కోటికి పైగా వసూళ్లు సాధిస్తున్నట్టు ట్రేడ్ వర్గాల అంచనా.
‘ఇరుముడి’ మూవీకి సుమారు రూ.20 కోట్ల థియేట్రికల్ బిజినెస్ జరిగినట్టు సమాచారం. అయితే తొలి రెండు రోజుల్లోనే బ్రేక్ ఈవెన్ దాటేసిన ఈ సినిమా ఇప్పటివరకు 26 రోజుల్లో రూ.240 కోట్లకు పైగా గ్రాస్ వసూళ్లు సాధించినట్టు తెలుస్తోంది. దీంతో బయ్యర్లకు రూ.100 కోట్లకు పైగా లాభాలు వచ్చినట్టు వార్తలు వినిపిస్తున్నాయి.
ఆన్‌లైన్ టికెట్ బుకింగ్ ప్లాట్‌ఫామ్‌లైన బుక్‌మైషో, డిస్ట్రిక్ట్ వంటి యాప్స్‌లో దాదాపు 50 లక్షల టికెట్లు అమ్ముడైనట్టు ప్రచారం జరుగుతోంది. ఈ లెక్క కూడా ‘ఇరుముడి’ సాధించిన భారీ క్రేజ్‌కు నిదర్శనంగా నిలుస్తోంది.
పార్కింగ్ ఫీజులతోనే రూ.10 కోట్లు?
‘ఇరుముడి’ విజయానికి సంబంధించి సోషల్ మీడియాలో మరో ఆసక్తికరమైన వార్త వైరల్ అవుతోంది. సినిమా ప్రదర్శిస్తున్న థియేటర్ల వద్ద పార్కింగ్ ఫీజుల రూపంలోనే సుమారు రూ.10 కోట్లు వసూలైనట్టు ప్రచారం జరుగుతోంది.
ముఖ్యంగా సింగిల్ స్క్రీన్ థియేటర్లలో ఈ సినిమా భారీగా ప్రేక్షకులను ఆకర్షిస్తోంది. సాధారణ టికెట్ ధరలు ఉండటంతో ఫ్యామిలీ ఆడియెన్స్‌తో పాటు పల్లె ప్రాంతాల నుంచి కూడా ప్రేక్షకులు పెద్ద సంఖ్యలో థియేటర్లకు వస్తున్నట్టు ట్రేడ్ వర్గాలు చెబుతున్నాయి. కొన్ని ప్రాంతాల్లో కుటుంబాలు, యువతతో పాటు ట్రాక్టర్లలో ప్రేక్షకులు థియేటర్లకు వచ్చిన దృశ్యాలు సోషల్ మీడియాలో వైరల్ అయ్యాయి.
సింగిల్ స్క్రీన్ థియేటర్లలో సాధారణంగా టూ వీలర్ పార్కింగ్‌కు రూ.20, ఫోర్ వీలర్‌కు రూ.40-50 వరకు వసూలు చేస్తుండటంతో నాలుగు వారాల లాంగ్ రన్‌లో పార్కింగ్ ద్వారా భారీ మొత్తమే వచ్చి ఉంటుందని ట్రేడ్ వర్గాలు అంచనా వేస్తున్నాయి. అయితే రూ.10 కోట్ల పార్కింగ్ ఆదాయానికి అధికారిక ధృవీకరణ లేదు.
20 ఏళ్ల తర్వాత మళ్లీ అదే సందడి..
ఓటీటీలు విస్తృతంగా అందుబాటులోకి రాకముందు సింగిల్ స్క్రీన్ థియేటర్ల వద్ద పెద్ద సినిమాలకు ఉండే సందడి ప్రత్యేకంగా ఉండేది. ‘సింహాద్రి’, ‘పోకిరి’ వంటి సినిమాల సమయంలో కనిపించిన ఆ వాతావరణం ‘ఇరుముడి’తో మళ్లీ కనిపిస్తోందని సినీ అభిమానులు, ట్రేడ్ వర్గాలు అభిప్రాయపడుతున్నాయి.
రవితేజకు జోడీగా ప్రియ భవానీ శంకర్ నటించగా, వారి కూతురి పాత్రలో బేబీ రక్షత్ర కీలక పాత్ర పోషించింది. సాయి కుమార్, అజయ్ ఘోష్, జబర్దస్త్ కొమరం, సామ్, స్వాసిక తదితరులు ఇతర ముఖ్య పాత్రల్లో కనిపించారు. జీ. వీ. ప్రకాశ్ కుమార్ సంగీతం అందించారు. ‘ఇరుముడి కట్టు’, ‘మల్లెపూల పల్లకి’, ‘యాలలో యాలలో’ వంటి పాటలు సినిమాకు అదనపు ఆకర్షణగా నిలిచినట్టు ప్రేక్షకుల స్పందన ద్వారా తెలుస్తోంది.
ఇక ఈ సినిమాకు రూ.7 కోట్ల రెమ్యూనరేషన్‌తో పాటు నైజాం రైట్స్ కూడా తీసుకున్న రవితేజకు సుమారు రూ.50 కోట్ల వరకు లాభం వచ్చిందనే ప్రచారం సోషల్ మీడియాలో జరుగుతోంది. అయితే ఈ గణాంకాలకు కూడా అధికారిక నిర్ధారణ లేదు.
