ఉదయం లేచిన దగ్గరి నుంచి రాత్రి పడుకునే వరకు.. స్మార్ట్‌ఫోన్‌ చాలామందికి నిత్య జీవితంలో భాగమైపోయింది. సోషల్‌ మీడియా, రీల్స్‌, వీడియోలు చూస్తూ గంటల తరబడి ఒకే భంగిమలో ఉండటం కూడా సాధారణమైంది. తాజాగా నటి షకీలా తన ఆరోగ్య పరిస్థితి గురించి వెల్లడించడంతో స్మార్ట్‌ఫోన్‌ వినియోగంపై మరోసారి చర్చ మొదలైంది.
షకీలా ఇటీవల తీవ్రమైన మెడ వెన్నుపూస సంబంధిత సమస్యతో మెడకు శస్త్రచికిత్స చేయించుకున్నారు. ఈ చికిత్సకు సుమారు రూ.3 లక్షలు ఖర్చయినట్లు సమాచారం. ఆసుపత్రి నుంచి ఇంటికి తిరిగి వచ్చిన అనంతరం తన యూట్యూబ్‌ ఛానల్‌లో వీడియో ద్వారా శస్త్రచికిత్స, ఆరోగ్య పరిస్థితి, ప్రస్తుతం కోలుకుంటున్న తీరును ఆమె వివరించారు. తాను ఎదుర్కొన్న పరిస్థితిని వివరిస్తూ.. ఎక్కువసేపు ఫోన్‌ చూస్తూ ఇలాంటి ఇబ్బందులు ఎదుర్కొనవద్దని ఆమె సూచించారు. దీంతో స్మార్ట్‌ఫోన్‌ను ఎక్కువగా ఉపయోగించే వారిలో ఈ అంశంపై ఆసక్తి పెరిగింది.
ఫోన్‌ ఎక్కువగా చూస్తే మెడపై ప్రభావం ఎలా ఉంటుంది?
స్మార్ట్‌ఫోన్‌ ఉపయోగించే సమయంలో చాలామంది తలను ముందుకు వంచి, మెడను ఒకే భంగిమలో ఎక్కువసేపు ఉంచుతుంటారు. మరికొందరు పక్కకు తిరిగి పడుకుని గంటల తరబడి ఫోన్‌ చూస్తుంటారు. ఇలాంటి భంగిమలు మెడ వెన్నెముక, చుట్టూ ఉన్న కండరాలపై అదనపు ఒత్తిడిని కలిగించవచ్చని నిపుణులు చెబుతున్నారు. తలను ముందుకు వంచి ఎక్కువసేపు ఫోన్‌ చూడటం వల్ల మెడ కండరాలు తల బరువును మోయడానికి మరింతగా పనిచేయాల్సి వస్తుంది. ఈ ఒత్తిడి పదేపదే కొనసాగితే మెడ నొప్పి, కండరాల అలసట వంటి సమస్యలు ఎదురయ్యే అవకాశం ఉంటుంది. ఇప్పటికే మెడ వెన్నుపూసకు సంబంధించిన సమస్యలు ఉన్నవారిలో ఈ ప్రభావం మరింత ఎక్కువగా ఉండొచ్చు. అయితే కేవలం స్మార్ట్‌ఫోన్‌ ఎక్కువగా ఉపయోగించడం వల్లే సర్జరీ అవసరమవుతుందని చెప్పలేం. వ్యక్తి ఆరోగ్య పరిస్థితి, ఇప్పటికే ఉన్న వెన్నెముక సమస్యలు, శారీరక భంగిమ వంటి అనేక అంశాలు దీనిపై ప్రభావం చూపవచ్చు.
ఫోన్‌ వాడేటప్పుడు ఈ జాగ్రత్తలు తీసుకోండి
స్మార్ట్‌ఫోన్‌ వినియోగాన్ని పూర్తిగా మానేయాల్సిన అవసరం లేకపోయినా.. ఎక్కువసేపు ఒకే భంగిమలో ఉండకుండా మధ్య మధ్యలో విరామాలు తీసుకోవడం మంచిది. ఫోన్‌ను కళ్లకు అనుకూలమైన ఎత్తులో ఉంచి మెడను ఎక్కువగా వంచకుండా చూసుకోవాలి. అలాగే పక్కకు తిరిగి పడుకుని గంటల తరబడి ఫోన్‌ చూడకుండా ఉండటం, మెడకు విశ్రాంతి ఇవ్వడం, నొప్పి లేదా ఇతర సమస్యలు కొనసాగితే వైద్యులను సంప్రదించడం వంటి జాగ్రత్తలు తీసుకోవడం మంచిది. షకీలా అనుభవం నేపథ్యంలో.. స్మార్ట్‌ఫోన్‌ వాడకం కంటే దాన్ని ఎలా, ఎంతసేపు ఉపయోగిస్తున్నామన్నదే ముఖ్యమని నిపుణుల సూచనలు మరోసారి గుర్తుచేస్తున్నాయి.
