హైదరాబాద్,సెప్టెంబర్ 21 (జనవాణి): హైదరాబాద్‌లోని మలక్‌పేట్‌లో పోలీస్ కానిస్టేబుల్ అనుమానాస్పద స్థితిలో మృతిచెందిన ఘటన కలకలం రేపుతోంది. మూసారాంబాగ్‌లోని శాలివాహన నగర్‌లో ఈ ఘటన చోటుచేసుకుంది. పోలీసుల వివరాల ప్రకారం కానిస్టేబుల్ ముత్తె చంద్రశేఖర్ (35) తన ఇంట్లో ఫ్యాన్‌కు ఉరేసుకుని మృతిచెందాడు.
చంద్రశేఖర్ చనిపోయే ముందు అర్ధరాత్రి ఓ యువతికి వీడియో కాల్ చేసినట్లు తెలుస్తోంది. తాను ఉరేసుకుంటున్నట్లు ఆమెకు చెప్పినట్లు సమాచారం. దీంతో ఆందోళనకు గురైన యువతి వెంటనే చైతన్యపురి పోలీసులకు సమాచారం అందించింది.
చైతన్యపురి పోలీసులు ఈ విషయాన్ని మలక్‌పేట్ పోలీసులకు తెలియజేయడంతో వారు వెంటనే చంద్రశేఖర్ నివాసానికి చేరుకున్నారు. ఇంట్లోకి వెళ్లి చూడగా అప్పటికే చంద్రశేఖర్ ఫ్యాన్‌కు వేలాడుతూ కనిపించాడు. దీంతో పోలీసులు మృతదేహాన్ని స్వాధీనం చేసుకుని పోస్టుమార్టం నిమిత్తం ప్రభుత్వ ఆస్పత్రికి తరలించారు.
ఈ ఘటనపై కేసు నమోదు చేసిన మలక్‌పేట్ పోలీసులు దర్యాప్తు చేపట్టారు. చంద్రశేఖర్ మృతికి అసలు కారణం ఏమిటనే దానిపై దర్యాప్తు కొనసాగుతోంది. మృతుడు అంబర్‌పేట్ హెడ్‌క్వార్టర్స్‌లో రైటర్‌గా విధులు నిర్వహిస్తున్నట్లు పోలీసులు తెలిపారు.
