హైదరాబాద్, సెప్టెంబర్ 29 (జనవాణి): హైదరాబాద్ ఎస్ఆర్ నగర్‌లోని గోకుల్ ప్రైడ్ ఓయో హోటల్‌లో మహిళ హత్య ఘటన తీవ్ర కలకలం రేపింది. హోటల్‌లోని 103వ నంబర్ గదిలో వికారాబాద్ జిల్లా ధరూర్ ప్రాంతానికి చెందిన శిరీష రక్తపు గాయాలతో మృతిచెందినట్లు పోలీసులు గుర్తించారు. ఆమెతో కలిసి హోటల్‌కు వచ్చిన వ్యక్తి కనిపించకుండా పోవడంతో అతడిపై పోలీసులు అనుమానం వ్యక్తం చేస్తున్నారు.
పోలీసుల వివరాల ప్రకారం.. శిరీష, శ్రీనివాస్ అనే వ్యక్తి రెండు రోజుల క్రితం హోటల్‌లో దిగారు. గదిని ‘సి. గణేష్’ పేరుతో బుక్ చేసినట్లు సమాచారం. మంగళవారం ఉదయం గది తలుపులు తెరుచుకోకపోవడంతో హోటల్ సిబ్బంది అనుమానం వ్యక్తం చేసి పోలీసులకు సమాచారం అందించారు. పోలీసుల సమక్షంలో గది తెరిచి చూడగా మంచంపై శిరీష విగతజీవిగా కనిపించింది.
గదిలో మద్యం, ఆహారం ఆనవాళ్లు
గదిలో మద్యం సేవించిన ఆనవాళ్లతో పాటు ఆహారం మధ్యలోనే వదిలేసినట్లు పోలీసులు గుర్తించారు. దీంతో శిరీష, శ్రీనివాస్ మధ్య ఏదైనా గొడవ జరిగిందా? ఆ వివాదమే హత్యకు దారితీసిందా? అనే కోణంలో దర్యాప్తు చేస్తున్నారు. గదిలో లభించిన వస్తువులు, సీసీటీవీ ఫుటేజ్‌, హోటల్ రిజిస్టర్‌, ఇతర ఆధారాలను పోలీసులు పరిశీలిస్తున్నారు.
మృతురాలి గుర్తింపుపైనా తొలుత కొంత గందరగోళం నెలకొంది. గదిలో లభించిన ఆధార్ కార్డులో ఆమె పేరు దుర్గగా ఉండగా గతంలో ఓ ప్రైవేట్ ఆస్పత్రిలో చికిత్స పొందిన రికార్డుల్లో శిరీషగా పేరు నమోదై ఉన్నట్లు పోలీసులు గుర్తించారు. అందుబాటులో ఉన్న ఆధారాలను పరిశీలించిన అనంతరం మృతురాలు శిరీషగా నిర్ధారించినట్లు సమాచారం.
పెళ్లి విషయంలో ఒత్తిడి కారణమా?
శిరీషకు 2013లో వివాహం కాగా 2016లో భర్త నుంచి విడాకులు తీసుకుని వేరుగా ఉంటున్నట్లు కుటుంబ సభ్యులు తెలిపారు. హైదరాబాద్‌లోని ఓ కస్టమర్ కేర్ సెంటర్‌లో ఆమె పనిచేస్తున్నట్లు సమాచారం. ఈ క్రమంలో తాండూరు మండలం ఓబులాపూర్‌కు చెందిన శ్రీనివాస్‌తో ఆమెకు పరిచయం ఏర్పడినట్లు పోలీసులు గుర్తించారు.
శ్రీనివాస్ తనను పెళ్లి చేసుకుంటానని నమ్మించడంతో ఇద్దరి మధ్య సన్నిహిత సంబంధం ఏర్పడినట్లు దర్యాప్తులో వెల్లడైనట్లు సమాచారం. ఈ నేపథ్యంలోనే ఇద్దరూ కలిసి హైదరాబాద్‌కు వచ్చి ఎస్ఆర్ నగర్‌లోని ఓయో హోటల్‌లో బస చేసినట్లు తెలుస్తోంది. పెళ్లి చేసుకోవాలని శిరీష ఒత్తిడి చేయడంతో ఇద్దరి మధ్య వివాదం జరిగి ఉండొచ్చని, ఆ క్రమంలోనే శ్రీనివాస్ ఆమెపై దాడి చేసి హత్య చేసి ఉండవచ్చని పోలీసులు అనుమానిస్తున్నారు. అయితే హత్యకు అసలు కారణం ఏంటనేది దర్యాప్తు పూర్తయిన తర్వాతే స్పష్టమవుతుంది.
శ్రీనివాస్ కోసం ప్రత్యేక బృందాల గాలింపు
శిరీషతో కలిసి హోటల్‌లోకి వచ్చిన శ్రీనివాస్ తెల్లవారుజామున గది నుంచి బయటకు వెళ్లినట్లు పోలీసులు అనుమానిస్తున్నారు. అనంతరం గది నుంచి వెళ్లిపోయే సమయంలో డబ్బులు చెల్లించి, శిరీష ఉదయం 9 గంటలకు వెళ్లిపోతుందని హోటల్ సిబ్బందికి చెప్పినట్లు సమాచారం. అయితే ఉదయం గది తలుపులు తెరుచుకోకపోవడంతో సిబ్బంది పోలీసులకు సమాచారం ఇచ్చారు.
ప్రస్తుతం శ్రీనివాస్ ఆచూకీ కోసం పోలీసులు ప్రత్యేక బృందాలతో గాలిస్తున్నారు. సీసీటీవీ ఫుటేజ్‌ ద్వారా అతడు హోటల్ నుంచి ఎప్పుడు బయటకు వెళ్లాడు? ఏ మార్గంలో వెళ్లాడు? ఎవరినైనా సంప్రదించాడా? అనే వివరాలను పోలీసులు సేకరిస్తున్నారు. శిరీష కుటుంబ సభ్యులను కూడా విచారిస్తున్నారు.
హోటల్ నిర్వహణపైనా పోలీసుల దృష్టి
మరోవైపు గోకుల్ ప్రైడ్ హోటల్‌లో నిబంధనలకు విరుద్ధంగా కార్యకలాపాలు జరుగుతున్నాయంటూ స్థానికుల నుంచి ఆరోపణలు వచ్చినట్లు సమాచారం. హోటల్‌లో అతిథుల వివరాల నమోదు, గుర్తింపు పత్రాల తనిఖీ, నిర్వహణ విధానం తదితర అంశాలపై పోలీసులు దృష్టి సారించారు. ఘటనకు సంబంధించిన అన్ని కోణాల్లో దర్యాప్తు కొనసాగిస్తున్నారు.
