సిద్దిపేట,అక్టోబర్ 6 (జనవాణి): సిద్దిపేట జిల్లాలో అవినీతి నిరోధక శాఖ (ఏసీబీ) అధికారులు లంచం కేసులో చర్యలు చేపట్టినట్లు సమాచారం. ఇంటి మ్యుటేషన్‌ కోసం లంచం డిమాండ్ చేసినట్లు వచ్చిన ఫిర్యాదు మేరకు ట్రాప్ నిర్వహించిన అధికారులు లంచం తీసుకుంటున్న గ్రామ కార్యదర్శి, కారొబార్‌ను పట్టుకున్నట్లు తెలుస్తోంది.
నారాయణరావుపేట మండలం జక్కాపూర్ గ్రామ కార్యదర్శిగా అరుణ విధులు నిర్వహిస్తున్నారు. ఓ ఇంటి మ్యుటేషన్‌ విషయంలో లంచం డిమాండ్ చేసినట్లు బాధితుడు ఏసీబీ అధికారులను ఆశ్రయించినట్లు సమాచారం. ఫిర్యాదును పరిశీలించిన అధికారులు పక్కా ప్రణాళికతో ట్రాప్‌కు సిద్ధమైనట్లు తెలుస్తోంది. బాధితుడి నుంచి రూ.15 వేల లంచం తీసుకుంటున్న సమయంలో గ్రామ కార్యదర్శి అరుణతో పాటు కారొబార్‌ను కూడా ఏసీబీ అధికారులు అదుపులోకి తీసుకున్నట్లు సమాచారం. లంచంగా తీసుకున్న నగదును స్వాధీనం చేసుకున్న అధికారులు అనంతరం జక్కాపూర్ గ్రామ పంచాయతీ కార్యాలయంలో తనిఖీలు చేపట్టినట్లు తెలుస్తోంది.
రికార్డులు, మ్యుటేషన్‌కు సంబంధించిన పత్రాల పరిశీలన
ట్రాప్ అనంతరం గ్రామ పంచాయతీ కార్యాలయంలోని రికార్డులు, మ్యుటేషన్‌కు సంబంధించిన పత్రాలను అధికారులు పరిశీలించినట్లు సమాచారం. అలాగే గ్రామ కార్యదర్శి అరుణ నివాసంలోనూ ఏసీబీ అధికారులు సోదాలు నిర్వహిస్తున్నట్లు తెలుస్తోంది. లంచం వ్యవహారానికి సంబంధించిన ఇతర వివరాలను కూడా అధికారులు పరిశీలిస్తున్నట్లు సమాచారం.
