హర్యానా, ఆగస్టు 24 (జనవాణి): హర్యానాలోని కురుక్షేత్రలో దారుణ హత్య కలకలం రేపింది. పెహోవా రోడ్ ప్రాంతంలోని అద్దె ఇంట్లో నివసిస్తున్న రాజేష్‌ను అతడి భార్య విమలా దేవి అత్యంత కిరాతకంగా హత్య చేసినట్లు పోలీసులు తెలిపారు. హత్య అనంతరం మృతదేహాన్ని కూడా ఆమె ఛిద్రం చేసినట్లు ప్రాథమిక దర్యాప్తులో వెల్లడైంది.
భర్తను హత్య చేసి మృతదేహాన్ని ఛిద్రం
ఉత్తరప్రదేశ్‌లోని సీతాపూర్ జిల్లా ధాంపూర్ గ్రామానికి చెందిన రాజేష్.. భార్య విమలా దేవితో కలిసి కొన్నేళ్లుగా కురుక్షేత్రలో నివసిస్తున్నాడు. స్థానిక నీటి సరఫరా సంస్థలో పనిచేస్తూ కుటుంబాన్ని పోషించేవాడు. ఈ దంపతులకు పిల్లలు లేకపోవడంతో తరచూ గొడవలు జరిగేవని సమాచారం. శనివారం వారి ఇంటి నుంచి పెద్ద శబ్ధాలు రావడంతో ఇంటి యజమాని రింకు పైకి వెళ్లాడు. గదిలోకి వెళ్లి చూడగా రాజేష్ రక్తపు మడుగులో పడి ఉండగా.. విమలా దేవి అతడి మృతదేహాన్ని కోస్తూ కనిపించింది. మృతుడి పొట్ట భాగంలో లోతైన గాయం ఉండగా, శరీరం నుంచి తీసిన పేగులను ఓ సంచిలో పెడుతున్నట్లు యజమాని గుర్తించాడు.
ఇంటి ఓనర్‌ను చూసి టెర్రస్‌పై నుంచి దూకిన మహిళ
ఈ దారుణ దృశ్యాన్ని ఇంటి యజమాని చూడటంతో విమలా దేవి తీవ్ర భయాందోళనకు గురైంది. వెంటనే భవనం టెర్రస్‌పైకి వెళ్లి అక్కడి నుంచి కిందకు దూకి ఆత్మహత్యాయత్నం చేసింది. తీవ్రంగా గాయపడిన ఆమెను పోలీసులు ఆసుపత్రికి తరలించి చికిత్స అందిస్తున్నారు.
మూడు కత్తులు స్వాధీనం
సమాచారం అందుకున్న పోలీసులు, ఫోరెన్సిక్ నిపుణులతో కలిసి ఘటనాస్థలానికి చేరుకున్నారు. అక్కడ రక్తంతో ఉన్న మూడు కత్తులను స్వాధీనం చేసుకున్నారు. మృతదేహాన్ని పరిశీలించగా కొన్ని అవయవాలు కనిపించకపోవడం పోలీసులను విస్తుపోయేలా చేసింది. ఫోరెన్సిక్ నిపుణుల ప్రకారం.. మృతుడి శరీరంలో సగం కాలేయం, కుడి మూత్రపిండం కనిపించలేదు. అలాగే పొట్టపై సుమారు 37 సెంటీమీటర్ల పొడవైన లోతైన కోత ఉన్నట్లు వెల్లడైంది.
మూఢనమ్మకాల కోణంలో దర్యాప్తు
విమలా దేవి గతంలో సంప్రదాయ వైద్యం, భూతవైద్యం వంటి పద్ధతులను అనుసరించేదని పోలీసులు అనుమానిస్తున్నారు. దంపతుల మధ్య మూఢనమ్మకాలకు సంబంధించిన అంశాలపై తరచూ గొడవలు జరిగేవని ప్రాథమిక దర్యాప్తులో తేలినట్లు సమాచారం. ప్రస్తుతం విమలా దేవి ఆసుపత్రిలో చికిత్స పొందుతోంది. ఆమె స్పృహలోకి వచ్చిన తర్వాత వాంగ్మూలం నమోదు చేయనున్నారు. పోస్టుమార్టం నివేదిక, ఫోరెన్సిక్ ఆధారాలు, నిందితురాలి వాంగ్మూలం ఆధారంగా హత్యకు అసలు కారణాన్ని నిర్ధారించేందుకు పోలీసులు దర్యాప్తు చేస్తున్నారు.
