హైదరాబాద్, సెప్టెంబర్ 22 (జనవాణి): యూట్యూబర్ నందన, ఆమె భర్త జాగర్లమూడి మధుకర్‌కు మరో షాక్ తగిలింది. యూకేలో ఉద్యోగాలు, వీసాలు ఇప్పిస్తామని నమ్మించి తమ నుంచి భారీగా నగదు వసూలు చేసి మోసం చేశారని ఆరోపిస్తూ పలువురు బాధితులు తెలంగాణ సీఎం ప్రజావాణిలో ఫిర్యాదు చేశారు. ఈ వ్యవహారంపై సమగ్ర దర్యాప్తు చేసి తమకు న్యాయం చేయాలని కోరారు.
రూ.25 లక్షల నుంచి రూ.95 లక్షల వరకు వసూలు చేశారంటూ ఆరోపణ
యూకే ప్రభుత్వం తమ కన్సల్టెన్సీకి ఉద్యోగుల నియామక ప్రక్రియ కోసం అనుమతులు ఇచ్చిందని నందన, మధుకర్ దంపతులు నమ్మబలికారని బాధితులు ఫిర్యాదులో పేర్కొన్నారు. ముఖ్యంగా స్టూడెంట్, విజిటర్ వీసాలపై యూకే వెళ్లి, వీసా గడువు ముగియనున్న వారిని లక్ష్యంగా చేసుకుని వర్క్ వీసాలు ఇప్పిస్తామని హామీ ఇచ్చారని ఆరోపించారు.
ఈ క్రమంలో ఒక్కొక్కరి నుంచి రూ.25 లక్షల నుంచి రూ.95 లక్షల వరకు వసూలు చేసినట్లు బాధితులు తెలిపారు. అయితే తమకు అందించిన కన్సల్టెన్సీ పత్రాలు నకిలీవని తేలడంతో ఇబ్బందులు ఎదుర్కొన్నామని ఆవేదన వ్యక్తం చేశారు. యూకే ప్రభుత్వం తమపై చర్యలు తీసుకున్నట్లు కూడా ఫిర్యాదులో పేర్కొన్నారు. బాధితుల్లో తెలంగాణలోని వికారాబాద్, జగిత్యాల, నిజామాబాద్ జిల్లాలకు చెందిన వారితో పాటు ఆంధ్రప్రదేశ్, గుజరాత్‌కు చెందిన వారు కూడా ఉన్నట్లు తెలిపారు.
బాధితులకు అండగా ఉంటామని అధికారుల హామీ
బాధితులు రాష్ట్ర ప్రణాళికా సంఘం వైస్ చైర్‌పర్సన్, ప్రజావాణి ఇన్‌చార్జ్ గద్వాల విజయలక్ష్మి, రాష్ట్ర నోడల్ ఆఫీసర్ విద్యాసాగర్, ఎన్ఆర్ఐ సలహా కమిటీ ఛైర్మన్ డాక్టర్ వినోద్ కుమార్‌ను కలిసి తమ సమస్యను వివరించారు. వారి నుంచి ఫిర్యాదు స్వీకరించిన అధికారులు ఈ వ్యవహారాన్ని రాష్ట్ర డీజీపీ, ఎన్‌ఫోర్స్‌మెంట్ డైరెక్టరేట్ (ఈడీ) దృష్టికి తీసుకెళ్లాలని సూచించినట్లు బాధితులు తెలిపారు. దర్యాప్తునకు తమవంతు సహకారం అందిస్తామని అధికారులు హామీ ఇచ్చినట్లు చెప్పారు.
ఈ నెల 7న నందన అరెస్ట్
మరోవైపు, యూట్యూబర్ నందనను ఈ నెల 7న శంషాబాద్‌లోని రాజీవ్ గాంధీ అంతర్జాతీయ విమానాశ్రయంలో పోలీసులు అదుపులోకి తీసుకున్నారు. ఆమెపై గతంలో లుకౌట్ నోటీసులు జారీ కావడంతో విమానాశ్రయంలో గుర్తించిన పోలీసులు అదుపులోకి తీసుకున్నట్లు సమాచారం. అనంతరం ఏపీలోని కృష్ణా జిల్లా ఇబ్రహీంపట్నం పోలీసులకు సమాచారం అందించారు. అక్కడి పోలీసులు విమానాశ్రయానికి చేరుకుని నందనను అదుపులోకి తీసుకున్నారు. విచారణ అనంతరం వివరాలు సేకరించి నోటీసులు ఇచ్చి ఆమెను విడిచిపెట్టినట్లు తెలిసింది.
2025 నవంబర్‌లో కేసు నమోదు
యూకేలో నివసిస్తూ యూట్యూబ్ వీడియోలు చేసే గుంటూరుకు చెందిన రమానందన అలియాస్ నందన కుటుంబ సభ్యులపై ఇబ్రహీంపట్నం పోలీస్‌స్టేషన్‌లో గతంలో కేసు నమోదైంది. మామిళ్లపల్లి శివక్రాంతి కుమార్ చేసిన ఫిర్యాదు ఆధారంగా 2025 నవంబర్ 22న కేసు నమోదు చేసినట్లు పోలీసులు గతంలో వెల్లడించారు.
ఫిర్యాదు ప్రకారం నందన భర్త జాగర్లమూడి మధుకర్ యూకేలో ‘ది డెస్టినీ రిక్రూట్‌మెంట్ – స్టాఫింగ్ సొల్యూషన్స్’ సంస్థ ఎండీగా పనిచేస్తున్నారని, యూకే వీసా రెన్యువల్‌తో పాటు ఉద్యోగ అవకాశం, ‘సర్టిఫికేట్ ఆఫ్ స్పాన్సర్‌షిప్’ (CoS) ఇప్పిస్తామని చెప్పారని శివక్రాంతి కుమార్ ఆరోపించారు.
రూ.15 లక్షలు చెల్లించానని ఫిర్యాదు
వీసా గడువు ముగియనున్న నేపథ్యంలో 2024లో మధుకర్, నందన, ఆమె తండ్రి మోహన్‌రావును సంప్రదించానని శివక్రాంతి కుమార్ తెలిపారు. వీసా రెన్యువల్, ఉద్యోగ అవకాశం కోసం రూ.15 లక్షలు ఖర్చవుతుందని చెప్పడంతో 2024 ఏప్రిల్ 2న మధుకర్ ఖాతాలో ఆ మొత్తాన్ని జమ చేసినట్లు ఫిర్యాదులో పేర్కొన్నారు.
అయితే నెలలు గడిచినా వీసా రాకపోవడంతో నిలదీయగా CoS ఇచ్చారని, దానిని తీసుకుని ఉద్యోగం కోసం ఓ కంపెనీని సంప్రదించగా అది నకిలీదని, చెల్లదని తెలిసిందని ఆయన ఆరోపించారు. అనంతరం నందన కుటుంబ సభ్యులను ప్రశ్నించగా రూ.2 లక్షలు తిరిగి ఇచ్చారని, మిగిలిన డబ్బు ఇవ్వలేదని ఫిర్యాదులో పేర్కొన్నారు. ఈ ఫిర్యాదు ఆధారంగా మధుకర్‌ను ఏ–1గా, నందనను ఏ–2గా, ఆమె తండ్రి మోహన్‌రావును ఏ–3గా పేర్కొంటూ కేసు నంబర్ 515/2025 నమోదు చేసినట్లు అప్పట్లో ఇబ్రహీంపట్నం పోలీసులు వెల్లడించారు.
