NEET PG 2026 Results: వైద్య విద్యార్థులకు కీలక అప్డేట్ వచ్చింది. నేషనల్ బోర్డ్ ఆఫ్ ఎగ్జామినేషన్స్ ఇన్ మెడికల్ సైన్సెస్ (NBEMS) NEET PG 2026 ఫలితాలను సెప్టెంబర్ 24న విడుదల చేసింది. 2026-27 విద్యా సంవత్సరంలో వివిధ పోస్ట్ గ్రాడ్యుయేట్ వైద్య కోర్సుల్లో ప్రవేశాల కోసం నిర్వహించిన ఈ పరీక్షకు హాజరైన అభ్యర్థులు తమ ఫలితాలు, ర్యాంకును అధికారిక NBEMS వెబ్‌సైట్‌లో చెక్ చేసుకోవచ్చు.
NEET PG 2026 పరీక్షను NBEMS ఆగస్టు 30న కంప్యూటర్ ఆధారిత విధానంలో నిర్వహించింది. దేశవ్యాప్తంగా 339 నగరాల్లోని 1,111 పరీక్షా కేంద్రాల్లో పరీక్ష జరిగింది. ఈ పరీక్షకు మొత్తం 2,63,544 మంది అభ్యర్థులు హాజరయ్యారు.
అయితే జైపూర్‌లోని రెండు పరీక్షా కేంద్రాల్లో అంతర్గత విద్యుత్ అంతరాయం ఏర్పడటంతో కొందరు అభ్యర్థులు పరీక్షను పూర్తి చేయలేకపోయారు. దీంతో ప్రభావిత అభ్యర్థుల కోసం NBEMS సెప్టెంబర్ 5న పునఃపరీక్ష నిర్వహించింది. ఈ రీ-ఎగ్జామ్‌కు 2,416 మంది అభ్యర్థులు హాజరయ్యారు.
ఫలితాలు ఇలా చెక్ చేసుకోండి
NEET PG 2026 పరీక్షకు హాజరైన అభ్యర్థులు తమ ఫలితాలు, ర్యాంకును NBEMS అధికారిక వెబ్‌సైట్ natboard.edu.inలో చెక్ చేసుకోవచ్చు. ఫలితాల కోసం వెబ్‌సైట్‌లోని NEET PG సంబంధిత విభాగాన్ని ఓపెన్ చేసి, అడిగిన వివరాలను నమోదు చేస్తే స్కోర్, ర్యాంక్ వివరాలను చూడవచ్చు.
