భోపాల్,సెప్టెంబర్ 22 (జనవాణి): మధ్యప్రదేశ్‌లో నవరాత్రి గర్భా వేడుకలపై రాజకీయ వివాదం ముదురుతోంది. భోపాల్‌లో జరిగిన ఓ బహిరంగ కార్యక్రమంలో హుజూర్ నియోజకవర్గ బీజేపీ ఎమ్మెల్యే రమేశ్వర్ శర్మ ముస్లింల గర్భా పాల్గొనడంపై చేసిన వ్యాఖ్యలు చర్చనీయాంశంగా మారాయి.
ముస్లిం యువకులు గర్భా వేడుకలకు రావాలనుకుంటే రావచ్చని శర్మ అన్నారు. అయితే వారు ఒంటరిగా రావద్దని, తమ అక్కాచెల్లెళ్లు, కుమార్తెలను కూడా వెంట తీసుకురావాలని వ్యాఖ్యానించారు. ‘ముస్లిం యువకులు గర్భాకు ఒంటరిగా ఎందుకు రావాలి? వారు తమ అక్కాచెల్లెళ్లు, కుమార్తెలను కూడా తీసుకురావాలి. మా యువకులు కూడా సిద్ధంగా ఉన్నారు’ అంటూ ఆయన వ్యాఖ్యలు చేశారు. ఈ వ్యాఖ్యలపై పలు రాజకీయ వర్గాల నుంచి విమర్శలు వచ్చాయి. అదే సమయంలో ముస్లింలు గర్భాకు రావడమే కాకుండా శాశ్వతంగా తమతో కలవాలనుకుంటే అభ్యంతరం లేదని శర్మ అన్నారు. ఇందుకోసం తిలకం ధరించి, ‘జై శ్రీరామ్’ నినాదాలు చేయాలని, గోమాతను రక్షించాలని ఆయన పేర్కొన్నారు. ఈ వ్యాఖ్యలు కూడా రాజకీయంగా వివాదానికి దారితీశాయి.
శర్మ వ్యాఖ్యలపై భోపాల్ సెంట్రల్ కాంగ్రెస్ ఎమ్మెల్యే ఆరిఫ్ మసూద్ తీవ్రంగా స్పందించారు. ఇలాంటి వ్యాఖ్యలు మతపరమైన కార్యక్రమాల వాతావరణాన్ని దెబ్బతీస్తాయని ఆయన విమర్శించారు. తన భాషను మార్చుకోవాలని రమేశ్వర్ శర్మకు సూచించారు.
ఏఐఎంఐఎం మధ్యప్రదేశ్ అధ్యక్షుడు మొహ్సిన్ అలీ ఖాన్ కూడా శర్మ వ్యాఖ్యలపై అభ్యంతరం వ్యక్తం చేసినట్లు పలు నివేదికలు పేర్కొన్నాయి. గర్భా వేడుకల్లో పాల్గొనడం, మతపరమైన గుర్తింపులు వంటి అంశాలపై మధ్యప్రదేశ్‌లో ఇప్పటికే రాజకీయ చర్చ కొనసాగుతున్న నేపథ్యంలో తాజా వ్యాఖ్యలు మరింత వివాదానికి కారణమయ్యాయి.
