చెన్నై, ఆగస్టు 29 (జనవాణి): తమిళనాడు ముఖ్యమంత్రి జోసెఫ్ విజయ్ పుఝల్ సెంట్రల్ జైలులో ఆకస్మిక తనిఖీ నిర్వహించారు. శుక్రవారం పుఝల్ సెంట్రల్ ప్రిజన్-1కు వెళ్లిన సీఎం.. జైలులోని పలు విభాగాలను స్వయంగా పరిశీలించారు. ఖైదీలకు అందుతున్న సదుపాయాలు, వైద్యం, ఆహారం, విద్య, వృత్తి శిక్షణ తదితర అంశాలపై అధికారులను వివరాలు అడిగి తెలుసుకున్నారు. తనిఖీలో భాగంగా క్వారంటైన్ ప్రాంతం, సందర్శకుల హాల్, జైలు ఆసుపత్రి, డ్రగ్ డీ-అడిక్షన్ అండ్ రిహాబిలిటేషన్ సెంటర్‌ను సీఎం విజయ్ సందర్శించారు. మహాత్మా గాంధీ కమ్యూనిటీ కాలేజీ తరగతి గదులు, లైబ్రరీ, అడ్వాన్స్‌డ్ కంప్యూటర్ ట్రైనింగ్ సెంటర్‌ను కూడా పరిశీలించారు. హై-సెక్యూరిటీ బ్లాక్‌తో పాటు ఉరిశిక్ష అమలు చేసే ప్రాంతాన్ని సైతం ఆయన చూశారు.
ఖైదీలతో నేరుగా మాట్లాడిన సీఎం
జైలు తనిఖీ సందర్భంగా ఖైదీలతో సీఎం విజయ్ నేరుగా మాట్లాడారు. వారికి అందుతున్న సదుపాయాలు, ఎదుర్కొంటున్న సమస్యలు, అవసరాల గురించి అడిగి తెలుసుకున్నారు. ఖైదీలకు కేవలం శిక్ష విధించడం మాత్రమే కాకుండా విద్య, నైపుణ్యాభివృద్ధి, వృత్తి శిక్షణ ద్వారా పునరావాసానికి అవకాశాలు కల్పించాలని అధికారులను ఆదేశించారు. జైలులో పుస్తకాల లభ్యతను మరింత పెంచాలని సూచించిన సీఎం.. ఖైదీలకు చదువు, నైపుణ్య శిక్షణతో పాటు వారి ఆసక్తులకు అనుగుణంగా వివిధ కార్యకలాపాలను అందుబాటులోకి తీసుకురావాలని పేర్కొన్నారు.
ఖైదీలు తయారు చేస్తున్న వస్తువుల పరిశీలన
పుఝల్ జైలులోని వృత్తి శిక్షణ కేంద్రాన్ని కూడా సీఎం విజయ్ సందర్శించారు. ఖైదీలు తయారు చేసిన ఇనుప ర్యాకులు, పేపర్ కవర్లు, ఆఫీస్ ఫైల్ బోర్డులను పరిశీలించారు. హ్యాండ్లూమ్, టైలరింగ్ విభాగాల్లో తయారవుతున్న వస్తువులను కూడా చూశారు. అలాగే ఖైదీలకు అందిస్తున్న ఆహారం నాణ్యతను సీఎం స్వయంగా తనిఖీ చేశారు. జైలు నిర్వహణలో నాణ్యత, ఖైదీల సంక్షేమానికి ప్రాధాన్యం ఇవ్వాలని అధికారులకు సూచించారు.
ముఖ్యమంత్రిగా బాధ్యతలు చేపట్టిన తర్వాత ప్రభుత్వ సంస్థల్లో ఆకస్మిక తనిఖీలకు విజయ్ ప్రాధాన్యం ఇస్తున్నారు. గతంలో ప్రభుత్వ చిన్నారుల ఆసుపత్రి, దళిత విద్యార్థుల ప్రభుత్వ హాస్టల్‌ను కూడా ఆయన ఆకస్మికంగా సందర్శించి అక్కడి పరిస్థితులను పరిశీలించారు.
