ఫుకెట్ నుంచి ఢిల్లీకి ప్రయాణిస్తున్న ఎయిర్ ఇండియా AI-2379 విమానంలో భయానక ఘటన చోటుచేసుకుంది. ప్రయాణం మధ్యలో విమానం తీవ్ర గాలుల ప్రకంపనలకు (టర్బులెన్స్) గురికావడంతో ఒక్కసారిగా సుమారు 300 అడుగుల మేర కిందికి పడిపోయినట్లు సమాచారం. దీంతో విమానంలో ఉన్న ప్రయాణికులు తీవ్ర భయాందోళనకు గురయ్యారు.
ఈ ఘటనలో 10 మంది ప్రయాణికులు, నలుగురు క్యాబిన్ సిబ్బంది గాయపడినట్లు ప్రాథమిక సమాచారం. విమానం అనంతరం సురక్షితంగా ఢిల్లీలోని ఇందిరా గాంధీ అంతర్జాతీయ విమానాశ్రయం (IGI) లో ల్యాండ్ అయింది. అక్కడ సిద్ధంగా ఉన్న వైద్య బృందాలు గాయపడిన వారికి ప్రాథమిక చికిత్స అందించి, అవసరమైన వారిని అంబులెన్స్‌లలో సమీప ఆస్పత్రులకు తరలించాయి.
ఘటన సమయంలో విమానంలో ఉన్న ఓ ప్రయాణికుడు భయానక అనుభవాన్ని వివరించారు. విమానం ఒక్కసారిగా కిందికి పడిపోవడంతో మేమంతా పైకప్పుకు తాకి మళ్లీ కిందపడ్డాం. ఒక వ్యక్తి చేతిలో నుంచి చిన్న పాప ఎగిరి మూడు సీట్ల దూరంలో పడిందని ఆయన తెలిపారు.
టర్బులెన్స్ కారణంగా విమానంలో ప్రయాణికుల సామాను కూడా చెల్లాచెదురైందని సమాచారం. ఘటనకు సంబంధించిన వీడియోలు, ఫోటోలు సోషల్ మీడియాలో వైరల్ అవుతున్నాయి.
