Earthquake | సెప్టెంబర్ 03 (జనవాణి): టిబెట్‌లో మరోసారి భూప్రకంపనలు కలకలం రేపాయి. గురువారం మధ్యాహ్నం సంభవించిన భూకంపం రిక్టర్ స్కేలుపై 5.0 తీవ్రతతో నమోదైంది. భూమికి సుమారు 10 కిలోమీటర్ల లోతులో ప్రకంపనలు సంభవించినట్లు జర్మన్ రీసెర్చ్ సెంటర్ ఫర్ జియోసైన్సెస్ (GFZ) అధికారులు వెల్లడించారు. ప్రస్తుతం అందిన సమాచారం ప్రకారం ఈ భూకంపం కారణంగా ఎలాంటి ప్రాణనష్టం సంభవించలేదు. అయితే ప్రకంపనలతో స్థానికులు భయాందోళనకు గురయ్యారు.
కాగా, టిబెట్‌లో ఇటీవల సంభవించిన ప్రకృతి విపత్తు నుంచి ప్రజలు పూర్తిగా కోలుకోకముందే ఈ భూకంపం చోటుచేసుకుంది. ఆగస్టు 26న హిమానీనదం కూలిపోవడంతో ఆకస్మిక వరదలు సంభవించాయి. నేపాల్ సరిహద్దుకు సమీపంలోని ప్రాంతాల్లో ఈ వరదల ప్రభావం తీవ్రంగా కనిపించింది. భారీ వరదల కారణంగా పలు పట్టణాలు, లోయలు తీవ్రంగా దెబ్బతిన్నాయి. వందలాది మంది ప్రాణాలు కోల్పోగా, వేలాది మంది గల్లంతైనట్లు సమాచారం. ఈ విషాదం తర్వాత తాజాగా 5.0 తీవ్రతతో భూకంపం సంభవించడం టిబెట్‌లో మరోసారి ఆందోళనకు కారణమైంది.
