హైదరాబాద్, సెప్టెంబర్ 01 (జనవాణి): తెలంగాణలో రాజకీయ ఉద్రిక్తతలు కొనసాగుతున్నాయి. నల్లగొండ జిల్లా బీజేపీ అధ్యక్షుడు నాగం వర్షిత్ రెడ్డి ఇంటిపై దాడి జరిగిన నేపథ్యంలో ఆయనను పరామర్శించేందుకు వెళ్లిన బీజేపీ రాష్ట్ర అధ్యక్షుడు రామచందర్ రావును పోలీసులు అరెస్ట్ చేశారు. తార్నాకలోని రామచందర్ రావు నివాసం వద్ద మంగళవారం తెల్లవారుజాము నుంచే పోలీసులు భారీగా మోహరించారు. ఆయన నల్లగొండ జిల్లాకు వెళ్లకుండా అడ్డుకుని హౌస్ అరెస్ట్ చేశారు. ఈ విషయం తెలుసుకున్న బీజేపీ నేతలు, కార్యకర్తలు పెద్ద సంఖ్యలో ఆయన నివాసానికి చేరుకున్నారు. అనంతరం ఉదయం 10 గంటల సమయంలో నల్లగొండకు బయలుదేరిన రామచందర్ రావును పోలీసులు అదుపులోకి తీసుకున్నారు.
ఈ సందర్భంగా రామచందర్ రావు కాంగ్రెస్ ప్రభుత్వంపై తీవ్ర ఆరోపణలు చేశారు. ప్రజాస్వామ్యంలో ఇళ్లు, కార్యాలయాలపై దాడులు చేయడం సరికాదని అన్నారు. బీజేపీని రెచ్చగొట్టేలా ప్రభుత్వం వ్యవహరిస్తే తగిన మూల్యం చెల్లించుకోవాల్సి వస్తుందని హెచ్చరించారు. రాష్ట్రంలో శాంతిభద్రతలు క్షీణించాయని, ప్రజాస్వామ్యం ఖూనీ అవుతోందని ఆయన ఆరోపించారు. ప్రజాస్వామ్యాన్ని గౌరవించాలని ప్రభుత్వానికి సూచించారు. రాష్ట్రంలో ప్రజాస్వామ్యాన్ని రక్షించాలంటే కాంగ్రెస్ పార్టీని ఓడించాల్సిన అవసరం ఉందని రామచందర్ రావు స్పష్టం చేశారు.
వర్షిత్ రెడ్డి ఇంటిపై దాడి
నల్లగొండ జిల్లా బీజేపీ అధ్యక్షుడు నాగం వర్షిత్ రెడ్డి ఇంటిపై సోమవారం సాయంత్రం దాడి జరిగినట్లు బీజేపీ వర్గాలు ఆరోపించాయి. కాంగ్రెస్ కార్యకర్తలు ఇంట్లోకి ప్రవేశించి ఫర్నీచర్ ధ్వంసం చేశారని, కిటికీల అద్దాలు పగులగొట్టారని పేర్కొన్నారు. కుటుంబ సభ్యులపై కూడా దాడి జరిగిందని, ఈ ఘటనలో వర్షిత్ రెడ్డి తల్లికి స్వల్ప గాయాలయ్యాయని తెలిపారు. మంత్రి కోమటిరెడ్డి వెంకట్ రెడ్డి కార్యాలయంపై బీజేపీ నేతలు దాడి చేసిన ఘటనకు ప్రతిగా ఈ దాడి జరిగినట్లు రాజకీయ వర్గాల్లో చర్చ జరుగుతోంది. ఈ పరిణామాల నేపథ్యంలో ఇరు పార్టీల మధ్య ఉద్రిక్తత మరింత పెరిగింది.
