న్యూఢిల్లీ, ఆగస్టు 6 (జనవాణి): ప్రాణహిత నదిపై తుమ్మిడిహెట్టి ప్రాజెక్టు ఎత్తు పెంపు అంశంపై ముఖ్యమంత్రి ఎ. రేవంత్ రెడ్డి కేంద్ర జల్ శక్తి మంత్రి సీఆర్ పాటిల్‌తో కీలకంగా చర్చించారు. తుమ్మిడిహెట్టి బ్యారేజీ ఎత్తును 150 మీటర్లకు పెంచేందుకు మహారాష్ట్రతో చర్చలు జరిపి అంగీకారం సాధించేందుకు కేంద్రం జోక్యం చేసుకోవాలని సీఎం విజ్ఞప్తి చేశారు. ఈ సమావేశంలో నీటిపారుదల శాఖ మంత్రి ఎన్. ఉత్తమ్ కుమార్ రెడ్డి, పలువురు ఎంపీలు పాల్గొన్నారు.
148 మీటర్లకు ఇప్పటికే అంగీకారం
తుమ్మిడిహెట్టి వద్ద 148 మీటర్ల ఎత్తుతో బ్యారేజీ నిర్మాణానికి గతంలోనే మహారాష్ట్ర అంగీకరించిన విషయాన్ని ముఖ్యమంత్రి కేంద్ర మంత్రి దృష్టికి తీసుకెళ్లారు. ప్రస్తుతం ప్రాజెక్టు ప్రయోజనాలను దృష్టిలో ఉంచుకుని ఎత్తును 150 మీటర్లకు పెంచేందుకు మహారాష్ట్రను ఒప్పించాలని కోరారు.
ముంపు పెద్దగా పెరగదన్న సీఎం
బ్యారేజీ ఎత్తును 150 మీటర్లకు పెంచినా ముంపు ప్రభావం 1,000 హెక్టార్ల లోపే ఉంటుందని సీఎం రేవంత్ రెడ్డి కేంద్ర మంత్రి సీఆర్ పాటిల్‌కు వివరించారు. దీంతో ప్రాజెక్టు అమలుకు పెద్దగా అవరోధాలు ఉండవని పేర్కొన్నారు.
గ్రావిటీతోనే నీటి సరఫరా
తుమ్మిడిహెట్టి బ్యారేజీ ఎత్తు పెంపుతో ఎత్తిపోతల అవసరం లేకుండా గ్రావిటీ ద్వారానే నీటిని సరఫరా చేసే అవకాశం ఉంటుందని ముఖ్యమంత్రి వివరించారు. దీనివల్ల విద్యుత్ వినియోగం తగ్గడంతో పాటు ప్రాజెక్టు నిర్వహణ వ్యయం కూడా గణనీయంగా తగ్గుతుందని కేంద్ర మంత్రి దృష్టికి తీసుకెళ్లారు.
చర్చల ప్రక్రియకు కేంద్రం హామీ
తుమ్మిడిహెట్టి అంశంపై తెలంగాణ, మహారాష్ట్ర మధ్య అధికారుల స్థాయి చర్చలు ప్రారంభించి, అనంతరం రెండు రాష్ట్రాల మంత్రుల సమావేశం ఏర్పాటు చేసే దిశగా చర్యలు తీసుకుంటామని కేంద్ర జల్ శక్తి మంత్రి సీఆర్ పాటిల్ ముఖ్యమంత్రికి హామీ ఇచ్చినట్లు సమాచారం.
