హైదరాబాద్, అక్టోబర్ 1 (జనవాణి): తెలంగాణ సచివాలయంలో రాష్ట్ర కేబినెట్ సమావేశం సందర్భంగా ఆసక్తికర పరిణామం చోటుచేసుకుంది. రాష్ట్ర ప్రణాళికా మండలి వైస్ చైర్మన్‌గా ఇటీవల బాధ్యతలు స్వీకరించిన గద్వాల విజయలక్ష్మికి కేబినెట్ భేటీలో పాల్గొనే అవకాశం దక్కలేదు. సమావేశానికి హాజరయ్యేందుకు సచివాలయానికి వచ్చిన ఆమెను అధికారులు సమావేశ మందిరంలోకి అనుమతించలేదు.
సంప్రదాయానికి భిన్నంగా..
రాష్ట్ర ప్రణాళికా మండలి వైస్ చైర్మన్‌ను కేబినెట్ సమావేశాలకు ఆహ్వానించడం గతంలో ఆనవాయితీగా కొనసాగినట్లు తెలుస్తోంది. గత ప్రభుత్వ హయాంలో నిరంజన్ రెడ్డి, బోయినపల్లి వినోద్ కుమార్ ఈ బాధ్యతల్లో ఉన్న సమయంలో కేబినెట్ సమావేశాలకు హాజరయ్యేవారు. కాంగ్రెస్ ప్రభుత్వం అధికారంలోకి వచ్చిన తర్వాత కూడా చిన్నారెడ్డి ప్రణాళికా మండలి వైస్ చైర్మన్‌గా ఉన్న సమయంలో కేబినెట్ సమావేశాలకు ఆహ్వానం అందినట్లు సమాచారం. అయితే గద్వాల విజయలక్ష్మి బాధ్యతలు చేపట్టిన తర్వాత జరిగిన తొలి కేబినెట్ సమావేశంలో ఈ విధానం కొనసాగలేదు.
సమావేశ మందిరం వద్ద ఏం జరిగింది?
నిర్ణీత సమయానికి సచివాలయానికి చేరుకున్న విజయలక్ష్మి కేబినెట్ సమావేశ మందిరంలోకి వెళ్లేందుకు ప్రయత్నించారు. అయితే భద్రతా, ప్రోటోకాల్ అధికారులు ఆమెను అడ్డుకున్నారు. సమావేశానికి సంబంధించి తన పేరు ఆహ్వానితుల జాబితాలో లేదని అధికారులు స్పష్టం చేసినట్లు సమాచారం. దీంతో విజయలక్ష్మి అక్కడి నుంచి ముఖ్యమంత్రి కార్యాలయం (సీఎంవో)కు వెళ్లి ఉన్నతాధికారులను సంప్రదించినట్లు తెలుస్తోంది. తనకు కేబినెట్ సమావేశానికి ఎందుకు ఆహ్వానం అందలేదనే విషయంపై ఆమె ఆరా తీసినట్లు సమాచారం.
సీఎంవోలోనూ స్పష్టత కరువు
అయితే సీఎంవో అధికారులు సైతం ఈ అంశంపై తమకు ముందస్తు సమాచారం లేదని చెప్పినట్లు తెలుస్తోంది. దీంతో సమావేశానికి హాజరుకాకుండానే విజయలక్ష్మి వెనుదిరిగారు. ప్లానింగ్ బోర్డు వైస్ చైర్మన్ హోదాలో ఉన్న వ్యక్తికి కేబినెట్ సమావేశానికి ఆహ్వానం అందకపోవడం, సమావేశ మందిరంలోకి అనుమతి నిరాకరించడం ప్రస్తుతం సచివాలయ వర్గాల్లో చర్చకు దారితీసింది. ఇది ఉద్దేశపూర్వక నిర్ణయమా, ప్రోటోకాల్‌కు సంబంధించిన సమన్వయ లోపమా అన్న దానిపై మాత్రం స్పష్టత రావాల్సి ఉంది.
