హైదరాబాద్, సెప్టెంబర్ 22 (జనవాణి): హైదరాబాద్‌లో గణేశ్ నిమజ్జనానికి ఏర్పాట్లు ముమ్మరంగా కొనసాగుతున్నాయి. ఈ నెల 25న నెక్లెస్ రోడ్, ట్యాంక్ బండ్, ఎన్టీఆర్ మార్గ్‌ ప్రాంతాల్లో గణేశ్ విగ్రహాల నిమజ్జనం జరగనుంది. నిమజ్జన వేడుకలను వీక్షించేందుకు నగరంలోని వివిధ ప్రాంతాల నుంచి భక్తులు భారీ సంఖ్యలో తరలివచ్చే అవకాశం ఉంది.
ఈ నేపథ్యంలో ప్రయాణికుల రద్దీని దృష్టిలో ఉంచుకుని దక్షిణ మధ్య రైల్వే అదనపు ఎంఎంటీఎస్ సర్వీసులను నడపాలని నిర్ణయించింది. ఈ ప్రత్యేక రైళ్లు సెప్టెంబర్ 25, 26 తేదీల్లో రాత్రి 11 గంటల నుంచి తెల్లవారుజాము 5 గంటల వరకు అందుబాటులో ఉంటాయి.
సికింద్రాబాద్, హైదరాబాద్, లింగంపల్లి, ఫలక్‌నుమా మధ్య ఈ ప్రత్యేక ఎంఎంటీఎస్ సర్వీసులు రాకపోకలు సాగించనున్నాయి. సికింద్రాబాద్–హైదరాబాద్ మధ్య సర్వీసులు రాత్రి 11.50 గంటల నుంచి, హైదరాబాద్–లింగంపల్లి సర్వీసులు రాత్రి 12.30 గంటల నుంచి, లింగంపల్లి–హైదరాబాద్ సర్వీసులు రాత్రి 1.50 గంటల నుంచి అందుబాటులో ఉంటాయి.
ఈ ప్రత్యేక ఎంఎంటీఎస్ రైళ్లు అన్ని ఎంఎంటీఎస్ రైల్వే స్టేషన్లలో ఆగుతాయని దక్షిణ మధ్య రైల్వే వెల్లడించింది. దీంతో గణేశ్ నిమజ్జన వేడుకలను వీక్షించి రాత్రివేళ తిరిగి వెళ్లే భక్తులకు ప్రజా రవాణా పరంగా అదనపు సౌకర్యం అందుబాటులోకి రానుంది.
Loading Tweet...
