హైదరాబాద్, ఆగస్టు 25 (జనవాణి): జీవో నెంబర్ 97ను రద్దు చేయాలని డిమాండ్ చేస్తూ పాలిటెక్నిక్ విద్యార్థులు చేస్తున్న ఆందోళనకు బీఆర్ఎస్ మద్దతు ప్రకటించింది. మంగళవారం మాసబ్ ట్యాంక్ ప్రభుత్వ పాలిటెక్నిక్ కళాశాలకు చేరుకున్న బీఆర్ఎస్ఎల్పీ డిప్యూటీ ఫ్లోర్ లీడర్, మాజీ మంత్రి హరీశ్‌రావు విద్యార్థులకు సంఘీభావం తెలిపారు. తాను ఇదే కళాశాలలో చదివిన పూర్వ విద్యార్థినని పేర్కొంటూ.. వారి పోరాటానికి అండగా ఉంటానని స్పష్టం చేశారు. పాలిటెక్నిక్ కళాశాలలను ఐటీఐలతో విలీనం చేసి స్కిల్ యూనివర్సిటీ పరిధిలోకి తీసుకెళ్లే ప్రయత్నం జరుగుతోందని హరీశ్‌రావు ఆరోపించారు. ఈ నిర్ణయం వల్ల రాష్ట్రంలోని ప్రభుత్వ పాలిటెక్నిక్ విద్యార్థుల భవిష్యత్తుపై ప్రభావం పడుతుందని అన్నారు. రాష్ట్రంలో ఉన్న 113 పాలిటెక్నిక్ కళాశాలల్లో 59 ప్రభుత్వ కళాశాలలను ప్రైవేటు పరం చేసే ప్రయత్నం జరుగుతోందని ఆయన పేర్కొన్నారు.
డిప్లొమా విద్యార్థులకు అవకాశాలు కోల్పోతారు
పాలిటెక్నిక్ విద్య కేవలం బ్లూ కాలర్ ఉద్యోగాలకే పరిమితం కాదని హరీశ్‌రావు అన్నారు. డిప్లొమా పూర్తి చేసిన అనేక మంది ఏఈలు, మోటార్ వెహికల్ ఇన్‌స్పెక్టర్లు, వాటర్ వర్క్స్ ఇంజనీర్లుగా పనిచేస్తున్నారని తెలిపారు. తక్కువ ఫీజుతో పాలిటెక్నిక్ పూర్తి చేసి, ల్యాటరల్ ఎంట్రీ ద్వారా ఇంజనీరింగ్ చదివే అవకాశం ప్రస్తుతం విద్యార్థులకు ఉందన్నారు. స్కిల్ యూనివర్సిటీలో విలీనం చేస్తే ఈ అవకాశాలు దెబ్బతినే ప్రమాదం ఉందని ఆందోళన వ్యక్తం చేశారు. భవిష్యత్తులో ఫీజులు పెరగకుండా ఎవరు హామీ ఇస్తారని, ఫీజు రీయింబర్స్‌మెంట్ కొనసాగుతుందనే భరోసా ఏమిటని ప్రభుత్వాన్ని ప్రశ్నించారు.
విద్యార్థులపై పోలీసుల చర్యలపై ఆగ్రహం
జీవో 97 రద్దు కోసం విద్యార్థులు గత 20 రోజులుగా ఆందోళన చేస్తున్నారని హరీశ్‌రావు తెలిపారు. నిరసన చేస్తున్న విద్యార్థులపై పోలీసుల వ్యవహారశైలి సరికాదని మండిపడ్డారు. విద్యార్థులు తమ హక్కుల కోసం ప్రజాస్వామ్య పద్ధతిలో పోరాడాలని పిలుపునిచ్చారు. జీవో 97ను వెంటనే రద్దు చేయకపోతే విద్యార్థుల ఉద్యమానికి బీఆర్ఎస్ అండగా నిలుస్తుందని స్పష్టం చేశారు. అవసరమైతే విద్యార్థులతో కలిసి సెక్రటేరియట్ ముట్టడికి కూడా వెనుకాడబోమని హెచ్చరించారు.
సెప్టెంబర్ 7లోపు జీవో 97 రద్దు చేయాలి
అసెంబ్లీ సమావేశాలు సెప్టెంబర్ 7న ప్రారంభమయ్యేలోపు జీవో 97ను ప్రభుత్వం రద్దు చేయాలని హరీశ్‌రావు డిమాండ్ చేశారు. పాలిటెక్నిక్ విద్యను ప్రభుత్వ ఆధీనంలోనే కొనసాగించాలని కోరారు. విద్యార్థుల భవిష్యత్తుకు భరోసా లేని నిర్ణయాలను ప్రభుత్వం వెనక్కి తీసుకోవాలని సూచించారు. అదేవిధంగా ప్రభుత్వ భూములు, ఆస్తులపై కాంగ్రెస్ ప్రభుత్వం దృష్టి సారించిందని హరీశ్‌రావు ఆరోపించారు. పాలిటెక్నిక్ కళాశాలల భూములు, భవనాలను కూడా ఆస్తులుగా చూడటం సరికాదని అన్నారు.
విద్యార్థుల భవిష్యత్తుతో చెలగాటం వద్దు
పాలిటెక్నిక్ విద్యార్థులు ప్రభుత్వానికి శత్రువులు కాదని హరీశ్‌రావు అన్నారు. విద్యార్థుల సమస్యలను ప్రభుత్వం సానుకూలంగా పరిష్కరించాలని కోరారు. జెన్-జీ అంటే కేవలం సోషల్ మీడియాలో రీల్స్ చేసే యువత కాదని.. అవసరమైతే తమ భవిష్యత్తు కోసం రోడ్డెక్కి పోరాడే శక్తి ఉందని వ్యాఖ్యానించారు. జీవో 97పై ప్రభుత్వం వెంటనే వెనక్కి తగ్గకపోతే విద్యార్థుల పోరాటం మరింత ఉధృతమయ్యే అవకాశం ఉందని హెచ్చరించారు.
