హైదరాబాద్‌లోని బీసీ భవన్‌లో సోమవారం నిర్వహించిన మీడియా సమావేశంలో బీసీ సంక్షేమ సంఘం జాతీయ అధ్యక్షుడు జాజుల శ్రీనివాస్ గౌడ్ విద్యార్థుల సమస్యలు, ఫీజు రీయింబర్స్‌మెంట్, ఉపాధి అవకాశాలపై ప్రభుత్వ వైఖరిని విమర్శించారు.
ఈ సందర్భంగా ఆయన మాట్లాడుతూ, దేశంలో జెన్ జీ ఉద్యమం ముగిసిపోలేదని, అవినీతి, బంధుప్రీతి, వారసత్వ రాజకీయాలు, ధన రాజకీయాలు ఉన్నంతకాలం వివిధ రూపాల్లో కొనసాగుతుందని అన్నారు. ఢిల్లీలో ఇటీవల జరిగిన "కాక్రోచ్ ఉద్యమం"ను ప్రస్తావిస్తూ, విద్యార్థులు, యువత, నిరుద్యోగులను ప్రభుత్వాలు తక్కువ అంచనా వేయకూడదన్నారు.
విద్యార్థుల సమస్యలపై ఆందోళన
తెలంగాణలో విద్యాశాఖ మంత్రి లేకపోవడం, ఫీజు రీయింబర్స్‌మెంట్ అమలు కాకపోవడం, ఫీజు బకాయిలు విడుదల కాకపోవడంతో విద్యార్థులు తీవ్ర ఇబ్బందులు ఎదుర్కొంటున్నారని జాజుల శ్రీనివాస్ గౌడ్ ఆరోపించారు. ఉన్నత విద్యకు పేద, బడుగు వర్గాల విద్యార్థులు దూరమవుతున్నారని, ఉద్యోగాల భర్తీ, జాబ్ క్యాలెండర్ విడుదలలో కూడా ప్రభుత్వం నిర్లక్ష్యంగా వ్యవహరిస్తోందని విమర్శించారు.
ఆగస్టులో మిలియన్ మార్చ్
విద్యారంగ పరిరక్షణ కోసం ఆగస్టు నెలలో బీసీ విద్యార్థులతో భారీ మిలియన్ మార్చ్ నిర్వహిస్తామని ప్రకటించారు. ఆగస్టు 15లోగా ఫీజు రీయింబర్స్‌మెంట్ బకాయిలు విడుదల చేయకపోతే "చలో హైదరాబాద్" కార్యక్రమం చేపట్టి, సుందరయ్య విజ్ఞాన కేంద్రం నుంచి ఇందిరా పార్క్ వరకు భారీ ర్యాలీ నిర్వహిస్తామని హెచ్చరించారు.
కేంద్ర, రాష్ట్ర ప్రభుత్వాలపై విమర్శలు
ఫీజు బకాయిల సమస్యను పరిష్కరించకపోతే విద్యార్థుల ఆందోళనలు మరింత ఉధృతమవుతాయని జాజుల శ్రీనివాస్ గౌడ్ పేర్కొన్నారు. విద్యార్థుల సమస్యలను నిర్లక్ష్యం చేస్తే కేంద్ర ప్రభుత్వం ఎదుర్కొన్న పరిస్థితులే రాష్ట్ర ప్రభుత్వానికీ ఎదురయ్యే అవకాశం ఉందని వ్యాఖ్యానించారు.
