బీఆర్ఎస్ సీనియర్ నాయకుడు, నర్సంపేట మాజీ ఎమ్మెల్యే పెద్ది సుదర్శన్ రెడ్డి ఆరోగ్య పరిస్థితిని తెలుసుకునేందుకు పార్టీ అధినేత కేసీఆర్ సోమవారం సికింద్రాబాద్‌లోని యశోద ఆస్పత్రికి వెళ్లారు. ఐసీయూలో చికిత్స పొందుతున్న పెద్ది సుదర్శన్ రెడ్డికి అందుతున్న వైద్య సేవలపై వైద్యులతో దాదాపు అరగంటకు పైగా చర్చించారు.
వైద్యులతో మాట్లాడిన కేసీఆర్, పెద్ది సుదర్శన్ రెడ్డికి అత్యున్నత స్థాయి చికిత్స అందేలా అన్ని చర్యలు తీసుకోవాలని కోరారు. "మీరు ఏం చేస్తారో చేయండి... కానీ మా పెద్ది సుదర్శన్ రెడ్డిని కాపాడండి" అంటూ వైద్యులకు చేతులెత్తి నమస్కరించినట్లు పార్టీ వర్గాలు వెల్లడించాయి.
ప్రపంచ స్థాయి చికిత్స అందిస్తున్నాం: వైద్యులు
ఈ సందర్భంగా వైద్యులు కేసీఆర్‌కు పెద్ది సుదర్శన్ రెడ్డి ఆరోగ్య పరిస్థితిని వివరించారు. ప్రపంచ స్థాయి వైద్య సేవలు అందిస్తున్నామని, అవసరమైతే విదేశాల్లోని నిపుణుల సలహాలను కూడా తీసుకుంటున్నామని తెలిపారు.
గుండె, ఊపిరితిత్తులు సహా ఇతర అవయవాలు సక్రమంగా పనిచేస్తున్నాయని, అయితే మెదడు పూర్తిగా స్పందించే పరిస్థితిపై స్పష్టత రావడానికి మరో 48 గంటల సమయం పట్టే అవకాశం ఉందని వివరించినట్లు తెలిపారు. ఈ దశలో పూర్తి ఆరోగ్య పరిస్థితిపై నిర్దిష్ట సమాచారం ఇవ్వడం సాధ్యం కాదని వైద్యులు పేర్కొన్నారు.
కుటుంబ సభ్యులకు భరోసా
ఐసీయూలో చికిత్స విధానాన్ని పరిశీలించిన అనంతరం కేసీఆర్ పెద్ది సుదర్శన్ రెడ్డి కుటుంబ సభ్యులను కలిసి ధైర్యం చెప్పారు. డాక్టర్ల కృషి, దేవుని దయ, ప్రజల ఆశీస్సులతో ఆయన కోలుకుంటారనే ఆశాభావాన్ని వ్యక్తం చేశారు. ఆందోళన చెందవద్దని, అవసరమైన అన్ని విధాలుగా పార్టీ అండగా ఉంటుందని హామీ ఇచ్చారు.
ఆర్థిక సహాయంపై హామీ
చికిత్సకు అవసరమైన ఖర్చు విషయంలో ఎలాంటి వెనుకంజ ఉండదని, పార్టీ తరఫున అవసరమైన ఆర్థిక సహాయాన్ని అందిస్తామని కేసీఆర్ కుటుంబ సభ్యులకు భరోసా ఇచ్చినట్లు పార్టీ వెల్లడించింది.
పార్టీ నేతల హాజరు
కేసీఆర్ వెంట మాజీ మంత్రులు హరీశ్ రావు, తలసాని శ్రీనివాస్ యాదవ్, రాజయ్య, వేముల ప్రశాంత్ రెడ్డి, సత్యవతి రాథోడ్, పద్మారావు గౌడ్, వినోద్ కుమార్, మాజీ ఎంపీ జోగినపల్లి సంతోష్ కుమార్, ఎమ్మెల్యే పల్లా రాజేశ్వర్ రెడ్డి, ఎమ్మెల్సీ పోచంపల్లి శ్రీనివాస్ రెడ్డి, డాక్టర్ సంజయ్‌తో పాటు పలువురు పార్టీ నాయకులు ఆస్పత్రికి వెళ్లారు.
