వరంగల్,సెప్టెంబర్ 29 (జనవాణి): తెలంగాణ కాంగ్రెస్‌లో నెలకొన్న పరిణామాల నేపథ్యంలో మాజీ మంత్రి, వరంగల్ తూర్పు ఎమ్మెల్యే కొండా సురేఖ మరోసారి సంచలన వ్యాఖ్యలు చేశారు. తనను, తన అనుచరులను ఉద్దేశించి ఇష్టానుసారంగా మాట్లాడుతున్న కొందరు నేతలకు ఆమె గట్టి హెచ్చరికలు జారీ చేశారు. హద్దులు దాటి మాట్లాడితే మహిళా కార్యకర్తలతో చిత్తుచిత్తుగా కొట్టిస్తామని ఘాటు వ్యాఖ్యలు చేశారు.
మంగళవారం వరంగల్‌లోని తన క్యాంపు కార్యాలయంలో జరిగిన సీఎంఆర్‌ఎఫ్, కల్యాణలక్ష్మి చెక్కుల పంపిణీ కార్యక్రమంలో పాల్గొన్న కొండా సురేఖ ఈ వ్యాఖ్యలు చేశారు. తనపై, తన వర్గంపై విమర్శలు చేసే నేతలు నోరు అదుపులో పెట్టుకోవాలని సూచించారు. ఒక్కో మహిళ నలుగురిని ఎదుర్కొనే సత్తా కలిగి ఉందని ఆమె వ్యాఖ్యానించారు.
మరోవైపు కాంగ్రెస్‌లోని అంతర్గత విభేదాలపైనా కొండా సురేఖ స్పందించారు. నాయకులు వ్యక్తిగత, వర్గ విభేదాలను పక్కన పెట్టి పార్టీ ప్రయోజనాలకు ప్రాధాన్యం ఇవ్వాలని కోరారు. రాబోయే స్థానిక సంస్థల ఎన్నికలను ప్రతిష్ఠాత్మకంగా తీసుకుని నేతలంతా సమన్వయంతో పనిచేయాలని పిలుపునిచ్చారు. పార్టీకి, నాయకత్వానికి నష్టం కలిగించేలా బహిరంగ వ్యాఖ్యలు చేయకుండా క్రమశిక్షణ పాటించాలని సూచించారు.
ఇటీవల తనకు మంత్రి పదవి దూరమైన అంశంపైనా ఆమె స్పందించారు. మంత్రిగా ఉన్న సమయంలో రాష్ట్రవ్యాప్తంగా సేవ చేసే అవకాశం ఉండేదని, ప్రస్తుతం ఎమ్మెల్యేగా తన నియోజకవర్గంపై మరింత దృష్టి సారించే అవకాశం లభించిందని చెప్పారు. వరంగల్ నియోజకవర్గ ప్రజలకు అందుబాటులో ఉంటూ వారి సమస్యల పరిష్కారానికి కృషి చేస్తానని తెలిపారు.
రాబోయే వరంగల్ మున్సిపల్ కార్పొరేషన్ ఎన్నికల్లో కాంగ్రెస్‌కు బలమైన ఫలితాలు సాధించేలా పనిచేస్తామని కొండా సురేఖ పేర్కొన్నారు. ఇక వరంగల్ ఎంజీఎం ఆస్పత్రిలో ఇటీవల పైకప్పు పెచ్చులు ఊడిపడిన ఘటనపైనా ఆమె స్పందించారు. ఘటనలో ప్రాణనష్టం జరగకపోవడం అదృష్టమని అన్నారు. ఎంజీఎం కొత్త భవనం నిర్మాణ దశలో ఉందని, ప్రస్తుత భవనంలో కొన్ని పనులు కొనసాగుతున్నాయని వివరించారు. గత ప్రభుత్వ హయాంలో ఎంజీఎం అభివృద్ధికి ఏం చేశారో ప్రతిపక్ష నేతలు చెప్పాలని ప్రశ్నించారు.
వరంగల్‌లో నిర్మిస్తున్న కొత్త కలెక్టరేట్ భవనం పనులు దాదాపు పూర్తయ్యాయని, ఫర్నిచర్, రంగుల పనులు మాత్రమే మిగిలి ఉన్నాయని కొండా సురేఖ తెలిపారు. సూపర్ స్పెషాలిటీ ఆస్పత్రిని త్వరలోనే ప్రజలకు అందుబాటులోకి తీసుకువస్తామని చెప్పారు.
Loading Tweet...
