తెలంగాణ సాంస్కృతిక పునరుజ్జీవనానికి కృషి చేస్తున్న తెలంగాణ జాగృతిలో కీలక మార్పు చోటుచేసుకుంది. సంస్థ రాష్ట్ర అధ్యక్షురాలిగా మారిపల్లి మాధవిని వ్యవస్థాపక చైర్‌పర్సన్ కల్వకుంట్ల కవిత నియమించారు.
ఈ మేరకు విడుదల చేసిన ప్రకటనలో, తాను తెలంగాణ జాగృతి ఫౌండర్ చైర్‌పర్సన్‌గా కొనసాగుతూనే రాష్ట్ర అధ్యక్ష బాధ్యతలను మారిపల్లి మాధవికి అప్పగిస్తున్నట్లు కవిత తెలిపారు. ఆమె నియామకం వెంటనే అమల్లోకి వస్తుందని స్పష్టం చేశారు.
2006లో తెలంగాణ ఉద్యమ సమయంలో స్థాపన
తెలంగాణ ప్రత్యేక రాష్ట్ర సాధన ఉద్యమం ఉద్ధృతంగా సాగుతున్న సమయంలో తెలంగాణ ప్రాంత సంస్కృతి, చరిత్ర, సంప్రదాయాలను పరిరక్షించి ప్రపంచానికి పరిచయం చేయాలనే లక్ష్యంతో 2006లో కల్వకుంట్ల కవిత తెలంగాణ జాగృతిని స్థాపించారు.
బతుకమ్మకు ప్రపంచవ్యాప్త గుర్తింపు
తెలంగాణ జాగృతి ఆధ్వర్యంలో బతుకమ్మ పండుగను రాష్ట్ర సరిహద్దులు దాటి జాతీయ, అంతర్జాతీయ స్థాయిలో పరిచయం చేయడంలో సంస్థ కీలక పాత్ర పోషించింది. ఒకప్పుడు తెలంగాణ గ్రామాలకు పరిమితమైన బతుకమ్మను ప్రపంచవ్యాప్తంగా నిర్వహించే స్థాయికి తీసుకెళ్లిందని సంస్థ పేర్కొంది. అలాగే తెలంగాణ ఉద్యమ సమయంలో మహిళలు పెద్ద ఎత్తున ఉద్యమంలో భాగస్వాములు కావడానికి తెలంగాణ జాగృతి వేదికగా నిలిచిందని తెలిపింది.
రెండు దశాబ్దాలుగా కవిత నాయకత్వం
దాదాపు రెండు దశాబ్దాలుగా కల్వకుంట్ల కవిత తెలంగాణ జాగృతి వ్యవస్థాపక అధ్యక్షురాలిగా సంస్థకు నాయకత్వం వహించారు. తాజా నిర్ణయంతో ఆమె ఫౌండర్ చైర్‌పర్సన్‌గా కొనసాగుతుండగా, సంస్థ రాష్ట్ర అధ్యక్షురాలిగా మారిపల్లి మాధవి బాధ్యతలు స్వీకరించనున్నారు.
