అదనపు కలెక్టర్ చేతుల మీదుగా చెక్కుల పంపిణీ
మేడ్చల్-మల్కాజిగిరి జిల్లా అదనపు కలెక్టర్ ఫైజాన్ అహ్మద్ తన ఛాంబర్‌లో నిర్వహించిన కార్యక్రమంలో జిల్లా రెవెన్యూ అధికారి (డీఆర్వో) మాలతితో కలిసి భూయజమానులకు రూ.33 కోట్ల పరిహార చెక్కులను అందజేశారు.
సికింద్రాబాద్–శామీర్‌పేట్ ఎలివేటెడ్ కారిడార్ నిర్మాణానికి అవసరమైన భూముల సేకరణ ప్రక్రియలో భాగంగా ఈ పరిహారం చెల్లించినట్లు అధికారులు వెల్లడించారు.
తప్పుడు ప్రచారాలను నమ్మొద్దు
ఈ సందర్భంగా ప్రత్యేక భూసేకరణ అధికారిణి మాలతి మాట్లాడుతూ, ప్రభుత్వం ప్రతిష్ఠాత్మకంగా చేపడుతున్న ఈ ప్రాజెక్టుకు సంబంధించి అల్వాల్‌లోని భూములపై ఇటీవల జరుగుతున్న అసత్య ప్రచారాలు, తప్పుడు ఆరోపణలను ఖండించారు.
చట్టబద్ధమైన ప్రక్రియలు, అధికారిక భూ రికార్డుల ఆధారంగానే భూసేకరణ చేపడుతున్నామని, సర్వే నంబర్ 168 భూమికి సంబంధించి ఎలాంటి ఆధారాలు లేకుండా నిరాధార వార్తలు ప్రచారం చేయడం సరికాదని స్పష్టం చేశారు.
చట్టబద్ధ ప్రక్రియల ద్వారానే భూసేకరణ
ప్రభుత్వ నిబంధనలకు అనుగుణంగా, అన్ని చట్టపరమైన ప్రక్రియలు పూర్తి చేసిన అనంతరమే భూసేకరణ, పరిహారం చెల్లింపు జరుగుతోందని అధికారులు తెలిపారు.
ప్రజలు అధికారిక సమాచారం మాత్రమే విశ్వసించాలని, వాస్తవాలకు విరుద్ధంగా ప్రచారం జరిగే సమాచారాన్ని నమ్మవద్దని సూచించారు.
