షాద్‌నగర్,సెప్టెంబర్ 28 (జనవాణి): రంగారెడ్డి జిల్లా షాద్‌నగర్ టోల్‌ప్లాజా వద్ద జింక మాంసం పట్టుబడింది. జింక మాంసాన్ని తరలిస్తున్నారన్న సమాచారంతో ఎస్‌ఓటీ పోలీసులు టోల్‌ప్లాజా వద్ద వాహనాల తనిఖీలు చేపట్టారు. తనిఖీల్లో భాగంగా జింక మాంసాన్ని తరలిస్తున్న ఎనిమిది మందిని పోలీసులు అదుపులోకి తీసుకున్నారు. వారి వద్ద నుంచి సుమారు 13 కిలోల జింక మాంసాన్ని స్వాధీనం చేసుకున్నారు. అలాగే వేటకు ఉపయోగించినట్లు భావిస్తున్న ఓ రైఫిల్‌ను కూడా పోలీసులు స్వాధీనం చేసుకున్నారు.
ఈ ఘటనపై కేసు నమోదు చేసిన పోలీసులు.. జింకను ఎక్కడ వేటాడారు, మాంసాన్ని ఎక్కడి నుంచి తీసుకొచ్చారు, ఎక్కడికి తరలిస్తున్నారు అనే కోణాల్లో దర్యాప్తు చేస్తున్నారు. అదుపులోకి తీసుకున్న ఎనిమిది మందిని విచారిస్తున్నారు. ఈ వ్యవహారంలో మరికొందరి ప్రమేయం ఉందా అనే అంశంపైనా పోలీసులు ఆరా తీస్తున్నారు. దర్యాప్తు పూర్తయిన తర్వాత ఘటనకు సంబంధించిన మరిన్ని వివరాలు వెల్లడయ్యే అవకాశం ఉంది.
